Daˬyeˬlaˇ 7:15 - Akha

¹⁵ Ngaˬ neh yaw sahˇ laꞈ kʼoeˇ ya mawˇ-euˬ jeˬ-ahˇ ngaˇ tsawˬ guˆ-iˇ-awˇ, nui ma maˬ saˇ ni pyeuꞈ-iˇ-euˬ ma.

Daˬyeˬlaˇ 7:15 Iomraidhean Croise

Aˇ dahˬ 41:8

Uˬ bya bya laˇ ngeh, sahˬ paˬ noeˬ shaˬ dui dui-eu miˇ neh, Iˇjiˇtuˆ miˇ kʼahˬ laꞈ kʼoeˇ kʼaˇ jawˇ-eu nyiˇ paˬ shaˆ ma deuˬ hawˇ-eu, zaˬ siˬ tsawˇ gahˇ ahˇ-eu tsawˇ haˬ deuˬ-ahˇ bi kuˇ uiˬ-euˬ meh. Aˬ yawꞈ neh yuꞈ maˆ maˆ mawˇ-euˬ gaˇ kawˆ kʼoeˇ aˬ yawꞈ maꞈ-ahˇ dzawˇ mehˬ nehˬ kʼawꞈ, tiˬ gʼaˬ-iˬ dawˬ tsuiꞈ maˬ yuˇ doˆ nehˬ nya-a.

Yeˬlaˬmiˇ 17:16

Ehˇ kʼawꞈ ni Sahˬpaˬ Miˬyehˇ-oˇ, aˬ yawꞈ maꞈ kʼoeˇ taˆ shaˬ zahˬ bi keuˆ le-awˬ lehˇ nawˬ-ahˇ ngaˇ maˬ shaˇ-aˬ. Aˬ yawꞈ maꞈ-ahˇ shaˬ zahˬ laˆ naꞈ nehˬ mawꞈ-eu nui ma ngaˬ-euˬ laꞈ kʼoeˇ maˬ ahˇ-eu nawˇ siˬ nya meh. Ngaˬ neh kʼaˇ ngehˬ kʼaˇ tmˇ-euˬ jeˬ dawˬ tawˆ luꞈ nawˇ siˬ nya jiˇ meh.

Daˬyeˬlaˇ 10:16

Kʼoeˇ ngeh, tsawˇ haˬ zaˬ-ahˇ duˇ leˇ-eu mˬ taˆ gʼaˬ kʼehˇ kʼoeˇ gʼaˬ, aˬ laꞈ cawˬ ja leꞈ-awˇ, ngaˬ-euˬ mehˬ luꞈ-ahˇ toeˬ ciˆ-euˬ meh. Kʼoeˇ naˇ, ngaˬ-euˬ kʼaˬ meh mˇ nga-awˇ dawˬ ngehˬ dahˬ beh-awˇ, aˬ yawꞈ-ahˇ heu loꞈ-ehˇ ehˇ nehˬ-euˬ ma. “Yaw huiˬ yaw mahˇ gʼaˬ-oˇ, yaw sahˇ laꞈ kʼoeˇ ya siˬ ya mawˇ-euˬ heu ngaˬ-ahˇ gʼaˬ baˬ dui dui-iˇ-awˇ, yaw dzuˬ dzuˬ-eu maˬ naˬ leˇ nya.

Daˬyeˬlaˇ 2:1

Neˬbuˬkaˬneˬzaˬ-aˬ, aˬ yawꞈ sahˬ paˬ geuꞈ-awˇ uˆ lahˇ-euˬ nyiˬ kʼoꞈ tiˬ kʼoꞈ-ahˇ, yuꞈ maˆ maˆ mawˇ-euˬ meh. Yuꞈ maˆ kʼoeˇ baˬ da neh aˬ yawꞈ noeˬ shaˬ dui dui-awˇ, maˬ yuꞈ kʼaˆ leˇ-a.

Daˬyeˬlaˇ 2:3

“Ngaˬ neh yuꞈ maˆ maˆ mawˇ-euˬ gaˇ kawˆ ngaˇ noeˬ shaˬ dui dui-awˇ, dawˬ tsuiꞈ siˬ nya mawꞈ nya” lehˇ aˬ yawꞈ maꞈ-ahˇ sahˬ paˬ ehˇ nehˬ-euˬ meh.

Daˬyeˬlaˇ 4:19

Kʼoeˇ loꞈ-ehˇ ehˇ gaˇ ya gaˬ ngeh, Beˬteˬshaˬzaˬ lehˇ kʼawꞈ kuˇ-eu Daˬyeˬlaˇ ya gaˬ ngeh, tsawˬ guˆ-iˇ-awˇ, dawˬ maˬ ngehˬ ni tiˬ kʼehˬ tsoˆ leˇ-euˬ meh. “Beˬteˬshaˬzaˬ-oˇ, yuꞈ maˆ heu-euˬ gaˇ kawˆ-ahˇ nawˇ taˬ tsawˬ guˆ-iˇ” lehˇ, sahˬ paˬ ehˇ-eu meh. Beˬteˬshaˬzaˬ ehˇ-eu, “Sahˬ paˬ-oˇ, ngaˬ-euˬ nui ma laꞈ kʼoeˇ, yuꞈ maˆ hawˇ-eu yuꞈ maˆ-euˬ dawˬ tsuiꞈ heu nawˬ-ahˇ ehˇ mawꞈ-eu jeˬ maˬ ngeuˇ-ehˇ, nawˬ-ahˇ muiˇ-eu deuˬ-ahˇ ehˇ mawꞈ-eu jeˬ pyeuꞈ law nmˇ duˇ nya.

