Matthew 7:21 - Angkentye Mwerre

²¹ Jesus awethe angkeke, “Arrantherre itelareme arrpenhemele ayenge-arle akngerrepate ilemenge. Arrpenhe areye akenhe urrtyirremele ileme ayenge-arle akwele akngerrepate itnekenhe. Kenhe itne akenhe akangkwe-irretyakenhe awetyakenhe-arlke mpwaretyakenhe Ngkartele-arle itnenhe ilekeke. Alakenhenge anteme Ngkartele itnenhe atyewe aketyakenhe itnenhene arntarnte-aretye-arlke-akenhe akngerrepatele-arteke.

Matthew 7:21 Iomraidhean Croise

Romans 2:13

Ngkarte kwenhe angketyakenhe nhenge tyerrtye areye-arle arratye anemeke itne-arle akaltye anerlenge angkentye Rarle Moses anthekeke, arrangkwe. Ngkarte akenhe angkeme tyerrtye areye arratye anemeke itne-arle angkentye yanhe nhenge akwetethe awerlte-anerlenge, ingkirreke aywerrkele mpwareme nhenge rarle ilemeke.

Luke 6:46

Jesus-ele itnenhene apayuthneke, “Kenhe arrantherre arrpenhe areyele ayeye atyinhe awerrirreme. Kele arrantherre ayenge awerrirrerlenge, yanhe-ngentyele akenhe arrantherre akurne akwete-arle anerlte-aneme. Nthakenhe anteme arrantherre angkeme ayenge arrekantherrenhe Alartetye aneme?

James 1:22

Angkentye Ngkarte-kenhe awetyale ware. Kele arrantherre mpwaretyeke iwenhe re angkemenge. Unte urrtyalthe ware-ketye.

Luke 11:28

Kenhe Jesus arelheke angkirtnerlenge, “Yanhe apeke apele arratye rarle. Kenhe the akenhe ngenhe ileme, angwenhele apeke angkentye Ngkarte-kenhe mwantyele aweme, kenhe Ngkartele renhe-arle akangkentye anthurre mpwarerlenge!”

Titus 1:16

Itne akwele angkeme itne-arle Ngkarte itelareme akwele, kele imerte itne akwete-arle arne akurne areye mpwarerlte-anemele. Nhenge itne akwete arne akurne yanhe areye mpwaremele, Ngkarte itneke akangkentye anetyakenhe. Itne Renhe awetyakenhe aneme, kele itne warrke mwerre mpwaretyakenhe-arle Ikwere. Alakenhe ikwerenge anteme tyerrtye yanhe areye Ngkarteke akutne akwete aneme arratye.

Hebrews 4:6

Arrule aneke Israel-arenye areyele Ngkarte itneke angkerlenge aweke, kenhe itne akwele Renhe arratye awetyakenhe aneke. Alakenhe ikwerenge anteme itne apmere Canaan-eke irrpetyakenhe aneke, arrangkwe. Anwerne lyete itelareme, tyerrtye areye kwenhe apmere yanhe-werne irrpenhentye akngerre ltyerremele anetyeke Ngkartele alhileke iperre akwete aneme.

John 6:40

Akngeye atyinhe kwenhe arelhe ingkirrekeke ahentye-aneme nhenge ayenge-arle itelaremeke nhenge ayenge-arle Alere Ngkarte-kenhe anemeke ante atyenge akangkwe-irremele itethe akwete anteme Ikwerenge aneme. Urreke anteme the itnenhe akemelhe-iletyenhe nhenge irrerlknge intekenge nhenge arlte ingkernenge.”

Revelation 3:5

Arrantherre apeke lterrke akwete anerlte-aneme, arrentye Satan-ketyenge untyeme-irremele, kele arrantherre mantere mperlkere yanhe-arteke akwetethe atnyenerlte-aneme. The kwenhe arritnye arrekantherrenhe pipe atyinheke intelhe-ileke arrantherre itethe akwete-ante anetyenhenge. The arritnye yanhe areye urrparetyakenhe anetyenhe nhenge arrantherre apeke ayenge akwetethe apenterlte-anemenge. Ayenge kwenhe Ngkartenge arrekwele angketyenhe Alkere-arenye Ikwerenhe areyenge-arlke arrantherre-arle atyewe atyinhe areye anemenge.’

