Matthew 6:9 - Angkentye Mwerre

⁹ Kele nhenge arrantherre Ngkarteke angkemele, alakenhe angketyeke, ‘Ngkarte Akngeyaye, alkerele-arle aneme. Impene anthurre kwenhe arritnye ngkwinhe aneye. Altyerre Ngkwinhe apetyaye.

Matthew 6:9 Iomraidhean Croise

Matthew 10:29

Ngkarte-arle arrekantherre akwetethe-arle mwerrantye itirrerle-aneme alkngwirretyakenhele. Thipe nhenge nyingkeke itirraye. Unte apeke thipe atherre alakenhe inemele mane akwekele ware. Arrantherre apeke itirreme Ngkarte-arle akwele thipeke itirretyakenheke-athene. Arrangkwe, Ngkarte-arle itneke akwetethe-arle itirrerle-aneme nhenge thipe anyente atnyeme imerte ilwemele, kele re itelareme-arle.

Matthew 23:9

Tyerrtye arrpenhe renhe “akngeye” aketyale anetyeke. Arrantherre Akngeye anyente-ante-arle atnyeneme alkere akertnele-arle anerle-aneme.

Matthew 26:29

The arrekantherre arratye ileme, ahelhe nhenhenge the awethe ngkwarle antywetyeke arrangkwe. Kele urreke Akngeye atyinhele tyerrtye areye apurtelhe-ilemele itnenhe akngerrepatele-arteke arntarnte-aretyenhe. Yanhenge anteme-arle the arrekantherrenge ngkwarle awethe antywetyenhe ngkwarle arrpenhe anteme.” Alakenhe-arle Jesus itneke angkeke.

Matthew 26:42

Kele itneke-arle re angkeke iperre re alpeke Ngkarteke awethe angketyeke, “Akngeye atyinhe-aye! Unte ayenge ileke ilwetyeke, yanhele ayenge uye anthurre itirretyeke mpwareme. Unte angkentye yanhe akngarte-iweye ayenge rlkerte awelhetyakenhe anetyenhenge. Kenhe arrangkwe-arle, iwenhe apeke ikwere unte ahentye-anemele mpware, iwenhe apeke ikwere-arle ayenge ahentye-aneme mpwaretyale!”

Matthew 5:16

Alakenhenge anteme alengke-iwelhewarretyale. Kele itne anteme arrenhantherrenhe areme arne mwerre mpwarerlenge kele itne Akngeye arrekantherrenhe akertnele-arle anemeke akangkwe-irreme anteye.”

Matthew 5:48

Yewe, arrantherre kwenhe mwerrantye anthurre anetyeke, arrantherre itelareme Ngkarte-arle mwerrantye aneme-arteke, alakenhe-athewe.”

Matthew 6:14

Jesus alakenhe-arlke itneke angkeke, “Angwenhele apeke arrekantherre akurne mpwareme, arrantherre anteme itnenhe ilpernetyakenhe anetyeke. Kele Akngeye alkere akertne-arenyele arrenhantherrenhe ilpernetyakenhe aneme nhenge arrantherre akurne mpwarerlenge.

Matthew 6:6

Nhenge unte Ngkarteke angkemele apmere ngkwinhe arriwe martemele anyente-ante ikwere angketyeke. Kele Ngkarte-ante-arle akaltye aneme unte-arrpe-arle angkeke, re anteme, ngenhe areke-arle-iperrenge, ngenhe arne mwerre anthurre anthetyenhe.

Matthew 7:11

Kele arrantherre ampe arrekantherrenhe areye arne mwerre antherlte-aneme itne arrenhantherrenhe apayuthnerlenge, kele arrantherre-arle akurne akwete mpwarerlte-anemenge. Kele Akngeye arrekantherrenhe alkere akertnele-arle anemeke, arrantherre itirrewarremele iwenhe-arteke-arle Re aneke? Rarle nhenge mwerre anthurre aneme, arrekantherrenge mwerre akngerre ulkere. Re akenhe arne mwerre akngerre aywerrkele anthentye akngerre-arle arrantherre apayuthnerlenge.”

Luke 15:18

Kele re-arrpe angkeke, ‘The apmere nhenhenge-ntyele impemele, apmere akngeye-kenhe atyinhe-werne alpemele, ikwere angketyenhenge, “Akngeyaye, ayenge Ngkarte Ikwere-ketye untyeme-irreke ngkwenge-ketye-arlke.

Luke 15:21

“Kele imerte ampe ingkernenye re akngeye ikwerenheke angkeke, ‘Akngeyaye, ayenge Ngkarte Ikwere-ketye untyeme-irreke ngkwenge-ketye-arlke. Ayenge akurne. Ayenge ampe ngkwinhe anetyakenhe aneme, arrangkwe-arle.’

Luke 2:14

“Anwerne Ngkarteke akangkentye anthurre anerrirreme alkere artepenyele-arle anemeke. Kenhe apmere ahelhe nhenhele, ingkirrekele-arle Ngkarte renhe awerrirremeke mwerre anthurre ilkelhemele anerlte-aneye!”

John 20:17

Jesus anteme ikwere angkeke, “Ayenge arntwirrketyale anaye ayenge-arle kwenhe Akngeye atyinhe-werne alhetyakenhe akwete. Apententye akngerre atyinhe areye iletyeke alhaye, ayenge kwenhe lyete-ante Akngeye atyinhe-werne alpetyeke. Re kwenhe Akngeye arrekantherrenhe-arlke. Ayenge Ngkarte atyinhe-werne alpeme, Ngkarte arrekantherrenhe-arlke.”

