Matthew 8:12 - Angkentye Mwerre

¹² Kele Jew arrpenhe areye itnekenge apurte anetyeke arrangkwe-arle. Ngkartele-arle itnenhe arrule akngakeke Ikwerenhe areye anetyeke. Itne-arle akenhe Ikwerenhe areye anetyeke ahentye-anetyakenhe-arle anekenge Re akenhe itnenhe uliletyenhe, kenhe itne ingkirreke arrangkemele artitye lterrkemele utyene-ante-irretyeke alkngultyeke-ante artnemele anerle-atherre-anetyenhe.”

Matthew 8:12 Iomraidhean Croise

Matthew 13:38

Apmere ahelhe anteke akenhe ahelhe-arle atyerte-ileme-arteke-arle. Kele tyerrtye Ngkarte-arle alartetye irremele atnyeneke akenhe annge mwerre areye-arteke-arle. Kele tyerrtye Satan-ele-arle atnyeneme areye akenhe annge akurne areye-arle arrentye-kenhe areye-arteke.

Matthew 13:42

Itne itnenhe apurtelhe-ilekarle-iperre ure akngerreke iweme amperle-arle-anemeke, itne anteme akwetethe artnerlte-anetyenhe rlkerte akngerre-akerte, uyarne itirremele.

Matthew 13:50

itnenhe imerte ure akngerreke iwemele, itne anteme yanhele akwete-ante anerlte-aneme rlkerte-akerte artnerlte-anemele, uyarne itirremele.”

Matthew 21:43

Kele Jesus anteme akngerrepate areyeke angkeke, “Alakenhe angkentye Ngkarte-kenhe angkeme: ‘Ngkarte akngerrepate arrekantherrenhe anetyakenhe, arrenhantherrenhe arntarnte-aretyeke arrangkwe. Re anteme arrpenhe areyeke Alartetye anetyenhenge, nhenge areye ikwere aywerrkele akangkwe-irreme warrke ikwerenhe mpwaretyenhenge.

Matthew 24:51

Re renhe aremele akurne anthurre irrerlenge, re renhe iwetyenhe arnterre anthurre atwemele renhe apmere akurne nhenge-werne yernemele. Re kele alhetyeke arrpenhe areyele-arlenge anetyeke tyerrtye yanhe areyenge mwerre-arle akwele anerlte-anemenge. Re anemele artitye inkerrelhilemele rlkerte awelheke, uyarne itirremele.”

Matthew 25:30

Warrkene ingkerne-iperre akenhe, akenge-arle ware anemeke, renhe apmere-ngentyele aywepaye apmere ingwemerte akwetethe-arle aneme-werne. Yanhele anteme re arlkemele artnetyenhe, artitye arrurrketyenhe re rlkerte awelhemele.’ ”

Luke 13:28

“Kele imerte, arrantherre Abraham-arlke, Isaac-arlke, Jacob-arlke, angkentye Ngkarte-kenhe awemele ilerle-apentye akngerre areye-arlke arerrirretyenhe Apmere Akngerre Ngkarte-kenhe akertnenye Ikwerenge anerrirrerlenge. Kenhe Re akenhe arrenhantherrenhe uliletyenhe, kenhe arrantherre ingkirreke arrangkemele artitye lterrkemele utyene-ante-irretyeke alkngultyeke-ante artnemele anerle-atherre-anetyenhe.

Acts 3:25

Arrule anthurre Ngkartele Abraham alakenhe alhileke angkemele, ‘The artwe anyente ngkwenge-artweye areye-ngentyele akngakeme, rarle Atyenge tyerrtye apmere ahelhe nhenhe-arenye ingkirreke anthurre arntarnte-aretyenhenge.’