1 Peter 4:2

Kele, lyete-ngentyele, nhenge arrantherre ahelhe nhenhele akwete anemele, arrantherre mpwaretyeke Ngkartele-arle arrenhantherrenhe ileme-ante. Arrantherre arne akurne mpwaretyale anetyeke, arrantherre-arle mpwaretyeke ilkelhemele.

Hebrews 13:21

Ayenge kwenhe arrekantherre Ikwere angkerle-aneme nhenge Re arrenhantherrenhe arne mwerre ingkirreke akaltyele-anthetyeke. Kele Jesus Christ-ele anteme arrenhantherrenhe lterrke-ileme, arrantherre Ngkarte Renhe aweme anteme. Arrantherre anteme iwerre arratyele Ikwere mwerre anetyenhe, Re arrekantherre akangkemele anetyenhenge. Anwerne ingkirrekele Jesus Christ akwete-ante utyernemele tnakewarreye! Yanhe mwerre anthurre-arle.

Matthew 12:50

Angwenhe apeke Akngeye alkere akertne-arenyeke akangkwe-irremele, Ikwere aywerrke arne mwerre areye mpwareme, itne atyeye atyinhe uthene meye atyinhe uthene-arle aneme.”

Revelation 22:14

“Nhenge tyerrtyele mantere itnekenhe alheweme-arteke itne anteme mwerre alkarle-irrerlenge, alakenhe re-anteye nhenge itne utnenge alkarle atnyenemele akangkentye anetyenhenge, alakenhe ikwerenge anteme itne merne ikwemeye arne yanhe-ngentyele arlkwetyeke tyerrtye areye-arle itethe akwete-ante atnyenetyeke, itne anteme arriwe yanhe ikwerenge irrpetyenhenge apmere Jerusalem-enge yanhe ikwerele itethe akwete-ante anetyenhe.

John 3:5

Jesus anteme angkirtnerlenge, “Arrangkwe-arle, itirrentye ngkwinhe-arteke anetyakenhe. The kwenhe ngenhe arratye ileme, arrekwele kwenhe unte inteke mikwele renhe akweke atnyeneme. Kenhe nhenge unte awethe akweke intemele kele Ngkarte ngkwenge Alartetye anetyenhe unte-arle kwatyeke irrpekenge iperre-ante Rarle Utnenge Akngerre ngkwenge-arleke akwerneke.

Matthew 18:3

Re imerte itneke alakenhe angkemele, “Ayenge-arle arrekantherre arratye-arle angkeme, arrantherre apeke akngarte-iwelhemele ampe nhenhe-arteke anerlenge, Ngkartele arrenhantherrenhe ikwerenhe ileme arrenhantherrenhe arntarnte-aremele akwete alartetyele warte.

John 7:17

Angwenhele apeke mpwareme iwenhele Akngeye ahentye-aneme, kele re itelaretyenhenge nhenge iwenhe-akertele the akaltyele-antheme-akerte. Re nhenge itelaretyenhenge Akngeyele apeke-arle aneme nhenge ayenge akaltyele-antheke, nhenge ayenge apeke ayenge-arrpe angkeme, ayenge apekele angkerle-aneme arne iwenhe apeke ikwere akaperte atyinhe-ngentyele ware. The apeke tyatye atweme, ithwenge apeke.

Romans 12:2

Kele angwaretyale yanhe areye-arle arne ahelhe nhenhe-arenye areyeke-ante itirrerlte-anemeke. Ngkartele anteme itirrentye arrekantherrenhe akngarte-iweme nhenge arrantherre-arle Ikwere arratye itirretyenhenge. Nhenhe-ngentyele anteme arrantherre Ngkarte-ngentyele akaltye-irretyenhe nhenge nthakenhe irretyeke Rarle ahentye-anemenge, alakenhe mwerre akngerre-arle. Nhenge Re aremele, akangkemele anthurre anetyenhe.

Mark 3:35

Angwenhele apeke aywerrkele aweme, iwenhe apeke renhe mpwaretyeke Ngkarte-arle ahentye-anerlenge, itne apele atyeyikwe areye, meye-arle atyinhe aneme.”

1 Thessalonians 5:18

Nhenheke rarle Ngkarte arrekantherre angkerle-aneme Jesus-kenhe-arle areyeke: Kele iwenhe apeke nthakenhe-arle irreme, mwerre apeke, akurne apeke, kele mwerre-arle! Akwetethe Ngkarte utyernemele tnakewarreye.

