Neˬhaˬmiˇ 9:35 - Akha

³⁵ Nawˬ-euˬ guiˬ lahˬ baˬ da neh aˬ yawꞈ maꞈ sahˬ paˬ baw laˇ-awˇ, aˬ cawˬ miˇ kʼahˬ-ahˇ jawˇ luꞈ ngeh muiˬ-eu miˇ tsaˬ aˬ yawꞈ maꞈ-ahˇ nawˇ biꞈ-euˬ kʼawꞈ, haiˬ-eu jeˬ-ahˇ aˬ yawꞈ maꞈ maˬ byehˇ-ehˇ, nawˇ nui ma tsaˬ-eu jeˬ maˬ mˇ-a.

Neˬhaˬmiˇ 9:35 Iomraidhean Croise

Neˬhaˬmiˇ 9:25

Ziꞈ-eu meuˬ deuˬ hawˇ-eu muiˬ-eu miˇ tsaˬ maˬ ehˇ, pyuˇ shuiˇ byah-eu nymˇ deuˬ hawˇ-eu duˬ gʼaˬ taˬ-euˬ lah duˬ maˬ ehˇ, Saˬloˬ aˇ bawˇ, aˇ siˬ aˇ bawˇ, aˬ gaꞈ yaˇ kmˇ maˬ ehˇ, nawˬ-euˬ tsawˇ jeuˬ deuˆ za-euˬ meh. Aˬ yawꞈ maꞈ kʼaˇ dzaˬ mawꞈ-eu jeˬ dzaˬ-awˇ tsuˇ laˇ-euˬ meh. Nawˬ neh biꞈ-euˬ muiˬ-eu guiˬ lahˬ deuˬ-ahˇ, aˬ yawꞈ maꞈ laˬ kʼaˬ cehˇ dui dui-euˬ meh.

Neˬhaˬmiˇ 9:34

Nga maꞈ-euˬ aˬ poeˬ aˬ bawˇ deuˬ, sahˬ paˬ deuˬ, aˬ yuiꞈ aˬ tsu deuˬ hawˇ-eu piˇ ma deuˬ, nawˬ-euˬ zahˇ dawˬ kʼoꞈ dawˬ mehˬ nah maˬ caw teh-a. Yahˇ-awˇ dehꞈ-eu gʼaˇ duˬ nawˬ neh mehˬ-euˬ dawˬ-ahˇ aˬ yawꞈ maꞈ maˬ naˇ haˬ geuꞈ-a.

Iˇsaˬyaˇ 63:7

Sahˬpaˬ Miˬyehˇ-euˬ gʼoeˇ-eu gaˬ-eu jeˬ, maˬ poˆ maˬ paˇ laˇ-eu gaˇ kawˆ ngaˇ ja gaˬ ma. Aˬ dui kʼoeˇ taˆ aˬ yawꞈ neh kʼaˇ mˇ taˬ-euˬ jeˬ gʼaˇ duˬ, aˬ yawꞈ-euˬ guiˬ lahˬ-ahˇ ngaˇ ja ceuˬ ma. Aˬ yawꞈ-euˬ gʼawˬ shaˬ gaˬ-eu jeˬ hawˇ-eu, maˬ tsehˆ leˇ nya-eu gʼoeˇ-eu gaˬ-eu jeˬ baˬ da, aˬ yawꞈ-euˬ Iˇsaˬleˬlaˆ tsawˇ jeuˬ-ahˇ, muiˬ-eu guiˬ lahˬ tiˬ byah biꞈ nehˬ-euˬ meh.

Yeˬlaˬmiˇ 5:19

Aˬ jeˬ miˇ neh aˬ yawꞈ maꞈ-ahˇ kʼoeˇ loꞈ-ehˇ jahˇ nehˬ laꞈ-euˬ gaˇ kawˆ naˇ haˬ laˇ naˇ, Yeˬlaˬmiˇ nawˇ heu loꞈ-ehˇ ehˇ kʼoꞈ nehˬ-awˬ. Aˬ yawꞈ maꞈ ngaˬ-ahˇ byehˇ dzeh-awˇ, yawˬ ha-euˬ miˇ kʼahˬ laꞈ kʼoeˇ boeˇ miˬ siˬ kʼaˬ deuˬ-euˬ miˬ yehˇ deuˬ-ahˇ uˬ duˬ tahˬ-euˬ loꞈ-ehˇ, aˬ cawˬ miˇ kʼahˬ laꞈ kʼoeˇ boeˇ miˬ siˬ kʼaˬ deuˬ-euˬ zaˬ kʼaˆ ya geuꞈ tehꞈ-a lehˇ ehˇ nehˬ-awˬ.”

