Yoˇhaˬ 11:41 - Akha

⁴¹ Kʼoeˇ ngeh, aˬ yawꞈ maꞈ kʼaˬ lo ngawˬ dzeh-euˬ meh. Yeˬsuˇ mˬ paw gʼawˇ leuˇ-awˇ ehˇ-eu, “Aˬda-oˇ, ngaˬ-euˬ shaˇ dawˬ-ahˇ nawˇ naˇ haˬ nehˬ laꞈ-eu miˇ neh nawˬ-euˬ guiˬ lahˬ-ahˇ ja ceuˬ-eu ma.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁴¹ Khoerngae, aqyawfmaf, shir-euq khoerghaq bafpanq taq-euq gar nae, khaqlo ngawqdzae-euq mae. Yeqsur mq paw ghawrleur-awr heulof-aer aer-eu mae, “Aqda-or! Nawr, ngaq-euq shardawq-anr narhaq-eu mirnae, ngar, nawq-anr jaceuq ma.

Yoˇhaˬ 11:41 Iomraidhean Croise

Jaceuq 123:1

Sahˬpaˬ Miˬyehˇ-oˇ, nawˬ-ahˇ ngaˇ gʼawˇ leuˇ haw-eu ma. Nawˇ uˆ lahˇ luꞈ-eu mˬ kʼoeˇ taˆ ngaˇ gʼawˇ leuˇ haw-eu ma.

Maꞈtehˬ 11:25

Kʼoeˇ ngeh, Yeˬsuˇ heu loꞈ-ehˇ ehˇ-eu meh. “Mˬ hawˇ-eu miˇ-ahˇ uˆ lahˇ-eu Sahˬpaˬ pyeuꞈ-eu Aˬda-oˇ, zaˬ siˬ tsawˇ gahˇ ahˇ-eu tsawˇ haˬ deuˬ hawˇ-eu siˬ-eu nya-eu tsawˇ haˬ deuˬ-euˬ mehˬ shi neh zaꞈ taˬ-euˬ jeˬ, maˬ siˬ maˬ nya-eu tsawˇ haˬ deuˬ-ahˇ nawˇ pah mehˬ-euˬ miˇ neh, nawˬ-euˬ guiˬ lahˬ-ahˇ ngaˇ ja ceuˬ-eu ma.

Maꞈtehˬ 11:26

Aˬda-oˇ, kʼoeˇ loꞈ-ehˇ bi pyeuꞈ laˇ-eu gʼaˇ duˬ, nawˇ nui ma tsaˬ-eu meh.

Maꞈtehˬ 27:60

Kʼoeˇ naˇ, shuiꞈ teˇ poˬ ni gʼeh-eu aˬ yawꞈ-euˬ lmˬ bymˇ lo kʼahˬ-ahˇ baꞈ ahˇ-awˇ, lmˬ bymˇ mehˬ kʼehˬ-ahˇ kʼaˬ lo lo ma ngawˬ tsoeˬ yaꞈ-awˇ gʼoꞈ leˇ-euˬ meh. Lmˬ bymˇ kʼoeˇ-aˬ, aˬ yawꞈ neh lo guˇ-ahˇ taꞈ byoe-awˇ jahˇ taˬ-euˬ meh.

Maˬkuˆ 15:46

Yoˇsehˆ-aˬ, shawˇ jehˆ ni gʼeh-eu saˬ paˇ paˇ pyuˇ zeuˇ-awˇ, Yeˬsuˇ-euˬ gʼawˇ mawˇ baꞈ ka-awˇ, mawˇ tawˆ tawˆ-awˇ, lo guˇ-ahˇ taꞈ byoe-awˇ jahˇ taˬ-euˬ lmˬ bymˇ laꞈ kʼoeˇ baꞈ pahˬ-iˇ-euˬ meh. Kʼoeˇ naˇ, lmˬ bymˇ-euˬ mehˬ kʼehˬ-ahˇ kʼaˬ lo lo ma ngawˬ tsoeˬ yaꞈ-euˬ meh.