Ephesians 6:6

Alartetye arrekantherrenhe awerrirraye, warrke itneke mwerre mpwaretyeke. Nhenge itne arrenhantherrenhe areme warrke mwerre mpwarerlenge, kele imerte itne arrekantherre akangkentye-arle aneme. Nhenge itne apeke anetyakenhe arrekantherrenge, kenhe arrantherre akwete-arle warrke-irrerlte-anaye. Nhenheke itirrewarre: Arrantherre warrkene Christ-kenhe areye, arrantherre Ikwerenhe aneme. Ngkarte arrekantherre ahentye-aneme Ikwere ware mwerre anetyeke, arrantherre anteme mwerre antime anetyeke ahentye-aneme Ikwere. Alakenhe ikwerenge anteme arrantherre mwerre akwete mpwarerlte-anetyeke alartetye arrekantherrenheke.

1 Peter 2:15

Ngkarte kwenhe arrekantherre ahentye aneme arne mwerre mpwaremele anetyeke nhenge tyerrtye yanhe areye-arle Ngkarteke akutne anemeke imerte arrenhantherrenhe aremele itne apeke anteme uyarne urrtyirreme arrekantherre-akerte, arrenhantherrenhe ilpernemele arne akurne-arle mpwaremenge.

Matthew 25:21

“Yanhenge anteme artwe akngerrepate re angkeke, ‘Unte kwenhe urrkapentye mwerre anthurre atyenge aneme. Unte kwenhe atyenge mwerre anthurre urrkapeke nhenge tharle ilerle-alhekeke. The kwenhe ngenhe mane akweke ware antheke unte atyenge atningke-iletyeke, unte akenhe ayenge mane akngerre-arle anthirtnerlenge. Yewe, arlte lyete-ngentyele the ngenhe arrerneme unte akngerrepate anetyeke mane atningkeke atyinhe, apmere kwene atyinhe-werne irrpintyaye, anwerne apurte akangkemele anetyeke!’

1 Thessalonians 4:3

Ngkartele anwernenhe akngakeke anwerne Ikwere arratye anetyeke, Ikwerenhe areye-arteke. Kenhe anwerne apeke untheme arelhe arrpenhenge apeke, artwe arrpenhenge apeke mpwenye untelhe-iletyeke, Re anteme anwerneke akangkentye anetyakenhenge. Nhenhe ikwerenge, Ngkarte arrekantherre angkeme: “The arrenhantherre akngakeke, tyerrtye arrekantherrenhe Atyinhe-arle. Alakenhe ikwerenge anteme Atyenge mwerre anerrirretyeke tyerrtye ingkirrekele arrekantherrenhe, akurne mpwareme-ketye.” Nhenhe rarle Ngkarte angkeme artwe ingkirrekeke: “Tyerrtye arrekantherrenhe Atyinhe. Ayenge utyernemele tnakaye tyerrtye arrekantherrenhele. Akwete anerrirraye anewe arrekantherre-arlenge-ante ware. Arelhe arrpenhe areye impaye, tyerrtye arrekantherrenhele akurne mpwaretyale, arrpenhe areyeke alhirretyale anaye.” Tyerrtye alakenhe-arteke areye-arle Ngkarteke akutne-arle. Itne arlakelherlte-anemele arne akurne areye mpwarerlte-anemele, nhenhe akurne-arle. Alakenhe mpwaretyale! Nhenheke rarle Ngkarte arrekantherre angkeme. “Atyewe Ngkarte-kenhe arrekantherrenhe areye akurne mpwaretyale. Anewe arrpenhe-kenhe mpwenye akngetyale!” Ngkarte arnterre ahele-irretyenhe. Kenhe arrpenhe areye akenhe arlakelheme-arle arne akurne mpwarerlte-anemele, Ngkarte itneke-ketye untyeme-irretyenhenge. Alakenhe rarle anwerne arrenhantherrenhe akaltyele-antheke, alkngarre-iletyeke.

