Naˬhmˬ 2:13 - Akha

¹³ Dawˬ tawˆ kʼoeˇ taˆ Sahˬpaˬ Miˬyehˇ, Niˇnaˬbeˬ-ahˇ heu loˇ ehˇ meh. “Mahˬ laˆ lawˬ deuˬ ngaˇ keuˬ dzeh-awˇ, yehˇ deuˬ guiˇ bi deuˆ sehꞈ jiˇ ma. Aˬ cawˬ-ahˇ nawˬ neh ceh geuꞈ-euˬ, yawˬ jeˬ na luꞈ ngaˇ yuˇ kʼoꞈ ma. Miˇ tsaˬ kʼoeˇ taˆ nawˇ baoˬ huiˬ-euˬ, kʼawˇ taꞈ kʼawˇ teˇ maˬ paˇ doˆ meh.”

Naˬhmˬ 2:13 Iomraidhean Croise

2 Sahˬpaˬ 18:17

Aˬshuˇliˆ sahˬ paˬ kʼoeˇ gʼaˬ-aˬ, Yeˬluˇsaˬlehˬ meuˬ-ahˇ jawˇ-eu Heˬsaˬgiˇ-ahˇ guiˇ bi deuˆ-iˇ-eu gʼaˇ duˬ, myaˬ dui dui-eu guiˇ maꞈ tiˬ maꞈ Laˬkiˇshaˆ meuˬ-ahˇ neh pyehˬ gʼeh-euˬ meh. Aˬ yawꞈ-euˬ guiˇ maꞈ-ahˇ uˆ lahˇ-eu aˬ cawˬ naˆ maˬ tseˇ huiˬ dzehˬ-eu yaw huiˬ yaw mahˇ smˇ gʼaˬ-ahˇ aˬ yuiꞈ bi geuꞈ-awˇ, guiˇ maꞈ kʼoeˇ maꞈ-ahˇ bi sheuˬ gʼeh-euˬ meh. Yeˬluˇsaˬlehˬ meuˬ-ahˇ aˬ yawꞈ maꞈ le keuˆ ngeh, laꞈ taˆ paw jaˆ-eu lah-ahˇ neh meuˬ laꞈ kʼoeˇ iˇ pahˬ pahˬ ahˇ taˬ-euˬ dawˬ peh, saˬ nmˇ saˬ paˇ mˇ duˬ-ahˇ jaˆ-eu gaˇ ma-ahˇ guiˇ daˬ daˬ-euˬ meh.

2 Sahˬpaˬ 18:19

Aˬshuˇliˆ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ tiˬ gʼaˬ aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “ ‘Aˬ suˇ gʼaˬ-ahˇ noeˬ tmˬ-awˇ nawˇ teu naˆ naˆ-ehˇ nui ma huiˬ luꞈ te lehˇ, huiˬ-eu mahˇ-eu Aˬshuˇliˆ sahˬ paˬ ehˇ-eu meh’ lehˇ, sahˬ paˬ Heˬsaˬgiˇ-ahˇ ehˇ nehˬ-awˬ.

2 Sahˬpaˬ 19:23

Nawˬ-euˬ tsawˇ haˬ-ahˇ nawˇ pyehˬ gʼeh leꞈ-awˇ, nawˬ-euˬ mahˬ laˆ lawˬ deuˬ neh goˇ dui dui-eu Leˬbaˬnoˬ gawˬ jawˬ deuˬ-ahˇ deuˆ gʼaˬ-euˬ gaˇ kawˆ, ngaˬ-euˬ meh shi kʼahˬ sehˇ bi jehˆ le-euˬ meh. Kʼoeˇ gaˇ, goˇ dui dui-eu siˬ daˬ miˬ shuˬ aˇ bawˇ deuˬ hawˇ-eu, muiˬ dui dui-eu shuˬ liˇ aˇ bawˇ deuˬ nawˇ tuˇ dzeh-awˇ, zahˇ tsui ni gʼeh-eu aˇ bawˇ sahˬ kʼaˆ uˬ moˆ keuˆ ni le keuˆ-euˬ gaˇ kawˆ, nawˇ kʼahˬ sehˇ jehˆ luꞈ-eu meh.

