Luke 2:14 - Angkentye Mwerre

¹⁴ “Anwerne Ngkarteke akangkentye anthurre anerrirreme alkere artepenyele-arle anemeke. Kenhe apmere ahelhe nhenhele, ingkirrekele-arle Ngkarte renhe awerrirremeke mwerre anthurre ilkelhemele anerlte-aneye!”

Luke 2:14 Iomraidhean Croise

Matthew 21:9

Nhenge arrwekele areye alherlte-apetyame, ingkernele areye-arlke alhetyame arlkerlte-apetyeme angkemele, “Yewe, Ngkarte, artwe nhenhe arntarnte-araye unte-arle yerneke. Renhe impaye akngerrepate anemele anwernenhe arntarnte-aretyeke arrenge arrwekelenye David-ele-arteke. Yewe, Ngkarte kwenhe mwerre anthurre!”

Luke 19:38

Itne arlkerrirreke, “Ngkartele artwe nhenhe renhe mwerre akngerre arntarnte-areme. Re kwenhe Ngkartele-arle akngakemeke nhenhe-werne yernetyeke anwerneke Alartetye anetyenhenge. Kenhe arntyele areye akenhe Ngkarte akertne-werne utyernemele alyelhewarreke. Anwerne akangkeme tyerrtye ingkirrekeke alkere akertnele-arle anerrirremeke. Anwerne Ngkarte akertne-werne utyernemele alyelhewarremele.”

Luke 2:13

Kenhe arntyele rarle angkeke iperrenge, arntyele arrpenhe areye aneme impeltyenge itnekenge akertnenge arratewarrerlenge. Itne ingkirreke Ngkarte-werne-atheke akangkemele alyelhewarreme alakenhe:

Luke 2:15

Yanhe ikwerenge-ntyele, arntyele yanhe areye alkere artepenye-werne alperlte-iweke. Kele yepe-yepe arntarnte-arentye akngerre areye itne angkerreke, “Mpe, anwerne ingkirreke Bethlehem-eke irrpenhewarretyekaye ampe akweke ikwere untherrirretyeke arntyele Ngkarte-kenhe-arle anwerneke ileke-arle!”

Luke 3:22

Re areke Utnenge Ngkarte-kenhe anteme atnarnperlenge thipe urelyarre-arteke imerte ikwere-arleke arrernelhemele. Alkere-ngentyele anteme Ngkarte alakenhe angkeke, “Nhenhe-arle ampe impene atyinhe-arle, ayenge-arle ikwere ahentye anthurre-arle ayenge-arle ikwere akangkentye anthurre-arle aneme.”

John 14:27

Yewe, the kwenhe arrenhantherrenhe impemele alhetyenhe, the kwenhe arrenhantherrenhe atnyenetyenhe, nhenge utnenge atnerre-ilemele. Itirremele anaye nhenge tharle akwetethe utnenge atnerre atnyeneme, alakenhe-arteke. Tyerrtye apmere ahelhe nhenhe-arenye areyele arrenhantherrenhe uyarne atnerre-ileme. The ware kwenhe arrenhantherrenhe atnerre-iletyeke nhenge arrantherre mwerre anetyenhenge. Kele atnerte akurne-irretyale anaye nhenge atere apeke-irretyale.

John 17:4

Ayenge apmere ahelhe nhenhele anetyame the kwenhe tyerrtye ingkirrekeke imerneke nhenge nthakenhe Unte-arle tyeperre anthurre aneme, the kwenhe nhenhe mpwareke arne areye anthurrele mpwaremele Unte-arle ayenge ileke mpwaretyeke.

John 3:16

Ngkarte kwenhe tyerrtye ingkirrekeke apmere ahelhe nhenhe-arenye ahentye anthurre aneme Rarle Alere ikwerenhe anyente ware apmere ahelhe nhenhe-werne anwerneke yerneke, kele yanhe-ngentyele tyerrtye ingkirrekele-arle nhenge renhe arratye itelareme areye kwenhe ilwetyakenhe aneme Ngkarte-ngentyele akngakelheme akwete-ante. Kele-anteyele itne Ngkartenge itethe alethe akwete anetyeke.

Acts 10:36

Arrantherre ingkirrekele ayeye mwerre itelareme anwerneke-arle antheke, Israel-ke-artweye areye. Ayeye mwerre re alakenhe, Jesus Christ tyerrtye ingkirrekeke piwelheke, re ilweke tyerrtye ingkirreke inetyeke, Re akngerrepate anthurre aneme tyerrtye ingkirrekeke, alakenhenge anteme re tyerrtye ingkirreke arntarnte-areme akurne-ketye anyente-irremele apurte anetyeke Ngkartenge. Arrantherre ingkirrekele ayeye nhenhe itelareme.

Romans 5:1

Ye, anwerne-arle Jesus arratye itelaremenge Ngkarte kwenhe anwerneke angkeke, “Arrantherre kwenhe arratye aneme Atyengenge ularre.” Ngkartenge ipeltye-irreke iperre, anwerne akangkemele anthurre anerlte-aneme iwenhenge-arle Alartetye Jesus Christ-ele anwerneke mpwarekenge.