Luˇkaꞈ 10:21

Kʼoeˇ ngeh, Muiˬ-eu shawˇ-eu Yaw sahˇ Miˬyehˇ laꞈ kʼoeˇ Yeˬsuˇ laˬ kʼaˬ cehˇ-awˇ, heu loꞈ-ehˇ ehˇ-eu meh. “Mˬ sahˇ Sahˬpaˬ miˇ sahˇ Sahˬma pyeuꞈ-eu Aˬda-oˇ, nawˬ-euˬ guiˬ lahˬ-ahˇ ngaˇ ja ceuˬ-eu ma. Aˬ jeˬ miˇ neh ehˇ naˇ, zaˬ siˬ tsawˇ gahˇ ahˇ-eu tsawˇ haˬ deuˬ hawˇ-eu, siˬ-eu nya-eu tsawˇ haˬ deuˬ-ahˇ, gaˇ kawˆ heu deuˬ nawˇ zaꞈ taˬ-awˇ, maˬ siˬ maˬ nya-eu tsawˇ haˬ deuˬ-ahˇ nawˇ pah mehˬ nehˬ-euˬ meh. Nawˬ-euˬ gʼawˬ shaˬ gaˬ-eu jeˬ baˬ da neh, nawˇ kʼoeˇ loꞈ-ehˇ jahˇ nehˬ laꞈ mawꞈ-eu jeˬ pyeuꞈ-eu meh.

Luˇkaꞈ 18:13

Ehˇ kʼawꞈ, kawˬ taꞈ-eu tsawˇ haˬ kʼoeˇ gʼaˬ-aˬ, ui cuiˆ yaw taw yawꞈ-awˇ, myaˆ pyawˬ mˬ paw maˬ ciˬ diˇ peuˬ ni, noeˬ shaˬ dui dui-eu miˇ neh kʼahˬ-ahˇ teˇ teˇ-ehˇ, ‘Miˬyehˇ-oˇ, ngaˇ iˬ baˇ zaˬ ma. Gʼawˬ shaˬ gaˬ nehˬ laꞈ-awˬ’ lehˇ shaˇ-euˬ meh.

Luˇkaꞈ 24:2

Kʼoeˇ ngeh, lmˬ bymˇ lo kʼahˬ-ahˇ ngawˬ tsoeˬ taˬ-euˬ kʼaˬ lo kʼoeˇ siˬ ngawˬ dzeh-awˇ jaˆ gaˇ ya mawˇ-euˬ meh.

Yoˇhaˬ 11:22

Ehˇ kʼawꞈ, nymˬ-mˇ kʼawꞈ ni, nawˇ kʼaˇ shaˇ-eu jeˬ Miˬyehˇ nawˬ-ahˇ mˇ nehˬ laꞈ tehꞈ-a lehˇ ngaˇ siˬ nya ma.”

Yoˇhaˬ 17:1

Yeˬsuˇ kʼoeˇ loꞈ-ehˇ ngehˬ gʼaˬ tmˇ gʼaˬ ngeh, mˬ paw gʼawˇ leuˇ-awˇ heu loꞈ-ehˇ ehˇ-eu meh. “Aˬda-oˇ, aˇ yamˬ keuˆ le-euˬ meh. Zaˬ maˇ baˬ da neh nawˬ-euˬ yaw shehꞈ kʼahˬ sehˇ-ahˇ aˬ cawˬ mawˇ nya ni, nawˬ-euˬ Zaˬmaˇ-ahˇ yaw shehꞈ kʼahˬ sehˇ biꞈ laꞈ-awˬ.

Yoˇhaˬ 20:1

Tiˬ jaw laꞈ kʼoeˇ aˇ dahˬ beh-eu nah uˬ shawˬ paw uˬ bya maˬ bya laˇ mi naˆ-ehˇ, Maˬgaˬdaˬlaˇ meuˬ-ahˇ jawˇ-eu Maˬliˇ kʼoeˇ gʼaˬ lmˬ bymˇ-ahˇ iˇ haw ngeh, lmˬ bymˇ mehˬ kʼehˬ-ahˇ jaˆ-eu kʼaˬ lo ngawˬ dzeh-awˇ jaˆ gaˇ ya mawˇ-euˬ meh.

Gʼaˬkʼehˇ 7:55

Ehˇ kʼawꞈ, Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-eu Saˬteˬpaˬ-aˬ, mˬ-ahˇ gʼawˇ leuˇ haw ngeh, Miˬyehˇ-euˬ yaw shehꞈ kʼahˬ sehˇ-ahˇ maˬ ehˇ, Miˬyehˇ-euˬ aˇ maˇ paw Yeˬsuˇ yawꞈ luꞈ gaˇ maˬ ehˇ, ya mawˇ-euˬ meh.

Piˇliˇpiˆ 4:6

Tiˬ jeˬ-ahˇ-iˬ kʼahˬ taˬ lahˇ. Ehˇ kʼawꞈ, naw maꞈ guiˬ lahˬ kʼaˇ shaˇ ngeh, naw maꞈ loˬ-eu jeˬ Miˬyehˇ-ahˇ shaˇ-awˬ. Aˬ myah luꞈ aˬ yawꞈ-ahˇ guiˬ lahˬ huiˬ-eu nui ma ahˇ-eu laꞈ kʼoeˇ shaˇ-awˬ.