Mark 7:4 - Angkentye Mwerre

⁴ Itne merne ineke iperre, itne apmere-werne akngirtneme renhe alhewemeke-amparre nhenge itne arlkwetyenhenge. Itne alheweme panikene-arlke, plate-arlke, arne arrpenhe areye-arlke arrekwelenye itnekenhe-arle-arteke.

Mark 7:4 Iomraidhean Croise

Matthew 23:25

“Akunye areye-aye! Arrantherre angkentye Moses-kenhe akaltyele-anthenhe-anthenhe areye Pharisee areye-arlke arrantherre urrtyirremele ilentye akngerre mwerre akwele anerlte-anemele. Arrantherre tnakelhentye akngerre areye! Alakenhenge-arle arrekantherre akurne akngerre irretyenhe! Arrantherre-arle itne-arteke nhenge tyampite uthene plate uthene akethe-ante urlkernemele, kwene akenhe aternnge-arle. Arrantherre arne arrpe-anenhe akethele mpwarerlte-aneme arrpenhe areyele aretyenhenge arrantherre mwerre akwele. Kele arrantherre akenhe atnure, ntyelhe-arle aneme-arle.

Matthew 23:26

Itirrentye arrekantherrenhe arratye anetyakenhe. Atnure ante ntyelhe anetyale! Kele imerte arrantherre mwerre apeke arne renhe arratye mpwaremele. Arrantherre apeke tyampite uthene plate uthene kwenele arrekwele alhewerlenge, kele itne alkarle anthurre anetyenhenge. Alakenhe arrantherre itirretyeke iwenhe-arle arrekantherrele-arlenge kwenele anemeke, akurne areye-ketye untyeme-irreme, kele yanhe-ngentyele imerte arrantherre mwerre arratye anteme anetyenhele.

Matthew 27:24

Kele, Pilate-le itnenhe areke angkelhe-angkelhe angkerrerlenge impemele apeke renhe re itirreke, “Tyerrtye nhenhe areye apeke ahele-irrerirremele atwerreketye.” Kele re kwatye inemele iltye alhewelheke tyerrtye areyele arerlenge imerte angkemenge, “Ayenge nhenhe iltye alhewelhemele arrantherre ayenge ilpernetyale, arrantherre-arle renhe atwetyeke ahentye-aneme, ayenge kwenye. Arrantherre kwenhe ayenge uterneme thultye atyinhe areye iletyeke renhe akngemele atwetyeke.”

Mark 7:8

“Iwenheke-ame arrantherre angkentye Ngkarte-kenhe awerrirretyakenhe, angkentye akngerrepate arrulenye arrekantherre areye-kenhe ware awerrirremele?”

John 2:6

Apmere yanhe ikwerenge aneke tyampite akngerre six-pele arltwe aneke. Itne tyampite akngerre kwatye-akerte nhenhe areye atnyenetyarte alhewelhetyeke nhenge itne apekele Akngeye mwerrantye utyernemele tnaketyeke, Jew-arenye areyele-arle arratye mpwaretyarte-arteke. Tyampite nhenhe areye akngerre-apenhe litre 100-pele kwatye atnyenentye akngerre.

John 3:25

Kele apententye akngerre John-kenhe arrpenheme nhenge ahele-anteme angkerreke artwe Jew anyenteke nhenge iwerre arratyele anetyeke-akerte, atywerrenge itnekenhenge ularre, nhenge itne kwatyele alhewelhetyarte.

Hebrews 9:10

Atywerrenge Moses-kenhe yanhele-arle tyerrtye areyeke ileke-ante iwenhe arlkwetyeke iwenhe impetyeke. Atywerrenge yanhele itnenhe ileke tyerrtye arlkngelhetyeke, arne arrpenhe itnekenhe areye-arlke alhewetyeke. Atywerrenge nhenge re aneke akweke-ulkere warele nhenge tyerrtye areyele apentetyeke nhenge urreke-ulkere anteme Ngkartele itneke atywerrenge arrpenhe imernetyeke, atywerrenge angkweyenge mwerre-ulkere.

James 4:8

Ngkarte itwe-werne apetyewarraye Re anteme arrekantherre-werne itwe-werne apetyetyenhenge arrenhantherrenhe arntarnte-aremele. Akurne areye-aye, akurne ingkirreke impaye! Itirrentye arrekantherrenhe akngarte-iwelhaye Ngkarte-ante awetyeke. Arratye renhe apenterlte-anaye!

1 John 1:7

Kele anwerne apeke arratye mwerre anerlte-aneme, nhenge Ngkarte-arle arratye mwerrentye anthurre aneme-arteke, yanhe kwenhe alkngenthe Ngkarte-kenhenge aneme-arteke. Nhenge anwerne anemele alkngenthe alakenhe-artekenge anwerne arratye mwerrele anetyenhe ante anwerne akangkemele anemele, ipeltye anemele. Nhenge anwerne apeke arne akurne mpwaremele Ngkartele akenhe anwernenhe arlkngeme-anteye-arle alhwe Jesus-kenhele.