Colossians 4:12

Epaphras-arlke, nhenge apmere-altye-arenye arrantherre-arle anemeke, re arrekantherre akangkemele itirremele-anteye. Re arnterre warrke mpwareme Jesus Christ-eke akwetethe anthurre Ngkarteke angkerle-aneme arrekantherre. Re Ngkarte apayuthneme arrantherre nhenge angkentye Ikwerenhe akwete anthurrele awerlte-anetyeke aywerrkele mpwaretyeke. Re Ngkarte apayuthneme arrenhantherrenhe atnerre-iletyeke lterrke-iletyeke arrantherre-arle akwetethe Renhe apenterlte-anetyeke ingkirreke mpwaretyeke Rarle ahentye-anemenge.

Luke 13:25

Kenhe urreke rarle, alartetye re arriwele tnetyenhe akwete martemele, kenhe tyerrtye itne akenhe akethele tnerrirrerlenge ltare atwemele. Kenhe lyete akenhe arrantherre apeke Ngkarte Ikwere arratye anerrirretyakenhe, arrantherre arratye-arle akethele ipmentye-irretyenhe. Arrantherre apeke arriwe ltare atwerrirremele angkerrirrerlenge, ‘Akngerrepataye! Anwerneke altywere-ilaye!’ “Kenhe re akenhe alakenhe angkerlenge, ‘Arrangkwe! Nthenhe-arenye-ame arrantherre? Ayenge-arle arrekantherre akutne-arle!’

Acts 14:22

Apmere arrpe-anenhekenge, itne Jesus-kenhe areyenge apurte-irreke awethe itnenhe ayeye Ngkarte-kenhe akaltyele-anthemele. Ratherre itnenhe ileke Jesus-eke akangkwe-irretyeke. Ratherre alakenhe angkemele akaltyele-antheke, “Anwerne-arle ahelhe nhenhele itethe anemele tyerrtye areyele Jesus ipmentye-iwemenge areye anwerneke ahele akwete uthnerretyenhe anwerne-arle Jesus-eke akwete akangkwe-irremenge. Anwerne Jesus akwete akangkwe-irretyeke ikwere untyeme irretyale, urreke anteme Ngkartele apmere akertnele anwernenhe akwetethe atnyenetyenhe.”

Luke 18:25

Ayenge awerrirraye! Arrantherre itelareme alhwenge yerre-kenhe-arle altywere akweke anthurre-akerte, kamule apeke-ame altywere ikwerenge irrpenhemere? Arrangkwe. Alakenhe akwele angwenhe apeke mane atningke-akerte, arrpernkeme Ngkarte renhe apayuthnetyeke alartetye irretyenhenge itnenhe arntarnte-aretyenhenge.”

Mark 9:47

Unte apeke alknge ngkwinhele aremele akurne mpwareme. Kele unte alknge ngkwinhe tyerremele iwetyeke unte akurne awethe mpwarerle-aneme-ketye. Kele mwerre-arle unte apeke alknge mwerre anyente aneme itethe akwete anetyeke Ngkartenge. Kele unte akurne akwete mpwarerle-aneme alknge atherre-akertele Ngkartele-arle ngenhe iwerlenge apmere akurne ikwere-werne, ure akngerreke-arleke.”

Matthew 19:24

Ayenge awerrirraye! Arrantherre itelareme alhwenge yerre-kenhe altywere akweke anthurre-akerte, kamule apeke-ame altywere ikwerenge irrpenhemere? Arrangkwe. Alakenhe akwele angwenhe apeke mane atningke-akerte, arrpernkeme Ngkarte renhe apayuthnetyeke akngerrepate irretyenhenge itnenhe arntarnte-aretyenhenge.”

Matthew 18:35

Kele Jesus-arle itneke alakenhe angkeke-iperre re itneke angkeke, “Akngeye atyinhe alkere akertnele-arle aneme kwenhe akngerrepate nhenhe-arteke aneme. The arrekantherre ileme arrantherre apeke arrpenhe areyenge ipeltye-irrerlenge itnenhe atwirtnetyakenhe anemele, Akngeye akertne-arenye akenhe arrekantherrenge ipeltye anteye-arle irreme imerte atwirtnetyakenhe-arle anemele. Kenhe arrantherre apeke ahentye-anetyakenhe aneme ipeltye-irretyeke kele re ipeltye-irretyakenhe anteye-arle aneme arrekantherrenge.”

John 15:23

Tyerrtye areye-arle atyenge atnerte ahentye anetyakenheke kwenhe Akngeye atyinheke ahentye anetyakenhe-anteye.

