Yoˇhaˬ 17:1 - Akha

¹ Yeˬsuˇ kʼoeˇ loꞈ-ehˇ ngehˬ gʼaˬ tmˇ gʼaˬ ngeh, mˬ paw gʼawˇ leuˇ-awˇ heu loꞈ-ehˇ ehˇ-eu meh. “Aˬda-oˇ, aˇ yamˬ keuˆ le-euˬ meh. Zaˬ maˇ baˬ da neh nawˬ-euˬ yaw shehꞈ kʼahˬ sehˇ-ahˇ aˬ cawˬ mawˇ nya ni, nawˬ-euˬ Zaˬmaˇ-ahˇ yaw shehꞈ kʼahˬ sehˇ biꞈ laꞈ-awˬ.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹ Yeqsur dawq heudeuq ngaeqghaq-awr, mq paw ghawrleur-awr heulof-aer aer-eu mae: “Aqda-or! Aryamq keuvlar-euq ngar-a. Zaqyo-euq baqda’nae nawr yawshaef khanqsaer za’ni, nawq-euq Zaqyo-anr yawshaef khanqsaer biza naeqlaf-awq.

Yoˇhaˬ 17:1 Iomraidhean Croise

Jaceuq 123:1

Sahˬpaˬ Miˬyehˇ-oˇ, nawˬ-ahˇ ngaˇ gʼawˇ leuˇ haw-eu ma. Nawˇ uˆ lahˇ luꞈ-eu mˬ kʼoeˇ taˆ ngaˇ gʼawˇ leuˇ haw-eu ma.

Iˇsaˬyaˇ 38:14

Ngaˇ dawˬ maˬ ngehˬ doˆ coeˇ ni pyeuꞈ-iˇ-awˇ, kʼaˬ kʼoeˬ duˇ-eu naˆ ni mahˇ-euˬ tehꞈ ma. Mˬ-ahˇ gʼawˇ leuˇ haw-euˬ miˇ neh, ngaˬ-euˬ myaˆ nuiˆ gʼah dui dui nya. Sahˬpaˬ Miˬyehˇ-oˇ, shaˬ zahˬ heu laꞈ kʼoeˇ, ngaˬ-ahˇ ka kʼoꞈ laꞈ-awˬ.

Maˬkuˆ 14:41

Aˬ yawꞈ smˬ poˆ tiˬ poˆ paˇ gʼoꞈ le ngeh, aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Naw maꞈ nymˬ-mˇ keuˆ ni yuꞈ kʼaˆ-awˇ gʼaˬ naˬ naˬ luꞈ te siˬ loˇ. Gʼaˬ-aˇ. Aˇ yamˬ keuˆ laˇ-euˬ ngaˇ. Haw-awˬ. Tsawˇhaˬ-euˬ Zaˬmaˇ-ahˇ iˬ baˇ zaˬ deuˬ-euˬ aˬ laꞈ laꞈ kʼoeˇ a nehˬ shaw-iˬ meh.

Luˇkaꞈ 18:13

Ehˇ kʼawꞈ, kawˬ taꞈ-eu tsawˇ haˬ kʼoeˇ gʼaˬ-aˬ, ui cuiˆ yaw taw yawꞈ-awˇ, myaˆ pyawˬ mˬ paw maˬ ciˬ diˇ peuˬ ni, noeˬ shaˬ dui dui-eu miˇ neh kʼahˬ-ahˇ teˇ teˇ-ehˇ, ‘Miˬyehˇ-oˇ, ngaˇ iˬ baˇ zaˬ ma. Gʼawˬ shaˬ gaˬ nehˬ laꞈ-awˬ’ lehˇ shaˇ-euˬ meh.