Romans 9:4

Jew areye kwenhe akwerrke-ipenhe Jacob-eke aneme; Israel arritnye arrpenhe-arle. Ngkartele kwenhe itnenhe akngakeke itnenhe altye-ileke alere uthene ampe uthene Ikwerenhe areye anetyeke. Utnenge Akngerre Ikwerenhele re itneke akwetethe imernelhetyarte nhenge itne unthepunthetyarte apmere ahurratye ikwerele, re itnenhe alhileke Rarle akwele itnenhe arne areye anthurre anthetyenhe, itne renhe aywerrkele awetyenhenge. Re itnenhe angkentye Ikwerenhe antheke Apwerte Sinai-nge, itnenhe akaltyele-anthemele apurte-irretyeke. Re itneke imerneke nthakenhe-arle itne Renhe arratye utyernemele tnaketyeke. Re alhileke Rarle itnenhe arntarnte-aretyenhe.

2 Peter 2:17

Akaltyele-anthenhe-anthenhe akurne nhenhe areye urreme-urreme aneme, kwatye pintye-arle antyerrke-irremeke-arteke, tyerrtye areye-arle itneke-werne apetyemenge ayeye awetyeke, kele itne akenhe ayeye itneke-ngentyele uyarne ineme. Akaltyele-anthenhe-anthenhe yanhe areye itne angkulye-arteke angwerrele-arle arratemeke. Arrantherre itelareme, nhenge tyerrtye areyele angkulye renhe areme, itne anteme itirreme kwatyele akwele anhetyenheke. Kele arrangkwe-arle. Alakenhe-arle, tyerrtye areye akaltyele-anthenhe-anthenhe akurne itneke-werne awetyeke alheme nthakenhe-arle itne Ngkarte-akerte angkemenge. Itne akenhe itnekenge akaltye-irretyakenhe, arrangkwe-arle. Alakenhe ikwerenge anteme Ngkartele itnenhe alhileke itne ingwemertele akwete-ante anetyeke, ayernentye akngerre jail-arenye areye-arteke.

2 Peter 2:4

Arrantherre itelareme arrule anthurre alkere-arenye arrpenhemele arne akurne areye mpwareke, Ngkarte-arle itneke arrkerenye-irretyakenhe ware. Kele, Ngkartele itnenhe iperte akngerreke akwerneke, apmere akurne nhenge Re-iknge tyerrtye akurne areye akwerneme. Re itnenhe chain-ele ayernemele ingwemertele anetyeke. Itne anteme yanhe ikwerele anerlte-anetyenhenge apmere ingwemerte ikwere arlte ingkerneke-atwetye nhenge Ngkarte itneke itirretyenheke arriletyeke arne akurne areye-arle itne mpwarekenge.

Jude 1:13

Tyerrtye akurne yanhe areyele arne ingkirreke anthurre akurne-ileme, itne akurne areye-ante ware mpwarerlte-anemele. Itne akurne anthurre nhenge rlke akngerre-arteke nhengele arne areye irrarnpelhe-ileme. Ingwele anwerne kwerralye areme nhenge anwerne akaltye iwerre ikwerele alhetyenhenge. Tyerrtye yanhe areye kwerralye-arteke anetyakenhe, arrangkwe-arle. Anwerne tyerrtye akurne yanhe areye uyarne apayuthneme nhenge anwernenhe akaltyele-anthetyeke iwerre arratyentye alhetyeke. Alakenhe ikwerenge anteme Ngkartele itneke iperte urrperle akngerre-apenhe mpwareke. Re anteme tyerrtye yanhe ingkerrenyeke anthurre iperte yanheke-arlenge arrernetyenhe Ikwere-ketye akwete-ante.

Revelation 22:15

Kenhe yanhe areye arne akurne-arle mpwarerlte-anemeke kwenhe irrpetyakenhele anetyenhe, itne-arle kwenhe arne akurne areye anthurre mpwarerlte-anemenge: Itne akngwelye areye-arteke aneme, arrpenhe areye artenge-iweme itnenhe rlkerte-iletyeke, itne arrpenhe areye mpwenye ikngwemele, itne arrpenhe areye irrerlknge atwetyarte, itne ngkarte urrtyirrentye areye tnakewarretyarte, itne ahentye anthurre aneme ingkirreke-arle akurne anemeke. Itne kwenhe akethele akwete-ante anetyenhe.”