Daˬyeˬlaˇ 4:1 - Akha

¹ Miˇ tsaˬ kʼoeˇ taˆ kʼaˇ jawˇ-eu miˇ kʼahˬ dawˬ tawˆ luꞈ hawˇ-eu tsawˇ jeuˬ dawˬ tawˆ luꞈ-ahˇ, sahˬ paˬ Neˬbuˬkaˬneˬzaˬ heu loꞈ-ehˇ dawˬ tsaꞈ tsaꞈ ahˇ gʼeh-euˬ meh. “Naw maꞈ dawˬ tawˆ luꞈ nui saˇ oꞈ luꞈ-uˇ.

Daˬyeˬlaˇ 4:1 Iomraidhean Croise

1 Laˬsaˬbaˬ 12:18

Aˬ yawꞈ maꞈ laꞈ kʼoeˇ, aˇ nah tsawˇ myahˇ doˆ-eu yehˇ smˬ tseˇ gʼaˬ kʼoeˇ taˆ aˬ yuiꞈ geuꞈ-eu gʼaˬ pyeuꞈ laˇ-euˬ Aˬmaˬsehˇ kʼoeˇ taˆ, Miˬyehˇ-euˬ yaw sahˇ uˆ lahˇ le-awˇ, “Yeˬshehˇ-euˬ aˬ li Daˬbiˇ-oˇ, nga maꞈ nawˬ-euˬ tsawˇ haˬ pyeuꞈ-eu ma. Nawˇ hawˇ-eu nawˬ-ahˇ caw jaw-eu deuˬ gʼaˬ leˇ-eu guiˬ lahˬ za luꞈ-uˇ. Miˬyehˇ nawˬ nehˬ-ehˇ jawˇ meh” lehˇ ehˇ-eu meh. Kʼoeˇ naˇ, aˬ yawꞈ maꞈ-ahˇ Daˬbiˇ ha geuꞈ-awˇ, aˬ yawꞈ-euˬ guiˇ maꞈ kʼoeˇ taˆ uˆ lahˇ-eu aˬ yuiꞈ deuˬ bi geuꞈ-euˬ meh.

Eˇzaˬlaˬ 4:17

Sahˬ paˬ Daˬliˇ gʼaˬ heu loꞈ-ehˇ paˇ boꞈ kʼoꞈ nehˬ-euˬ meh. “Yuˇdaˆ miˇ kʼahˬ-ahˇ uˆ lahˇ-eu gʼaˬ pyeuꞈ-eu Leˬhamˬ, jaˇ laˇ yuˇ-eu paw aˬ yuiꞈ geuꞈ-eu Shmˇshehˆ hawˇ-eu, Saˬmaˬliˆ meuˬ hawˇ-eu Uˇpaˬlaˇ lawˇ baˬ nahˇ ma ga kʼehˬ paw miˇ kʼahˬ-ahˇ jawˇ-eu naw nyaꞈ-euˬ cawˬ deuˬ-ahˇ ngaˇ sahˬ boꞈ boꞈ ahˇ laꞈ-eu ma. Naw maꞈ dawˬ tawˆ luꞈ yaw muiˬ jawˇ saˇ doˆ luꞈ-uˇ.

Eˇzaˬlaˬ 5:7

“Sahˬ paˬ Daˬliˇ-oˇ, nawˇ miˇ kʼahˬ-ahˇ coꞈ ngehˇ ni ya uˆ lahˇ luꞈ-uˇ.

Iˇsaˬtaˆ 3:12

Kʼoeˇ naˇ, ba la yaw beh siˬ tseˇ smˬ nah-ahˇ, sahˬ paˬ-euˬ sahˬ boꞈ boꞈ-eu tsawˇ haˬ deuˬ-ahˇ Haˬmaˬ kuˇ uiˬ-awˇ, aˬ yawꞈ neh kʼaˇ ehˇ-euˬ loꞈ-ehˇ bi boꞈ-awˇ, miˇ kʼahˬ kʼoeˇ kʼahˬ laꞈ kʼoeˇ kʼaˇ ngehˬ luꞈ-eu tsawˇ jeuˬ aˬ yawꞈ jeuˬ yawꞈ-euˬ dawˬ-ahˇ neh paˇ bi boꞈ doˆ jiˇ-awˇ, miˇ kʼahˬ-ahˇ uˆ lahˇ-eu deuˬ hawˇ-eu yaw huiˬ yaw mahˇ dawˬ tawˆ luꞈ-ahˇ bi biꞈ ha doe-iˇ-euˬ meh. Sahˬ boꞈ kʼoeˇ-ahˇ sahˬ paˬ Dzeuˬsehˆ-euˬ tsawˇ myahˇ zmˬ-awˇ boꞈ-eu laꞈ kʼoeˇ, sahˬ paˬ-euˬ laꞈ behˬ neh jmˬ diˬ taˬ-euˬ meh.