Ephesians 1:6

Alakenhe arratye anthurre, anwerne akangkemele alyelhetyeke akwete Rarle anwerneke mwerre anthurre anemenge. Ngkarte kwenhe Jesus-eke ahentye anthurre aneme. Arrpenhele Renhe iletyakenhe Jesus apmere ahelhe nhenhe-werne yernetyeke, arrangkwe-arle. Re-arrpe itirreke Jesus apmere ahelhe nhenhe-werne yernetyeke.

Ephesians 2:4

Kenhe Ngkarte re akenhe mwerre akwete-arle aneme anwerneke. Alakenhe ikwerenge anteme Re akwete-ante arrenhantherrenhe itethe atnyeneme ilweketye. Arratye anwerne arne akurne areye mpwaretyarte Ngkarteke itirrewarretyakenhele. Alakenhe ikwerenge anteme anwerne Ngkarte-kenhe anetyakenhe, utnenge-kwenye-arteke anetyarte. Ngkarte akenhe anwerneke akwetethe-arle ahentye-aneke, anwerneke alhwarrpe-irremele, Re Christ ikwerele-arlenge anyentelhe-ileke anwerne itethe-ilirtnemele. Rarle anwernenhe akwenpele impetyakenhe aneke anwerne-arrpe apale-apale-irretyeke, Re anwerneke ahentye anthurre aneme-tetye.

Ephesians 2:7

Arratye anthurre, anwerne anteme aneme Jesus Christ-nge-arle anyente-irreke. Ngkartele anwernenhe itethe-ilirtneke Jesus-arteke tyerrtye arrpenhe areyele aretyenhenge Ngkarte-arle anwerneke mwerre anthurre aneme. Arrpenhe anwerneke mwerre akngerre anetyakenhe alakenhe-arteke.

Philippians 2:11

Anwerne ingkirrekele Jesus renhe utyernemele tnaketyenhe. Anwerne Jesus-nge arrekwele tnetyenhe akangkemele alyelhewarremele. Anwerne akangkentyele angkemele, “Unte-arle ingkirreke anthurreke Alartetye Impene-arle.” Alakenhe-arle mpwaremele anwerne Ngkarte akertne-ileme.

Philippians 2:13

Arrantherre nhenhe ulyeyele mpwareme Ngkarte-arle arrekantherrele-arlenge anerlenge. Rarle arrenhantherrenhe akaltyele-antherle-aneme arrantherre-arle aywerrkele mpwaretyenhenge iwenhe apeke renhe Re arrekantherre ahentye-aneme mpwaretyeke. Re arrenhantherrenhe ileme Ikwere arratye anerrirretyeke. Ikwere akwete warrke-irretyeke, kele imerte arrantherre Renhe akangketyeke mpwarewarremele.

Colossians 1:20

Alakenhe ikwerenge anteme Ngkartele tyerrtye ingkirreke-arlke arne ingkirreke-arlke ipeltye-iletyeke alkerele uthene apmere ahelhe nhenhele uthene. Re nhenhe renhe mpwareke nhenge Jesus-arle arne arntarlkweke-arleke tyerrtye ingkirrekeke ilwekenge alhwe ikwerenhe itneke thelelheke. Lyete anteme ingkirreke mwerre anetyenhenge Ngkartenge-arle ularre.

2 Thessalonians 2:16

Ngkarte uthene Jesus Christ uthene anwerneke ahentye anthurre aneme, anwernenhe mwantyele arntarnte-arerle-anerremele. Ngkartele anwernenhe rlterrke-ileme anwerne atere-irreme-ketye. Alakenhe ikwerenge anwerne akaltye anteme aneme nhenge anwerne-arle ilwemele, anwerne imerte itethe-irrirtnetyenhe awethe Ikwerenge-arle. Alakenhe ikwerenge anteme anwerne akwete Jesus Christ-eke angkemele Ngkarteke anteye Re-atherre arrenhantherrenhe rlterrke akwete atnyenetyeke nhenge arrantherre atere-atere akwete ware aneketye. Nhenhe ikwere ipenhele anteme arrantherre arratye itelaretyenhe mwerre ware anteme angkemele anetyenhenge.

Revelation 5:13

Ikwere iperrele anteme the arne ingkirreke alyelherlenge aweke Ngkartele-arle mpwarekeke, tyerrtye-arlke, atnunthe-arlke, thipe-arlke, irrpennge-arlke, arne ingkirreke apmere ahelhele-arle anemeke, alkerele-arlke, kwatye kwenele-arlke. Itne ingkirreke alakenhe alyelheke: “Tyerrtye ingkirrekele kwenhe yanhe renhe akertne utyernerlte-anemele tnaketyeke, renhe chair mwerre akngerrele-arle anerle-anemeke! Itne Yepe-Yepe Akwerrke akwetethe akertne utyernerlte-anemele tnaketyeke! Yanhe atherre kwenhe arratye mwerre akngerre aneme, nhenge arne ingkirreke ilyernpenye anthurre mpwaretyeke, Ratherre apmere arrpe-anenheke alartetye anerle-anerremele. Kele anwerne ikwere-atherre akangkemele artepe kwene-irremele, akwetethe alyelhemele, tnakemele anteye, akwetethenhe-akwetethe!”