Piˇliˇpiˆ 4:6 - Akha

⁶ Tiˬ jeˬ-ahˇ-iˬ kʼahˬ taˬ lahˇ. Ehˇ kʼawꞈ, naw maꞈ guiˬ lahˬ kʼaˇ shaˇ ngeh, naw maꞈ loˬ-eu jeˬ Miˬyehˇ-ahˇ shaˇ-awˬ. Aˬ myah luꞈ aˬ yawꞈ-ahˇ guiˬ lahˬ huiˬ-eu nui ma ahˇ-eu laꞈ kʼoeˇ shaˇ-awˬ.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁶ Tiqjeq-anr-iq khanq taqlanr. Aerkhawf, yawqjeq navluf-euq lafkhoer guiqlanq sharshar-aer, tanqshar-awr jaceuq-eu lafkhoer, nawmaf sharmawf-eu jeq Miqyaer-anr dzawrnaeq-awq.

Piˇliˇpiˆ 4:6 Iomraidhean Croise

1 Sahˬpaˬ 8:28

Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, ngaˇ-aˬ, nawˬ-euˬ zaˬ kʼaˆ pyeuꞈ-eu ma. Ngaˬ-euˬ shaˇ dawˬ-ahˇ naˇ haˬ-awˇ iˬ nah ngaˬ neh kʼaˇ shaˇ-euˬ loꞈ-ehˇ caw ba nehˬ laꞈ-awˬ.

2 Laˬsaˬbaˬ 32:20

Kʼoeˇ ngeh, sahˬ paˬ Heˬsaˬgiˇ hawˇ-eu Aˬmoˆ-euˬ aˬ li Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Iˇsaˬyaˇ aˬ nyaꞈ, Miˬyehˇ bi caw ba le-eu gʼaˇ duˬ guiˬ lahˬ shaˇ-euˬ meh.

Jaceuq 51:15

Sahˬ paˬ Miˬyehˇ-oˇ, ngaˇ dawˬ ngehˬ nya ni caw ba nehˬ laꞈ. Nawˬ-ahˇ ngaˇ ja ceuˬ ma.

Jaceuq 55:17

Uˬ shawˬ, nah gʼahˇ hawˇ-eu uˬ ciꞈ paw, ngaˇ nui ma cawˆ-eu dawˬ aˬ yawꞈ-ahˇ gaˬ leˇ ngeh, 2 ngaˬ-euˬ shaˇ dawˬ-ahˇ aˬ yawꞈ naˇ haˬ tehꞈ-a.

Jaceuq 55:22

Nawˬ-euˬ shaˬ zahˬ Sahˬpaˬ Miˬyehˇ jawˇ gaˇ taˬ-awˬ. Aˬ yawꞈ nawˬ-ahˇ haw piˇ tehꞈ-a. Yaw tsaˬ yaw dawˇ tsawˇ haˬ-ahˇ aˬ yawꞈ maˬ bi coˬ-iˇ-a.

Jaceuq 62:8

Ngaˬ-euˬ tsawˇ haˬ deuˬ-oˇ, Miˬyehˇ-ahˇ aˬ myah luꞈ gʼoe-awˬ. Naw maꞈ-euˬ shaˬ zahˬ dawˬ tawˆ luꞈ aˬ yawꞈ-ahˇ dzawˇ nehˬ-awˬ. Aˬ yawꞈ-aˬ, aˬ dui-euˬ gʼoe duˬ meh.

Dawqdaq 15:8

Tsawˇ muiˬ neh shaˇ-euˬ shaˇ dawˬ-ahˇ Sahˬpaˬ Miˬyehˇ nui kʼahˇ shiˇ-awˇ, tsawˇ doeˇ neh lawˇ-euˬ shehˇ-euˬ jeˬ-ahˇ aˬ yawꞈ bye-eu meh.

Dawqdaq 16:3

Yawˬ ha noeˬ taˬ-euˬ jeˬ Sahˬpaˬ Miˬyehˇ-ahˇ a nehˬ naˇ, yaw ha mˇ-euˬ jeˬ guiˬ lahˬ za-eu meh.