Iˇsaˬtaˆ 8:9

Ba la smˇ siˬ tiˬ siˬ pyeuꞈ-eu Siˬbaˬ ba la nyiˬ tseˇ smˬ nah-ahˇ heu loꞈ-ehˇ jahˇ-euˬ meh. Sahˬ paˬ-euˬ sahˬ boꞈ boꞈ-eu tsawˇ haˬ deuˬ-ahˇ Mawˬdaˬkehˇ kuˇ uiˬ-awˇ, Gaˬlaˬnaˆ miˇ kʼahˬ-ahˇ neh Suˬdaˬ miˇ kʼahˬ-ahˇ keuˆ ni jaˆ-eu miˇ kʼahˬ tiˬ yaˇ nyiˬ tseˇ shiꞈ kʼahˬ laꞈ kʼoeˇ kʼaˇ jawˇ-eu Yuˇdaˆ tsawˇ haˬ deuˬ hawˇ-eu, miˇ kʼahˬ-ahˇ uˆ lahˇ-eu sahˬ paˬ sahˬ ma deuˬ hawˇ-eu yaw huiˬ yaw mahˇ dawˬ tawˆ luꞈ jawˇ gaˇ, aˬ yawꞈ neh kʼaˇ ehˇ-euˬ dawˬ deuˬ bi boꞈ ahˇ gʼeh-euˬ meh. Miˇ kʼahˬ aˬ yawꞈ kʼahˬ yawꞈ laꞈ kʼoeˇ kʼaˇ zmˬ luꞈ-eu dawˬ-ahˇ neh bi boꞈ-awˇ, Yuˇdaˆ tsawˇ haˬ deuˬ-ahˇ Yuˇdaˆ sahˬ boꞈ boꞈ ahˇ nehˬ-euˬ meh.

Daˬyeˬlaˇ 3:29

“Nymˬ-mˇ ngaˇ heu loꞈ-ehˇ dawˬ biꞈ-eu ma. Miˇ kʼahˬ aˬ geu kʼahˬ-ahˇ jawˇ-eu tsawˇ jeuˬ aˬ geu jeuˬ maˬ kaˬ, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-euˬ Miˬyehˇ-ahˇ yaw zeu maˬ baw-eu dawˬ ngehˬ naˇ, gʼawˇ mawˇ deuˆ tm deuˆ tmˇ-awˇ, nymˇ deh pyaˆ nehˬ gaˇ bi daˬ ma. Aˬ jeˬ miˇ neh ehˇ naˇ, heu loꞈ-ehˇ ka kʼoꞈ nehˬ nya-eu miˬ yehˇ nui gʼaˬ maˬ jawˇ-a.”

Daˬyeˬlaˇ 3:4

Kʼoeˇ ngeh, dawˬ tsaꞈ dawˬ dzawˇ mˇ-eu gʼaˬ yaw kʼaˆ-ehˇ guˇ-awˇ, “Miˇ kʼahˬ gʼawˬ mya kʼahˬ hawˇ-eu, tsawˇ jeuˬ gʼawˬ mya jeuˬ laꞈ kʼoeˇ neh uiˬ laˇ bymˇ laˇ taˬ-euˬ tsawˇ haˬ deuˬ-oˇ,

Daˬyeˬlaˇ 6:25

Kʼoeˇ naˇ, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ tsawˇ ca dawˬ tawˆ luꞈ hawˇ-eu, miˇ kʼahˬ dawˬ tawˆ luꞈ-ahˇ, sahˬ paˬ Daˬliˇ heu loꞈ-ehˇ sahˬ boꞈ boꞈ nehˬ-euˬ meh. “Naw maꞈ dawˬ tawˆ luꞈ nui saˇ oꞈ-awˇ jawˇ saˇ doˆ luꞈ-uˇ.

Daˬyeˬlaˇ 6:27

Aˬ yawꞈ ka kʼoꞈ-eu gʼaˬ pyeuꞈ-awˇ, ngehˬ gʼeh dah teˬ nehˬ-eu gʼaˬ meh. Mˬ hawˇ-eu miˇ tsaˬ heu kʼoeˇ taˆ, zahˬ leˇ-eu jeˬ mˇ-eu gʼaˬ meh. Aˇ laˬ jaˬ shiˇ maˬ bi kawꞈ ni, Daˬyeˬlaˇ-ahˇ ka kʼoꞈ-euˬ meh.”