Yeˬsaˬgeˬlaˇ 5:6

Ehˇ kʼawꞈ, Yeˬluˇsaˬlehˬ ngaˬ-euˬ zahˇ dawˬ kʼoꞈ dawˬ-ahˇ puiˬ-awˇ, aˬ cawˬ tsawˇ jeuˬ naˆ maˬ tseˇ haiˬ-awˇ aˬ yawꞈ-euˬ tiˬ jawˬ jaˆ-eu miˇ kʼahˬ deuˬ naˆ maˬ tseˇ naˬ bawˇ tuˇ-eu gaˇ kawˆ bi siˬ bi mawˇ laꞈ-euˬ meh. Ngaˬ-euˬ zahˇ dawˬ kʼoꞈ dawˬ-ahˇ aˬ yawꞈ byehˇ dzeh-awˇ, ngaˬ-euˬ zahˇ sahˇ kʼoꞈ-ahˇ aˬ yawꞈ maˬ caw teh-a.

Dawˬmehˬ 28:47

Yawˬ jeˬ na luꞈ laꞈ kʼoeˇ, Sahˬpaˬ Miˬyehˇ nawˬ-ahˇ guiˬ lahˬ biꞈ-euˬ meh. Ehˇ kʼawꞈ, aˬ yawꞈ-euˬ gaˇ-ahˇ nawˇ laˬ kʼaˬ tiˬ cehˇ maˬ mˇ-a.

Dawˬmehˬ 28:48

Kʼoeˇ miˇ neh, Sahˬpaˬ Miˬyehˇ neh nawˇ jawˇ gaˇ pyehˬ gʼeh leꞈ-euˬ muiˇ-eu deuˬ-ahˇ nawˇ gaˇ ya mˇ nehˬ tehꞈ-a. Nawˇ-aˬ, hawˬ hawˇ-eu iˇ cuꞈ ya dzahˬ-awˇ, mehˬ tsoeˬ maˬ ya dm-ehˇ neˇ nyawˆ ni ya jawˇ-eu uˬ taꞈ, maˬ loˬ-eu tiˬ jeˬ-iˬ maˬ baw ni ya dehꞈ tehꞈ-a. Nawˇ ya luˬ ya seˇ-iˇ ngeh keuˆ ni, Sahˬpaˬ Miˬyehˇ nawˬ-ahˇ yaw kʼaˆ kʼaˆ-ehˇ kʼehˬ nehˬ laꞈ tehꞈ-a.

Dawˬmehˬ 31:21

Kʼoeˇ ngeh, guˆ laˇ paˬ-ehˇ gʼeh-eu luˬ-iˇ seˇ-iˇ-eu gʼawˬ mya jeˬ, aˬ yawꞈ maꞈ kʼoeˇ taˆ keuˆ le tehꞈ-a. Ehˇ kʼawˬ, caˇ dawˬ heu bymˇ-ahˇ aˬ myah luꞈ ya caˇ-awˇ, caˇ dawˬ heu aˬ yawꞈ maꞈ gʼaˇ duˬ saˇ kiˇ pyeuꞈ tehꞈ-a. Aˬ yawꞈ maꞈ-ahˇ biꞈ ma lehˇ ngaˬ neh saˇ jaˇ dzaˬ taˬ-euˬ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˇ maˬ sheuˬ uˇ gʼeh mi naˆ-ehˇ kʼawꞈ, nymˬ-mˇ aˬ yawꞈ maꞈ-euˬ nui ma laꞈ kʼoeˇ aˬ joˆ-ehˇ noeˬ luꞈ-eu ngaˇ siˬ nya ma.”