Dawˬ caˇ 2:14

Nawˇ-aˬ, lo guˇ maˇ byoe-ahˇ dzuˇ zaꞈ luꞈ-eu kʼaˬ kʼoeˬ-ahˇ duˇ nga. Gʼawˬ shaˬ gaˬ dui dui paˬ-ehˇ gʼeh-eu nawˬ-euˬ myaˆ pyawˬ ciˬ mawˇ le-awˇ, naˇ haˬ muiˬ-eu nawˬ-euˬ teˇ saˇ bi gaˬ le sheˇ.

Yeˬlaˬmiˇ 32:16

Deh yaˇ zeuˇ laꞈ mˇ-euˬ gaˇ kawˆ jahˇ tsehˆ-euˬ seuˬ gʼaˬ kʼoeˇ Baˬluˆ-ahˇ ngaˇ biꞈ gʼaˬ ngeh, heu loꞈ-ehˇ guiˬ lahˬ shaˇ-euˬ ma.

Yeˬlaˬmiˇ 33:3

“Ngaˬ-ahˇ kuˇ naˇ, ngaˇ oˬ toˬ nehˬ ma. Nawˇ tiˬ pawꞈ-iˬ maˬ siˬ nya-eu zahˬ dui dui leˇ paˬ-ehˇ gʼeh-eu gaˇ kawˆ deuˬ, nawˬ-ahˇ ngaˇ ehˇ nehˬ ma.

Daˬyeˬlaˇ 3:16

Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ heu loꞈ-ehˇ ehˇ-eu meh. “Sahˬ paˬ-oˇ, gaˇ kawˆ heu-ahˇ taꞈ leˇ-awˇ, nawˬ-ahˇ nga maꞈ dawˬ poˆ maˬ paˇ poˆ ma.

Daˬyeˬlaˇ 6:10

Zahˇ sahˇ kʼoꞈ kʼoeˇ hmˬ-ahˇ laꞈ ma dehˬ gʼaˬ-euˬ gaˇ kawˆ Daˬyeˬlaˇ ya siˬ ngeh, iˇ kahˇ gʼoꞈ-iˇ-euˬ meh. Aˬ yawꞈ-euˬ nymˇ kʼoeˇ taˆ tiˆ-ahˇ, Yeˬluˇsaˬlehˬ meuˬ paw pyawˇ-eu laˇ gʼoˆ zaˬ dahˇ-eu meh. Aˬ myah luꞈ aˬ yawꞈ kʼaˇ mˇ haw-euˬ loꞈ-ehˇ, laˇ gʼoˆ zaˬ pah taˬ-euˬ mehˬ shi pawˬ tsuiꞈ pawˬ dmˬ dmˬ-awˇ, tiˬ nah smˬ poˆ Miˬyehˇ-ahˇ uˬ duˬ tahˬ-euˬ meh.

Maꞈtehˬ 10:19

Aˬ cawˬ naw maꞈ-ahˇ yaˇ kʼaˬ bi daˇ-eu lehˇ a nehˬ ngeh, naw maꞈ dawˬ aˬ geu dawˬ ya ngehˬ-awˇ, aˬ joˆ-ehˇ ya ehˇ nehˬ-eu gaˇ kawˆ kʼahˬ taˬ lahˇ. Aˇ yamˬ tsaˬ laˇ ngeh, naw maꞈ ya ngehˬ-eu dawˬ deuˬ, naw maꞈ-ahˇ biꞈ nehˬ laꞈ tehꞈ-a.

Maꞈtehˬ 13:22

Aˬ gah gah yaˇ-ahˇ ga-iˇ-euˬ siˬ yoeˬ lehˇ ehˇ-eu-aˬ, dawˬ kʼoeˇ deuˬ-ahˇ ya gaˬ-euˬ kʼawꞈ, shiˬ shaˬ jiˇ gaˇ kawˆ kʼahˬ lahˇ-eu jeˬ hawˇ-eu, pyuˇ shuiˇ myawˬ gahˬ-ahˇ gaˬ-eu nui ma neh bi uˆ tehˬ-awˇ, aˇ siˬ maˬ siˬ le nya-eu tsawˇ haˬ deuˬ-ahˇ ehˇ mawꞈ-eu meh.