Luˇkaꞈ 22:53

Naw maꞈ nehˬ-ehˇ Uˬ duˬ tahˬ nymˇ nymˇ ma laꞈ kʼoeˇ yawˬ nah na luꞈ ngaˇ jawˇ luꞈ ngeh, naw maꞈ ngaˬ-ahˇ maˬ nyehꞈ-a. Ehˇ kawꞈ, yaw zahˇ-euˬ baoˬ uˆ lahˇ-eu aˇ yamˬ heu yamˬ, naw maꞈ heu loꞈ-ehˇ mˇ-eu gʼaˇ duˬ tsaˬ dui dui-eu aˇ yamˬ meh.”

Yoˇhaˬ 11:4

Dawˬ kʼoeˇ dawˬ-ahˇ Yeˬsuˇ ya gaˬ ngeh, heu loꞈ-ehˇ ehˇ-eu meh. “Naˇ-eu gawˇ-eu kʼoeˇ baˬ da neh, Laˬzaˬluˇ shiˇ gaˇ aˇ saˬ maˬ saˬ-aˇ. Miˬyehˇ-euˬ yaw shehꞈ kʼahˬ sehˇ bi doˆ laˇ-eu gʼaˇ duˬ kʼoeˇ loꞈ-ehˇ pyeuꞈ laˇ-awˇ, Kʼoeˇ baˬ da neh Miˬyehˇ-euˬ Zaˬmaˇ yaw shehꞈ kʼahˬ sehˇ za tehꞈ-a.”

Yoˇhaˬ 11:41

Kʼoeˇ ngeh, aˬ yawꞈ maꞈ kʼaˬ lo ngawˬ dzeh-euˬ meh. Yeˬsuˇ mˬ paw gʼawˇ leuˇ-awˇ ehˇ-eu, “Aˬda-oˇ, ngaˬ-euˬ shaˇ dawˬ-ahˇ nawˇ naˇ haˬ nehˬ laꞈ-eu miˇ neh nawˬ-euˬ guiˬ lahˬ-ahˇ ja ceuˬ-eu ma.

Yoˇhaˬ 12:23

Yeˬsuˇ aˬ yawꞈ nyaꞈ-ahˇ ehˇ nehˬ-eu, “Tsawˇ haˬ-euˬ Zaˬmaˇ huiˬ dui dui-eu yaw shehꞈ kʼahˬ sehˇ za-eu aˇ yamˬ keuˆ laˇ-euˬ meh.

Yoˇhaˬ 13:1

Baˬsaˬkaˬ Bawˬ-iˬ keuˆ le-eu mehˬ hu ngeh nah, aˬ yawꞈ miˇ tsaˬ heu-ahˇ gʼawˬ-iˇ-awˇ, Aˬda jawˇ gaˇ ya gʼoꞈ leˇ-eu aˇ yamˬ tsaˬ laˇ-euˬ gaˇ kawˆ Yeˬsuˇ siˬ nya-eu meh. Miˇtsaˬ kʼoeˇ taˆ jawˇ-eu aˬ yawꞈ-ahˇ jah-eu tsawˇ haˬ deuˬ-ahˇ aˬ yawꞈ gaˬ-awˇ, aˇ saˬ saˬ ngeh keuˆ ni gaˬ-euˬ meh.

Yoˇhaˬ 16:32

Naw maꞈ dawˬ tawˆ luꞈ bi teh byaˆ jiˇ-awˇ, yawˬ ha-euˬ nymˇ-ahˇ yawˬ ha cehˆ gʼoꞈ jiˇ-awˇ, ngaˬ-ahˇ tehꞈ-ehˇ byehˇ dzeh yaꞈ-eu aˇ yamˬ keuˆ le luꞈ meh. Aˇ yamˬ kʼoeˇ aˬ diˇ keuˆ le taˬ-euˬ meh. Ehˇ kʼawꞈ, ngaˇ-aˬ, tiˬ gʼaˬ tehꞈ maˬ ngeuˇ. Aˬ jeˬ miˇ neh ehˇ naˇ, Aˬda ngaˬ nehˬ-ehˇ jawˇ ma.