2 Sahˬpaˬ 19:9

Suˬdaˬ sahˬ paˬ Tiˇlaˬkaˬ gʼaˬ, Iˇjiˇtuˆ guiˇ maꞈ maꞈ ma sheuˬ-awˇ, aˬ yawꞈ maꞈ-ahˇ guiˇ deuˆ-eu gʼaˇ duˬ laˇ luꞈ-eu gaˇ kawˆ, Aˬshuˇliˆ tsawˇ haˬ deuˬ ya gaˬ-euˬ meh. Gaˇ kawˆ kʼoeˇ Aˬshuˇliˆ sahˬ paˬ ya gaˬ ngeh, sahˬ paˬ Heˬsaˬgiˇ-ahˇ heu loꞈ-ehˇ sahˬ boꞈ boꞈ ahˇ nehˬ-euˬ meh.

2 Laˬsaˬbaˬ 32:19

Tsawˇ haˬ zaˬ-euˬ aˬ laꞈ neh tehˆ taˬ-euˬ tahˬ pahˬ aˬ ma mawˇ kawˇ pyeuꞈ-eu tsawˇ jeuˬ nui deuˬ-euˬ miˬ yehˇ deuˬ gaˇ kawˆ aˬ yawꞈ maꞈ ja gaˇ duˇ ni, Yeˬluˇsaˬlehˬ-euˬ Miˬyehˇ gaˇ kawˆ aˬ yawꞈ maꞈ ja-eu meh.

Jaceuq 46:9

Miˇ tsaˬ kʼoeˇ taˆ guiˇ kʼaˇ deuˆ gaˇ aˬ yawꞈ laˆ naˬ-eu meh. Kaˆ hawˇ-eu gahˬ-ahˇ aˬ yawꞈ ngawˬ kʼehꞈ ngawˬ kʼoeˆ-awˇ, dehˬ daˬ duˬ-ahˇ miˬ dzaˬ dzah dzeh-eu meh.

Yeˬlaˬmiˇ 21:13

Deh ga gʼahˇ ceh jaˆ-eu lo guˇ loꞈ-ehˇ, Yeˬluˇsaˬlehˬ meuˬ nawˇ deh kʼawꞈ kʼoeˇ taˆ, yaw goˇ-ahˇ nuiˇ luꞈ meh. Ehˇ kʼawꞈ, nawˬ-ahˇ ngaˇ guiˇ deuˆ ma. Nawˇ jawˇ gaˇ guiˇ maˬ deuˆ uˇ keuˆ laꞈ nya-aˇ lehˇ, nawˇ nui ma huiˬ-awˇ lmˬ luꞈ meh.

Yeˬlaˬmiˇ 46:14

“Iˇjiˇtuˆ miˇ kʼahˬ-ahˇ jaˆ-eu meuˬ deuˬ pyeuꞈ-eu, Miˇgaˬdawˇlaˆ, Meˬpiˇ hawˇ-eu, Taˬpaˬneˬ laꞈ kʼoeˇ, heu loꞈ-ehˇ ehˇ gaˬ-awˬ. ‘Yawˬ haˇ yawˬ ha deuˆ piˇ nya ni lehˬ hmˬ taˬ-awˬ. Naw maꞈ guiˇ deuˆ-awˇ ya shiˇ jiˇ tehꞈ-a.

Yeˬlaˬmiˇ 50:31

“Baˬbuˇloˬ miˇ kʼahˬ-oˇ, nawˇ-aˬ, nui ma huiˬ dui mahˇ dui dui-eu meh. Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu ngaˇ, Baoˬ huiˬ-eu Sahˬpaˬ Miˬyehˇ-aˬ, nawˬ-ahˇ muiˇ-eu ma. Ngaˇ nawˬ-ahˇ kʼehˬ nehˬ kʼaˆ nehˬ-eu aˇ nah keuˆ le-euˬ meh.

Yeˬlaˬmiˇ 51:25

Baˬbuˇloˬ -oˇ, nawˇ-aˬ, miˇ tsaˬ dawˬ tawˆ luꞈ-ahˇ laˆ cawˆ-euˬ gawˬ jawˬ-ahˇ duˇ-eu meh. Ehˇ kʼawꞈ, Sahˬpaˬ Miˬyehˇ pyeuꞈ-eu ngaˇ nawˬ-ahˇ muiˇ-eu ma. Ngaˇ nawˬ-ahˇ tsuˆ-awˇ, miˇ tsa tuˆ ni yaˆ di nehˬ-awˇ, kʼaˬ lehˇ tehꞈ-ehˇ bi jaˆ yaꞈ ma.