Daˬyeˬlaˇ 4:5

Ehˇ kʼawꞈ, ngaˇ yuꞈ kʼaˆ luꞈ ngeh, guˆ laˇ paˬ-ehˇ gʼeh-eu yuꞈ maˆ maˆ-awˇ, guˆ dui dui laˇ paˬ-ehˇ gʼeh-eu jeˬ ya mawˇ-euˬ ma.

Daˬyeˬlaˇ 7:1

Beˬlaˇshaˬzaˬ sahˬ paˬ geuꞈ-awˇ Baˬbuˇloˬ miˇ kʼahˬ-ahˇ uˆ lahˇ-euˬ yaw beh kʼoꞈ-ahˇ, Daˬyeˬlaˇ yuꞈ maˆ maˆ-awˇ aˬ yawꞈ yuꞈ kʼaˆ luꞈ ngeh yaw sahˇ laꞈ kʼoeˇ heu loꞈ-ehˇ ya mawˇ-euˬ meh. Aˬ yawꞈ neh yuꞈ maˆ maˆ mawˇ-euˬ gaˇ kawˆ, Daˬyeˬlaˇ heu loꞈ-ehˇ boꞈ doˆ taˬ-euˬ meh.

Daˬyeˬlaˇ 7:28

Gaˇ kawˆ heu hmˬ heu gaˇ jiˇ-euˬ meh. Ngaˇ guˆ dui dui-iˇ-euˬ miˇ neh, myaˆ pyawˬ pyuˇ pya ni pyeuꞈ-iˇ-awˇ, aˬ cawˬ-ahˇ maˬ ja nehˬ ni nui ma laꞈ kʼoeˇ juiˇ taˬ-euˬ ma.

Daˬyeˬlaˇ 8:2

Yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, Eˇlamˬ miˇ kʼahˬ-ahˇ jaˆ-eu Suˇsaˬ meuˬ-ahˇ ngaˇ jawˇ luꞈ gaˇ ya mawˇ-euˬ ma. Kʼoeˇ gaˇ, Uˇlehˇ lawˇ baˬ dawˬ peh ngaˇ yawꞈ luꞈ-eu ma.

Daˬyeˬlaˇ 8:27

Ngaˇ Daˬyeˬlaˇ nui ma gʼaˬ baˬ dui dui-iˇ-awˇ, gʼawˬ mya nah jawˇ saˇ maˬ doˆ ni jawˇ-euˬ ma. Kʼoeˇ naˇ, ngaˇ paˇ tuˇ laˇ-awˇ, sahˬ paˬ-euˬ gaˇ paˇ mˇ daˆ leꞈ-euˬ ma. Ehˇ kʼawꞈ, ngaˬ neh yaw sahˇ laꞈ kʼoeˇ ya siˬ ya mawˇ-euˬ jeˬ-ahˇ noeˬ-eu nui ma maˬ byoˆ-iˇ-ehˇ, gaˇ kawˆ kʼoeˇ maˬ noeˬ shaw nya ni jawˇ-euˬ ma.”

Haˬbaˬkuˆ 3:16

Gaˇ kawˆ kʼoeˇ ngaˇ ya gaˬ gʼaˬ ngeh, gʼawˇ mawˇ mawˇ lah yaw dzuˬ dzuˬ-awˇ, mehˬ luˬ mehˬ ma shaˬ dehꞈ dehꞈ nya. Shaˬ yoeˬ shaˬ laꞈ peuˬ-iˇ jiˇ-awˇ, kuiˇ toꞈ yaˇ laˇ jiˇ-euˬ miˇ-a. Ngaˬ-ahˇ guiˇ deuˆ le-eu deuˬ-ahˇ, Miˬyehˇ kʼehˬ nehˬ-eu aˇ nah-ahˇ, ciˬ cuˇ ni ngaˇ dawˬ luꞈ-eu ma.

2 Beˬtuˆluˆ 1:14

Aˬ dui-euˬ Sahˬpaˬ Yeˬsuˇ Ka li neh ngaˬ-ahˇ bya cehˆ ni ehˇ nehˬ laꞈ-euˬ loꞈ-ehˇ, buꞈ-iˇ cehˇ-iˇ nya-eu ngaˬ-euˬ shiˬ shaˬ jiˇ gʼawˇ mawˇ heu-ahˇ gʼawˬ myahˇ maˬ gʼeh-ehˇ ya lehˆ dzeh yaꞈ meh lehˇ ngaˇ siˬ nya ma.