Yoˇhaˬ 7:30

Kʼoeˇ ngeh, aˬ yawꞈ maꞈ aˬ yawꞈ-ahˇ nyehꞈ-eu lehˇ gʼeh-eu meh. Ehˇ kʼawꞈ, aˬ yawꞈ-euˬ aˇ yamˬ maˬ keuˆ le dah-euˬ miˇ neh aˬ yawꞈ-ahˇ tiˬ gʼaˬ-iˬ maˬ nyehꞈ nya-a.

Yoˇhaˬ 7:39

Yeˬsuˇ kʼoeˇ loꞈ-ehˇ ehˇ-eu-aˬ, aˬ yawꞈ-ahˇ kʼaˇ jah-eu tsawˇ haˬ deuˬ Yaw sahˇ Miˬyehˇ za gaˇ ehˇ mawꞈ-eu meh. Aˇ yamˬ kʼoeˇ yamˬ-ahˇ keuˆ ni Yaw sahˇ Miˬyehˇ maˬ biꞈ leꞈ-aˬ siˬ. Aˬ jeˬ miˇ neh ehˇ naˇ, Yeˬsuˇ-ahˇ yaw shehꞈ kʼahˬ sehˇ laꞈ kʼoeˇ maˬ ciˬ daˆ kʼoꞈ leꞈ-aˬ siˬ.

Yoˇhaˬ 8:20

Yeˬsuˇ-aˬ, Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ daˬ bahˬ keuˆ deuˬ baꞈ taˬ-euˬ lawˆ-ahˇ jawˇ-awˇ, gaˇ kawˆ kʼoeˇ deuˬ mehˬ nehˬ tsoˆ nehˬ-euˬ meh. Ehˇ kʼawꞈ, tsawˇ haˬ tiˬ gʼaˬ-iˬ aˬ yawꞈ-ahˇ maˬ nyehꞈ-a. Aˬ jeˬ miˇ neh ehˇ naˇ, aˬ yawꞈ-euˬ aˇ yamˬ maˬ keuˆ laˇ-euˬ miˇ neh meh.

Gʼaˬkʼehˇ 3:13

Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ pyeuꞈ-eu aˬ dui maꞈ-euˬ aˬ poeˬ aˬ bawˇ deuˬ-euˬ Miˬyehˇ neh, a yawꞈ-euˬ Zaˬ kʼaˆ Yeˬsuˇ-ahˇ muiˬ-eu shawˇ-eu yaw shehꞈ kʼahˬ sehˇ biꞈ nehˬ-euˬ meh. Ehˇ kʼawꞈ, aˬ yawꞈ-ahˇ miˇ kʼahˬ sahˬ paˬ sahˬ ma deuˬ-euˬ aˬ laꞈ laꞈ kʼoeˇ naw maꞈ a nehˬ-awˇ, aˬ yawꞈ-ahˇ pyehˬ nehˬ-eu gʼaˇ duˬ sahˬ paˬ Piˇlaˆ noeˬ tsehˆ gʼaˬ-euˬ kʼawꞈ, sahˬ paˬ Piˇlaˆ mehˬ shi aˬ yawꞈ-ahˇ naw maꞈ iˬ baˆ poˆ-euˬ meh.

1 Beˬtuˆluˆ 1:21

Aˬ yawꞈ-ahˇ shiˇ-euˬ gaˇ bi gʼoꞈ dehꞈ laˇ-awˇ yaw shehꞈ kʼahˬ sehˇ biꞈ nehˬ-euˬ gʼaˬ pyeuꞈ-eu Miˬyehˇ-ahˇ, aˬ yawꞈ baˬ da neh naw maꞈ jah laˇ-euˬ meh. Kʼoeˇ miˇ neh, naw maꞈ jah-awˇ noeˬ tmˬ-eu jeˬ-aˬ, Miˬyehˇ tiˬ gʼaˬ tehꞈ meh.