Yeˬsaˬgeˬlaˇ 13:8

Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ aˬ yawꞈ maꞈ-ahˇ heu loꞈ-ehˇ ehˇ-eu meh. “Naw maꞈ neh ngehˬ-euˬ dawˬ maˬ tsaˬ-ehˇ, naw maꞈ neh yaw sahˇ laꞈ kʼoeˇ ya siˬ ya mawˇ-euˬ jeˬ-aˬ, jaˬ myawꞈ myawꞈ-eu jeˬ pyeuꞈ-eu miˇ neh, naw maꞈ-ahˇ ngaˇ muiˇ-eu ma.

Yeˬsaˬgeˬlaˇ 21:3

Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ ehˇ nehˬ-awˬ. Naw maꞈ-ahˇ ngaˇ muiˇ-eu ma. Mi cehˇ gʼawˇ doˆ-awˇ, tsawˇ muiˬ tsawˇ doeˇ maˬ tseˇ ni naw maꞈ dawˬ tawˆ luꞈ-ahˇ sehꞈ ma.

Yeˬsaˬgeˬlaˇ 26:3

“Nymˬ-mˇ poˆ jawˇ-aˬ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Duˇlu meuˬ-oˇ, ngaˇ nawˬ-ahˇ muiˇ-eu ma. Tsawˇ jeuˬ gʼawˬ mya jeuˬ nawˬ-ahˇ guiˇ bi deuˆ le ma. Iˬ ma laˆ shaˆ iˇ luˆ dzeh-eu loꞈ-ehˇ aˬ yawꞈ maꞈ oe tehꞈ-a.

Yeˬsaˬgeˬlaˇ 28:22

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ ehˇ nehˬ-awˬ. Siˇdoˬ meuˬ-oˇ, nawˬ-ahˇ muiˇ ma. Ngaˬ-euˬ yaw shehꞈ kʼahˬ sehˇ huiˬ-eu, nawˬ-euˬ gʼahˇ ceh pah mehˬ le ma. Nawˬ-ahˇ ngaˇ kehˬ nehˬ kʼaˆ nehˬ-awˇ, ngaˇ muiˬ-eu shawˇ-eu bi mawˇ ngeh, Ngaˇ Sahˬpaˬ Miˬyehˇ ngeuˇ ngaˇ lehˇ, aˬ cawˬ siˬ duˬ mawˇ duˬ tehꞈ-a.

Yeˬsaˬgeˬlaˇ 29:10

Nawˇ hawˇ-eu nawˬ-euˬ Niˬlaˇ lawˇ baˬ-ahˇ ngaˇ muiˇ-eu ma. Laꞈ taˆ paw Miˇgaˬdawˇlaˆ meuˬ-ahˇ neh, laꞈ oˆ paw Aˬsaˬgʼawˬ meuˬ-ahˇ keuˆ ni, Suˬdaˬ miˇ kaˬ-ahˇ iˇ-eu gaˇ ma doˆ coˆ-ehˇ, Iˇjiˇtuˆ miˇ kʼahˬ kʼahˬ lah ni bi cawˆ-iˇ ma.

Yeˬsaˬgeˬlaˇ 29:3

Iˇjiˇtuˆ sahˬ paˬ-ahˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-awˬ. “Niˬlaˇ lawˇ baˬ nawˬ neh beh-awˇ, nawˬ-euˬ lawˇ baˬ ma lehˇ ehˇ-eu, Lawˇ baˬ gʼahˇ ceh yuꞈ-eu byaˆ yahˬ, Iˇjiˇtuˆ miˇ kʼahˬ sahˬ paˬ-oˇ, nawˬ-ahˇ ngaˇ muiˇ-eu ma.

Yeˬsaˬgeˬlaˇ 35:3

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-awˬ. Eˬdoˬ gawˬ jawˬ deuˬ-oˇ, nawˬ-ahˇ ngaˇ muiˇ-eu ma. Nawˬ-ahˇ ngaˇ laˆ cawˆ-awˇ, ciˬ cuˇ ni bi jaˆ ma.

Yeˬsaˬgeˬlaˇ 38:3

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, aˬ yawꞈ-ahˇ muiˇ-eu ma lehˇ ehˇ nehˬ-awˬ.

Yeˬsaˬgeˬlaˇ 39:1

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “ Tsawˇ haˬ zaˬ-oˇ, Meˬshehˆ miˇ kʼahˬ hawˇ-eu Tuˇbaˬlaˇ miˇ kʼahˬ laꞈ kʼoeˇ, sahˬpaˬ dawˬ tawˆ kʼoeˇ taˆ huiˬ dzehˬ-eu sahˬpaˬ pyeuꞈ-eu Gawˇgaˆ-ahˇ deuˬ leˇ ni dawˬ ngehˬ-awˇ, ngaˇ aˬ yawꞈ-ahˇ muiˇ-eu meh lehˇ ehˇ nehˬ-awˬ.

