Luke 15:8 - Angkentye Mwerre

⁸ Jesus-ele ayeye arrpenhe ileke itnenhene akaltyele-anthetyeke Ngkarte-kenhe iwerre-akerte. Re itneke angkemele, “The arrekantherre ayeye iletyenhe arelhe ikwere-akerte arrule-arle anetyarteke mane akweke ware-arle atnyeneke-akerte. Arelhe nhenhe mane ngkweltye 10 pele ware atnyeneke. Kenhe re mane ngkweltye anyente renhe aparlpe-ileke apmere kweneke. Arrantherre-ame nthakenhe itirrewarreme? Iwenhe-ame arelhe yanhele mpwaretyenhe? Re alkngenthe inemele, apmere arlkngemele, ngkweltye ikwere-arle akethe arrpe-anenhele untheme.

Luke 15:8 Iomraidhean Croise

Matthew 5:15

Kele alakenhe-arle, nhenge tyerrtyele apmere kweneke-arle lamp alkngenthe-ilemele, urtne akwekele artetyakenhe-arle anemele, kenhe re akenhe akertneke arrernemele-tetye ingkirrekele alkngenthe aretyenhenge.

Luke 15:7

Kele imerte Jesus angkeke, “Alakenhe re, arntyele Ngkarte-kenhe areye alkere akertnele anerrirreme-arle, itne akangkentye anthurre irrerirremele arerrirretyeke tyerrtye akurne anyente Ngkarte Ikwere-werne utepe-irrerlenge arratye mwerre Ikwere anemele. Itne arrpenhe arunthe anthurre arerrirreme Ngkarteke mwerre anerrirrerlenge, kenhe itne akangkentye awethe tyerrtye akurne anyente-arle Ngkarte-werne utepe-irrerlenge.”

Luke 15:9

Kenhe re mane ngkweltye renhe areke aparlpe-ileke-arle iperre re akangkentye anthurre irremele. Kele imerte re ikwerenheke-artweye areye inetye-alheke itwele-arle anemele itneke angkemele, ‘Ayenge-arteke akangkewarraye! The mane ngkweltye anyente renhe aremele tharle aparlpe-ileke!’ Alakenhe arelhe re angkeke.”

John 10:16

The yepe-yepe arrpenhe areye atnyeneme apmere nhenhe-arenye anetyakenhenge, itne kwenhe apmere arrpenhe-arenye areye. Ayenge itneke-arlke antangkeme-anteye ante itnenhe atyenge-werne akngetyeme apmere arrpe-anenhe-ngentyele. Itne angkentye atyinhe awetyenhe ante apetyetyenhe apmere nhenhe-arenye areyenge apurte-irremele. The-arrpe anteye itnenhe ingkirrekenge anyentelhe-iletyenhe itnenhe arntarnte-aretyenhe aharle anyente-arteke.

John 11:52

Re angketyamenge Jesus-arle kwenhe ilwetyenhe itneke-kwenye ware, Re kwenhe ilweme tyerrtye ingkirrekeke Ngkarte-kenhe-arle aneme-arle apmere ahelhe nhenhele, itne ingkirreke anyente anetyenhenge atyewenhenge ingkirreke anetyenhenge.

Acts 19:19

Arrpenheme Jesus-kenhe areyenge, artwe ngangkere arrengkwelthe akngerre anthurre anetyarte. Nhenhe areyele pweke ayeyele-arlenge atnyenetyarte nthakenhe itne tyerrtye areye akurne iletyeke. Itne anteme pweke nhenge areye akngetyemele anyentelhe-ileke imerte urele itemele tyerrtye ingkirrekenge arrekwele. Itne angkeke alakenhe, “Anwerne apwerte ngkweltye akngerre anthurre antheke arne nhenhe areyeke, apwerte ngkweltye 50,000-pele anthurre.”

Ephesians 2:17

Jew anetyakenhe areye, arrantherre Ngkarteke akutne anerrirretyarte. Kenhe anwerne Jew-arenye areye akenhe Renhe arratye-arle itelarerrirretyarte. Nhenge Jesus apmere ahelhe nhenhe-werne apetyemele, Re Ayeye Mwerre ileke arrekantherre Jew anetyakenhe areyeke anwerneke Jew-arenye areyeke-arlke, anwerne ingkirreke akangkentye mwerre anerrirretyeke.