Daˬyeˬlaˇ 7:14

Miˇ tsaˬ tsawˇ jeuˬ tsawˇ ca dawˬ tawˆ luꞈ hawˇ-eu, miˇ kʼahˬ dawˬ tawˆ luꞈ aˬ yawꞈ-euˬ laꞈ oˆ bi jawˇ-eu gʼaˇ duˬ, uˆ lahˇ-eu baoˬ hawˇ-eu miˇ kʼahˬ dawˬ tawˆ luꞈ maˬ ehˇ, taˬ huiˬ taˬ mahˇ-eu jeˬ hawˇ-eu yaw shehꞈ kʼahˬ sehˇ dawˬ tawˆ luꞈ maˬ ehˇ, aˬ yawꞈ-ahˇ biꞈ-euˬ meh. Aˬ yawꞈ uˆ lahˇ-eu jeˬ mˬ maˬ maˬ byaˆ zaˇ ziˇ ziꞈ-awˇ, aˬ yawꞈ-euˬ miˇ kʼahˬ tiˬ jawˇ-iˬ maˬ cawˆ-iˇ-a.

Zaˬkaˬliˇ 8:23

Aˇ nah aˇ yamˬ kʼoeˇ keuˆ le ngeh, Yuˇdaˆ tsawˇ haˬ tiˬ gʼaˬ jawˇ gaˇ aˬ cawˬ tsawˇ jeuˬ tseˇ gʼaˬ laˇ-awˇ, ‘Miˬyehˇ nawˬ nehˬ-ehˇ jawˇ meh lehˇ nga maꞈ ya gaˬ-euˬ miˇ neh, nga maꞈ-ahˇ nawˬ nehˬ-ehˇ bi taꞈ laꞈ-awˬ’ lehˇ ehˇ tehꞈ-a.”

Gʼaˬkʼehˇ 2:6

Teˇ saˇ kʼoeˇ ya gaˬ ngeh, tsawˇ haˬ kʼoeˇ deuˬ baˬ maꞈ puˇ jeˬ-ehˇ uiˬ le bymˇ le-euˬ meh. Jah-eu tsawˇ haˬ kʼoeˇ deuˬ ngehˬ luꞈ-eu dawˬ kʼoeˇ, aˬ yawꞈ maꞈ yawˬ gʼaˬ na luꞈ-ahˇ yawˬ ha tsawˇ jeuˬ-euˬ dawˬ loꞈ-ehˇ gaˬ le-eu miˇ neh, aˬ yawꞈ maꞈ zahˬ leˇ-euˬ meh.

Lormav 1:7

Kʼoeˇ miˇ neh, Miˬyehˇ-euˬ tsawˇ haˬ bi pyeuꞈ laˇ-eu lehˇ kuˇ doˆ taˬ-euˬ, aˬ yawꞈ gaˬ-eu naw maꞈ Loˇmaˆ meuˬ-ahˇ kʼaˇ jawˇ-eu tsawˇ haˬ deuˬ-ahˇ, ngaˇ sahˬ boꞈ boꞈ ahˇ laꞈ-euˬ ma. Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka liˬeuˬ guiˬ lahˬ yaw dzahˇ hawˇ-eu nui saˇ oꞈ-eu jeˬ, naw maꞈ kʼoeˇ taˆ keuˆ le luꞈ-uˇ.

Eˇpeˇsu 1:2

Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ oꞈ-eu jeˬ, naw maꞈ kʼoeˇ taˆ keuˆ le luꞈ-uˇ.

1 Tiˆmoˇseˬ 1:2

Jah-eu jeˬ laꞈ kʼoeˇ maˇ maˇ ni ngaˬ li-ahˇ duˇ-eu Tiˆmoˇseˬ jawˇ gaˇ sahˬ boꞈ boꞈ ahˇ laꞈ-eu ma. Aˬ da Miˬyehˇ hawˇ-eu aˬ dui-euˬ Sahˬpaˬ Yeˬsuˇ Ka li-euˬ guiˬ lahˬ yaw dzahˇ maˬ ehˇ, gʼawˬ shaˬ gaˬ-eu jeˬ maˬ ehˇ, nui saˇ oꞈ-eu jeˬ maˬ ehˇ, nawˬ-euˬ kʼoeˇ taˆ jaˆ luꞈ-uˇ.

1 Beˬtuˆluˆ 1:2

Yeˬsuˇ Ka li-euˬ dawˬ-ahˇ naˇ haˬ geuꞈ-awˇ aˬ yawꞈ-euˬ shiˬ neh bi mˇ shawˇ-eu gʼaˇ duˬ, Aˬda Miˬyehˇ neh lehˬ hmˬ taˬ-euˬ jaˆ-eu loꞈ-ehˇ naw maꞈ-ahˇ tseˇ doˆ-awˇ, Yaw sahˇ Miˬyehˇ-ahˇ gʼoe-eu laꞈ kʼoeˇ muiˬ-eu shawˇ-eu tsawˇ haˬ bi pyeuꞈ laˇ-euˬ meh.