Yeˬsaˬgeˬlaˇ 5:8

Kʼoeˇ miˇ neh, ngaˇ nawˬ-ahˇ muiˇ-eu ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma. Tsawˇ jeuˬ dawˬ tawˆ luꞈ mehˬ shi, nawˬ-ahˇ ngaˇ yaˇ kʼaˬ daˇ ma.

Naˬhmˬ 2:12

Bawˇ tsahˬ jeˬ zaˬ-ahˇ kawꞈ sehꞈ-awˇ, shaˬ jiˇ cehˬ paˆ cehˬ shaˆ doˆ-awˇ, miˬ sawˇ zaˬ deuˬ bi dzaˬ-euˬ meh. Aˬ yawꞈ-euˬ lo kʼahˬ tiˬ byah ni, shaˬ jiˇ shaˬ jehꞈ sha byah-euˬ meh.

Naˬhmˬ 3:1

Tahˇ joe joe-awˇ smˇ muiˬ muiˬ-euˬ, mehˇ shuiˇ shuiˇ-awˇ tsawˇ haˬ sehꞈ-euˬ, meuˬ heu meuˬ guiˬ lahˬ doeˇ tehꞈ-a.

Naˬhmˬ 3:12

Nawˬ-euˬ taˆ yaw ziꞈ dawˬ tawˆ luꞈ, aˇ siˬ awꞈ laˇ yaˇ laˇ jiˇ-euˬ, siˬ guˬ aˇ bawˇ tiˬ bawˇ loꞈ-ehˇ, kʼaˬ meh mˇ nga-awˇ ngawˬ zuˆ ngeh, kʼaˬ meh-ahˇ ga ahˇ jiˇ tehꞈ-a.

Naˬhmˬ 3:15

Nawˇ aˇ naˆ ni teuˆ dui dui kʼawꞈ, miˬ dzaˬ neh maˬ bi puiˆ sehꞈ naˇ, guiˇ deuˆ gaˇ bi deuˆ sehꞈ tehꞈ-a. Nyehˇ bahˇ sahˬ lahˬ teuꞈ-eu loꞈ-ehˇ, nawˬ-ahˇ teuꞈ cuˬ byoˆ jiˇ tehꞈ-a. Nyehˇ bahˇ loꞈ-ehˇ nawˇ behˇ laˇ-awˇ,

Naˬhmˬ 3:5

Dawˬ tawˆ kʼoeˇ taˆ Sahˬpaˬ Miˬyehˇ, Niˇnaˬbeˬ-ahˇ heu loˇ ehˇ meh. “Niˇnaˬbeˬ meuˬ-ahˇ ngaˇ kʼehˬ ma. Miˇ tsaˬ tsawˇ jeuˬ dawˬ tawˆ mehˬ shi, nawˬ-ahˇ ngaˇ mehˬ tsoeˬ lehˆ dzeh-awˇ, neˇ myawˆ ni bi shaꞈ dawˇ sehꞈ ma.

Yawˇshuˆ 11:6

Yawˇshuˆ-ahˇ Sahˬpaˬ Miˬyehˇ ehˇ-eu, “Aˬ yawꞈ maꞈ-ahˇ taˬ guˆ. Ni shawˬ nah heu yamˬ-ahˇ, Iˇsaˬleˬlaˆ tsawˇ jeuˬ gʼaˇ duˬ, aˬ yawꞈ maꞈ dawˬ tawˆ luꞈ-ahˇ ngaˇ sehꞈ ma. Naw maꞈ aˬ yawꞈ maꞈ-euˬ mahˬ deuˬ-ahˇ kuiˇ guˬ yuˇ-awˇ, aˬ yawꞈ maꞈ-euˬ mahˬ laˆ lawˬ deuˬ-ahˇ miˬ dzaˬ ya keuˬ dzeh meh.”

Yawˇshuˆ 11:9

Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, tsawˇ haˬ kʼoeˇ deuˬ-ahˇ Yawˇshuˆ jahˇ nehˬ-euˬ meh. Aˬ yawꞈ maꞈ-euˬ mahˬ deuˬ-ahˇ kuiˇ guˬ yuˇ-awˇ, aˬ yawꞈ maꞈ-euˬ mahˬ laˆ lawˬ deuˬ-ahˇ miˬ dzaˬ keuˬ puiˆ dzeh-euˬ meh.