Maꞈtehˬ 6:34

Kʼoeˇ miˇ neh, ni shawˬ gʼaˇ duˬ iˬ nah kʼahˬ taˬ lahˇ. Ni shawˬ nah kʼahˬ lahˇ paˬ-ehˇ gʼeh-eu jeˬ, ni shawˬ nah tiˬ byah tiˬ loꞈ jaˆ luꞈ meh. Yawˬ nah na luꞈ, aˬ yawꞈ ngeh nah kʼahˬ lahˇ-eu jeˬ tiˬ loꞈ jaˆ meh.

Maꞈtehˬ 6:8

Aˬ yawꞈ maꞈ loꞈ-ehˇ taˬ gʼeh. Aˬ jeˬ miˇ neh ehˇ naˇ, naw maꞈ maˬ shaˇ mi naˆ-ehˇ, kʼaˇ loˬ-eu jeˬ naw maꞈ-euˬ Aˬda siˬ nya luꞈ meh.

Luˇkaꞈ 10:41

Ehˇ kʼawꞈ, Yeˬsuˇ ehˇ-eu, “Maˬta-oˇ, Maˬta-oˇ. Nawˇ-aˬ, gʼawˬ mya jeˬ tehˬ gʼa-awˇ kʼahˬ lahˇ luꞈ-eu nga.

Luˇkaꞈ 12:22

Kʼoeˇ naˇ, zaˬ lahˇ deuˬ-ahˇ Yeˬsuˇ ehˇ nehˬ-eu, “Kʼoeˇ miˇ neh, ngaˇ naw maꞈ-ahˇ heu loꞈ-ehˇ ehˇ-eu ma. Naw maꞈ yaw dehꞈ dehꞈ nya ni ya dzaˬ ya dawˇ-eu gʼaˇ duˬ hawˇ-eu, naw maꞈ-euˬ gʼawˇ mawˇ ya dm ya gʼaˬ-eu gʼaˇ duˬ kʼahˬ taˬ lahˇ.

Luˇkaꞈ 12:29

“Kʼoeˇ miˇ neh, dzaˬ dzaˬ dawˇ dawˇ gaˇ kawˆ tehꞈ-ehˇ shaˇ noeˬ shaˇ noeˬ-ehˇ nui maˬ shaˬ zahˬ taˬ mˇ.

Luˇkaꞈ 18:1

Zaˬ lahˇ deuˬ aˬ myah luꞈ guiˬ lahˬ shaˇ-awˇ, tiˬ jawˇ-iˬ nui ma maˬ ya cawˆ-eu gʼaˇ duˬ, Yeˬsuˇ yaw jeˬ ma jeˬ ja-awˇ, mehˬ nehˬ tsoˆ nehˬ-euˬ meh.

Luˇkaꞈ 18:7

Toˆ-ehˇ ngeuˇ naˇ, uˬ ciꞈ nah gʼahˇ maˬ ehˇ caw ba nehˬ laꞈ lehˇ shaˇ luꞈ-eu, Miˬyehˇ neh tseˇ doˆ-euˬ tsawˇ haˬ deuˬ-euˬ gʼaˇ duˬ, Miˬyehˇ yaˇ kʼaˬ maˬ daˇ nehˬ-aˇ loˇ. Aˬ yawꞈ nyi naˬ nyi naˬ-ehˇ jawˇ tehꞈ-a loˇ.

1 Gawˇliˬtu 7:21

Miˬyehˇ nawˬ-ahˇ kuˇ ngeh, nawˇ aˬ cawˬ-euˬ zaˬ kʼaˆ geuꞈ luꞈ te loˇ. Tiˬ jeˬ-iˬ maˬ ngeuˇ-aˇ. Ehˇ kʼawꞈ, nawˇ aˬ cawˬ-euˬ zaˬ kʼaˆ maˬ paˇ ya geuꞈ ni buˬ-iˇ-eu a kawˬ-aˬ za nya naˇ, muiˬ tehꞈ-a.