Matthew 26:42

Kele itneke-arle re angkeke iperre re alpeke Ngkarteke awethe angketyeke, “Akngeye atyinhe-aye! Unte ayenge ileke ilwetyeke, yanhele ayenge uye anthurre itirretyeke mpwareme. Unte angkentye yanhe akngarte-iweye ayenge rlkerte awelhetyakenhe anetyenhenge. Kenhe arrangkwe-arle, iwenhe apeke ikwere unte ahentye-anemele mpware, iwenhe apeke ikwere-arle ayenge ahentye-aneme mpwaretyale!”

Matthew 16:17

Kele Jesus anteme ikwere angkeke, “Yewe arratye Simon, Jonah-eke alere! Unte arratye-arle angkeme. Kele mwerre-arle, artwe arrpenhele-arle ngenhe akaltyele-anthetyakenhenge. Unte alakenhe angkeke Akngeye akertne-arenyele ngenhe alakenhe akaltyele-anthekenge.

Revelation 2:27

Ngkartele kwenhe ayengeke-amparre arrerneke apmere ingkirrekeke alartetye anetyeke, lyete anteme the arrenhantherrenhe arrerneme alartetye areye anetyeke alakenhe-anteye. Ayenge arne ingkirreke anthurreke alartetye anthurre anetyenhe, ayenge tyerrtye ingkirreke anthurreke lterrke anetyenhe. Nhenge itne apeke mwernte-irrerlenge imerte arrenhantherrenhe awetyakenhe anemele kele arrantherre anteme itnenhe atwetyenhe, alakenhe anteye arrantherre apanthe ultakemele-arteke renhe ngkweltye-ilemele.

John 14:7

Re angkeke-anteye itneke, “Arrantherre apeke atyenge akaltye anthurre aneme arrantherre Akngeye atyinheke akaltye-anteye-arle anemere. Kele lyete-ngentyele arrantherre Akngeye atyinheke akaltye aneme nhenge arrantherre renhe arrekwele areke-arteke-arle.”

John 5:17

Kenhe Jesus anteme angkeke itneke, “Akngeye atyinhe kwenhe akwetethe urrkapetyarte, arlte apurrkele anteye. Ayenge-arlke akwetethe urrkaperle-aneme.”

Matthew 26:39

Kele-arle re angkeke iperre re akeme-irremele alheke irntwarre ulkere apmere arrpenhe-werne. Re anteme inngerre ahelhe-werne-atheke intemele angkeke Ngkarteke alhwarrpe akngerre-akerte imerte alakenhe angkemele, “Akngeye atyinhe-aye! Unte atyenge ileke, ayenge-arle ilwetyenhe, ayenge uye anthurre itirretyeke mpwareme. Unte angkentye yanhe akngarte-iwaye, ayenge rlkerte awelhetyakenhe anetyenhenge. Kenhe arrangkwe-arle, iwenhe apeke ikwere unte ahentye-anemele mpware, iwenhe apeke ikwere-arle ayenge ahentye-aneme mpwaretyale!”

Matthew 18:10

Kele Jesus tyerrtye itneke angkeke, “Ameke-arelhewarraye! Akurne-iletyale ampe akweke nhenhe areye. Alkere-arenye ingkirreke ampe nhenhe areye-kenhe, alkere akertnele Ngkartenge, akwetethe akweke areye arntarnte-arerlte-aneme. Kenhe ayenge akenhe apmere nhenhe-werne apetyeke aparlpe-arle-irreke areye mwantyele arntarnte-aretyeke.

Matthew 18:19

“Awethe ayenge arrekantherre angkeme alakenhe: tyerrtye atherre apeke apurte-irremele imerte yewe angkerremele iwenhe apeke ikwere, kele imerte Ngkarte anteme ikwere-akerte apayuthnemele. Kele re mpwareme-arle iwenhe-arle ratherre apayuthneke.

Matthew 25:10

“Kele itne alherlte-iweke inerrirretyeke. Kele itne-arle alhekenge-ureke artwe re apetyeke anteme-arle anewe aketyeke akwerrke-iperre ikwerenhe renhe akngetyeke. Arelhe ilernpenye areye-arlke apurte-iremele ikwere-atherrenge alheke lamp alkngenthe-akerte akngeye ikwerenhe-kenhe apmere-werne arrernelhemele itne kwene irrpenherlte-iweke imerte merne akngerre anthurre arlkwerrirremele, artwe urrkapentye akngerrele anteme arriwe marteke.