Romans 1:7

The kwenhe pipe nhenhe arrekantherre intelhe-ileme Rome-le-arle aneme areyeke. Ngkarte re kwenhe arrekantherre ahentye anthurre aneme, Re arrenhantherrenhe akngakeke atyewe ikwerenhe anthurre anetyeke. The Ngkarte anwerne-kenhe Akngeye apayuthneme Jesus Christ Alartetye anwerne-kenhe-arlke arrenhantherrenhe mwantyele arntarnte-aretyeke nhenge arrantherre atyenpe anetyenhenge.

Romans 8:15

Arrwekele kwenhe anwerne atere-irretyarte, Ngkartele anteme anwernenhe Utnenge Akngerre antheke. Utnenge Akngerrele kwenhe anwernenhe atnerre-ileme, atere-kwenye. Anwerne Utnenge Ngkarte-kenhe ineke nhenge Re anwernenhe ampe Ikwerenhe areye-arteke altye-ileme. Lyete anteme anwerne Renhe akeme, “Abba, Akngeye.”

Galatians 1:1

Ayenge Paul arritnye. The, atyewe Jesus-kenhe arrpenhe nhenhe areyenge, ayeye nhenhe arrekantherre Jesus-kenhe areye-werne yerneme apmere arrpe-anenhele-arle apurte-irremeke apmere Galatia-le, anwerne arrekantherre akangkemele itirreme. Jesus-ele ayenge yerneke Ayeye Mwerre ilerle-apetyeke. Ayenge kwenhe tyerrtye areyele yernetyakenhe. Arrangkwe-arle, kele Jesus-elarle ayenge akngakeke warrke nhenhe ikwere mpwaretyeke. Ngkartele Jesus itethe-ileke imerte akemelhe-ilemele ilweke-arle-iperre kele rarle ayenge akngakemele yerneke warrke nhenhe mpwaretyeke. Alakenhe ikwerenge-arle the Ayeye Mwerre Ngkarte-akerte ilerle-apeme.

Galatians 4:6

Re anwernenhe altye-ileke, ampe ikwerenhe areye anetyenhenge, Re Utnenge Alerikwe-kenhe anwerneke-arleke arrerneke utnenge anwerne-kenhele anetyeke. Utnenge yanhe-akerte anwerne Ngkarteke akangkentyele angkeme, “Abba, Akngeye.”

1 Timothy 6:16

Rarle athewe ilwetyakenhele aneme. Rarle alkngenthe-arteke pwarrtyeme. Tyerrtye angwenhe apeke Ikwere-werne itweke-irretyakenhe aneme, Rarle akngerre anthurre anteme-arle anemenge. Tyerrtye arrpenhele Renhe aretyakenhe, arrpenhele Renhe uyarne areme. Alakenhe ikwerenge anteme anwerne Renhe akwete utyernemele tnaketyeke! Re-ante-arle ngangkere akngerre-akerte anemenge.

1 Peter 1:17

Nhenge arrantherre apeke Ngkarteke angkemele, renhe Akngeye arrekantherrenhe aketyeke. Re kwenhe tyerrtye areye court-ele ngkernetyenhe mwantyele aretyeke itneke itirremele nhenge angkentye anyentenge ularre. Re kwenhe arne ingkirrekeke itirretyenhe itne-arle mpwarekeke nhenge mwerre apeke nhenge akurne apeke. Nhenge Re tyerrtye areye aremele mwerre mpwarerlenge Re akangkemele, nhenge Re tyerrtye areye aremele arne akurne mpwarerlenge Re akangkentye anetyakenhele. Alakenhe ikwerenge anteme arrantherre Ngkartenge ularre anetyeke Renhe akwetethe tnakerlte-anetyeke nhenge Alartetye arrekantherrenhe-arle Re anemenge.

Revelation 4:11

“Ngkarte Akngeyaye! Unte kwenhe alartetye anthurre anwerne-kenhe aneme, Ngkwenge mwerre kwenhe aneme, Unte anwernenhe ingkirreke aretyeke Ngenhe tnakewarrerlenge, Unte-arle kwenhe Utnenge Ngkwinhele arne ingkirreke anthurre aknganekenge. Unte-arrpe kwenhe itirreke arne ingkirreke mpwaretyeke, ingkirreke apmere ahelhe nhenheke alkereke-arlke arrernetyeke nhenge itethe anetyeke.”

Revelation 5:12

The itnenhe ingkirreke anthurre alyelherlenge aweke, arnterre anthurre alakenhe arlkemele: “Anwerne Yepe-Yepe Akwerrke yanhe renhe akwetethe akertne utyernerlte-aneye! Renhe-arle itne irrerlknge atweke, kenhe re akenhe awethe-arle itethe-irrirtnerlenge, re mwerre akngerre anthurre aneme. Yepe-Yepe Akwerrke yanhe re alartetye anthurre anwerne-kenhe aneme Utnenge Ngkarte-kenhe-akerte, nhenge arne ingkirreke atnyenemele, re itnenhe akwetethe mwantyele antherle-aneme. Re kwenhe akaperte altywere anthurre aneme, arratye akwetethe itirrerle-aneme, re arne areye ilyernpenye mpwarerle-aneme. Kele anwerne renhe akwetethe akertne utyernerlte-anemele tnakewarreye.”