1 Gawˇliˬtu 7:32

Naw maꞈ-euˬ nui ma laꞈ kʼoeˇ kʼahˬ lahˇ-eu jeˬ maˬ bi ahˇ mawꞈ nya. Miˬ zaˬ maˬ baw-eu tsawˇ haˬ-aˬ, Sahˬpaˬ Miˬyehˇ-euˬ gaˇ-ahˇ kʼahˇ kʼoꞈ-eu nui ma ahˇ-eu meh. Aˬ jeˬ miˇ neh ehˇ naˇ, Sahˬpaˬ Miˬyehˇ nui kʼahˇ shiˇ-eu jeˬ-ahˇ aˬ yawꞈ mˇ mawꞈ-eu meh.

Eˇpeˇsu 5:20

A dui-euˬ Sahˬpaˬ Yeˬsuˇ Ka li-euˬ tsawˇ myahˇ laꞈ kʼoeˇ yawˬ jeˬ na luꞈ gʼaˇ duˬ Aˬda Miˬyehˇ-euˬ guiˬ lahˬ-ahˇ ja ceuˬ-awˬ.

Eˇpeˇsu 6:18

Miˬyehˇ caw ba laꞈ ni guiˬ lahˬ shaˇ-awˇ, kʼoeˇ deuˬ dawˬ tawˆ luꞈ-ahˇ mˇ gʼeh-awˬ. Yaw sahˇ Miˬyehˇ sheuˬ gʼeh-eu laꞈ kʼoeˇ aˬ myah luꞈ guiˬ lahˬ shaˇ-awˬ. Maˬ ya smˬ-iˇ ni aˬ myah luꞈ yaw beuˇ beuˇ-ehˇ jawˇ-awˬ. Miˬyehˇ-euˬ tsawˇ haˬ dawˬ tawˆ luꞈ gʼaˇ duˬ aˬ myah luꞈ guiˬ lahˬ shaˇ-awˬ.

Gawˇlawˇsehˇ 3:15

Ka li neh biꞈ-euˬ tsaˬ leˇ dzoeˇ leˇ-eu jeˬ kʼoeˇ-aˬ, naw maꞈ tiˬ jeˬ paˬ mˇ-eu lehˇ noeˬ tsehˆ ngeh naw maꞈ-ahˇ gaˇ ma sheuˬ mehˬ-eu gʼaˇ duˬ pyeuꞈ-eu meh. Aˬ jeˬ miˇ neh ehˇ naˇ, naw maꞈ kʼoeˇ loꞈ-ehˇ tsaˬ leˇ dzoeˇ leˇ-awˇ gʼawˇ mawˇ tiˬ mawˇ tehꞈ-ehˇ pyeuꞈ laˇ-eu gʼaˇ duˬ, Miˬyehˇ neh naw maꞈ-ahˇ kuˇ taˬ-euˬ meh. Naw maꞈ Miˬyehˇ-euˬ guiˬ lahˬ-ahˇ ngehˇ-eu maˬ tsaˬ-a.

Gawˇlawˇsehˇ 3:17

Naw maꞈ kʼaˇ mˇ kʼaˇ shaˇ kʼaˇ ngehˬ kʼaˇ tmˇ-eu jeˬ laꞈ kʼoeˇ, Sahˬ paˬ Yeˬsuˇ-euˬ tsawˇ myahˇ uˬ moˆ Aˬ da Miˬyehˇ-euˬ guiˬ lahˬ-ahˇ ja ceuˬ ja ceuˬ-ehˇ mˇ-awˬ.

Gawˇlawˇsehˇ 4:2

Aˬ myah luꞈ maˬ tsehˆ leˇ ni guiˬ lahˬ shaˇ-awˬ. Naw maꞈ guiˬ lahˬ shaˇ ngeh, Miˬyehˇ-euˬ guiˬ lahˬ-ahˇ ja ceuˬ ja ceuˬ-ehˇ, yaw beuˇ beuˇ-ehˇ shaˇ-awˬ.

1 Tiˆmoˇseˬ 2:1

Ngaˇ heu loꞈ-ehˇ jeˬ hu gʼaˬ biꞈ mawꞈ-eu ma. Tsawˇ haˬ dawˬ tawˆ luꞈ gʼaˇ duˬ, Miˬyehˇ-ahˇ loˬ-eu jeˬ shaˇ nehˬ-eu, guiˬ lahˬ shaˇ-eu, shaˇ ju-eu, aˬ yawꞈ-euˬ guiˬ lahˬ-ahˇ ja ceuˬ-eu, heu deuˬ-ahˇ mˇ-awˬ.

1 Tiˆmoˇseˬ 5:5

Ngehˬ gʼeh caw ba nehˬ-eu gʼaˬ maˬ baw ni yawˬ ha tiˬ gʼaˬ tehꞈ-ehˇ jawˇ-eu miˬ coeˬ miˬ ma-aˬ, Miˬyehˇ tiˬ gʼaˬ-ahˇ tehꞈ-ehˇ noeˬ tmˬ kʼaˇ za-awˇ, uˬ ciꞈ nah gʼahˇ maˬ ehˇ caw ba nehˬ laꞈ lehˇ guiˬ lahˬ shaˇ-eu meh.

1 Beˬtuˆluˆ 4:7

Yawˬ jeˬ na luꞈ laꞈ kʼoeˇ aˇ saˬ saˬ-eu aˇ yamˬ peh le-euˬ meh. Kʼoeˇ miˇ neh, naw maꞈ guiˬ lahˬ shaˇ nya-eu gʼaˇ duˬ yawˬ ha-euˬ nui ma-ahˇ gʼaˬ leˇ ni nyehꞈ tehˬ-awˇ, yaw beuˇ beuˇ-ehˇ dehꞈ-awˬ.

1 Beˬtuˆluˆ 5:7

Naw maꞈ noeˬ shaˬ noeˬ zahˬ-eu dawˬ tawˆ luꞈ Miˬyehˇ-ahˇ a nehˬ-awˬ. Aˬ jeˬ miˇ neh ehˇ naˇ, aˬ yawꞈ naw maꞈ-ahˇ ngehˬ gʼeh bo saˆ luꞈ-eu meh.

1 Saˬmeuˬlaˆ 1:15

Haˬnahˬ ehˇ-eu, “Aˬ bawˇ piˇ ma-oˇ, ngaˇ aˬ gaꞈ dzaˇ uiˇ yehꞈ-eu maˬ ngeuˇ. Nui ma cawˆ dui dui-eu miˇ neh, ngaˬ-euˬ nui ma laꞈ kʼoeˇ shaˬ zahˬ kʼaˇ mˇ luꞈ-eu jeˬ dawˬ tawˆ luꞈ, guiˬ lahˬ shaˇ-eu laꞈ kʼoeˇ Sahˬpaˬ Miˬyehˇ-ahˇ dzawˇ nehˬ luꞈ-eu ma.

1 Saˬmeuˬlaˆ 30:6

Kʼoeˇ ngeh jawˇ, Daˬbiˇ nui ma cawˆ dui dui-eu meh. Aˬ je ˬmiˇ neh ehˇ naˇ, aˬ yawꞈ maꞈ-euˬ miˬ sawˇ zaˬ deuˬ ya smˬ-iˇ jiˇ-euˬ baˬ da neh, aˬ yawꞈ-euˬ tsawˇ haˬ deuˬ nui ma naˇ dui dui-awˇ, aˬ yawꞈ-ahˇ kʼaˬ lo neh biˬ-eu lehˇ lmˬ luꞈ-eu meh. Ehˇ kʼawꞈ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ aˬ yawꞈ-ahˇ gʼaˬ biꞈ-euˬ meh.

1 Saˬmeuˬlaˆ 7:12

Kʼoeˇ naˇ, Saˬmeuˬlaˆ kʼaˬ lo tiˬ siˬ yuˇ-awˇ, Miˇzaˬpaˬ meuˬ hawˇ-eu Yeˬshaˬnahˬ meuˬ yaw kaˬ-ahˇ ka tuˇ-awˇ, “Sahˬpaˬ Miˬyehˇ iˬ nah keuˆ ni aˬ dui-ahˇ caw ba luꞈ meh” lehˇ ehˇ-awˇ, kʼaˬ lo kʼoeˇ siˬ-ahˇ Eˇbaˬneˬzaˬ lehˇ myahˇ nehˬ-euˬ meh.