Genesis 1:3 - Angkentye Mwerre

³ Ngkarte anteme angkeke, “Alkngenthe pwarrtyaye!” Kenhe arratye alkngenthe iparrpe pwarrtyerlenge.

Genesis 1:3 Iomraidhean Croise

Matthew 8:3

Kele Jesus-ele iltye ikwerenhele renhe anpeke, ikwere angkirtnemele, “The ngenhe angkwerre-iwetyeke ahentye-aneme.” Kenhe iparrpe anthurrele utyene akngerre uyerrerlenge, yenpe alyere-alyere-irremele.

John 1:5

Ure alkngenthe nhenge kwenhe pwarrtyeme ingwemerte renhe martemele anthurre. Ingwemertele uyarne alkngenthe ilwerneme. Alkngenthe nhenge re kwenhe alakenhe re akwete arrtyernerle-aneme nhenge ilwernelhetyakenhele.

John 1:9

Nhenge John-elarle tyerrtye areyeke ilerle-aperlenge, kenhe alkngenthe arratye anthurre akenhe apmere ahelhe nhenhe-werne apetyetyeke-urletye-arle aneke. Re kwenhe nhenge tyerrtye ingkirrekeke imernetyenhe nhenge Ngkarte Akngeye itelaretyeke, nhenge alkngenthele-arle imerneme tyerrtye areyeke nhenge nthakenhe akaltye anetyeke iwenhe ikwere-arle ingwemertele aneme.

John 11:43

Nhenhe re angkeke-iperre re arnterre anthurre arlkeke, “Lazarus arratintyaye!”

John 3:19

Nhenge alkngenthe apmere ahelhe nhenhe-werne apetyeke anwerneke imernetyeke Ngkarte-arle arratye anemeke, kenhe tyerrtye areye akenhe ahentye-aneme anthurre arne akurne akwete mpwarerlte-anetyekele, itne itelaretyeke ahentye-anetyakenhele nhenge Ngkartele-arle arrileme tyerrtye areyele-arle arne akurne mpwaremeke, itne kwenhe ahentye aneme arne akurne-akwete mpwarerlte-anetyeke.

2 Corinthians 4:6

Arrule anthurre kwenhe Ngkartele ahelhe nhenhe mpwareke nhenge angkemele-ante ware. Nhenge ingwemerte ware anerlenge Re angkeke, “Alkngenthe-irraye” kele alkngenthe anteme pwarrtyeke. Urreke anwerne Jesus-eke atyewe-irretyenhenge, anwerne ingwemertele-anteye-arle aneke. Ngkartele anteme anwernenhe alkngirreke Re-anteme alkngenthe Ikwerenhe anwerneke-arleke arrtyernetyeke nhenge yanhe-ngentyele anteme akaperte anwerne-kenhe altywere-ileke anwerne arratye itelaretyenhenge Ngkartele-arle anwernenhe itetheke mpwareke Christ-nge ularre.

Ephesians 5:14

Arrantherre akaltye aneme nhenge nthakenhe alkngenthele arne ingkirreke renhe imernerlenge nhenge ingkirrekele aretyenhenge, akurne areye arratelhe-ilerlenge-arle. Christ-ele anwernenhe alkngampelhe-ilekarle-iperre, anwerne itelarerrirretyeke arratye anteme aretyenhenge arne iwenhe-iwenhe apeke mwerre renhe, arne iwenhe-iwenhe apeke akurne renhe anwerne ingkirrekele itelaretyeke. Alakenhe ikwerenge anteme arrpenhe anyentele intelhe-ileke arrule anthurre, “Yewe, angwenhe ilweke-arle ipertele intemeke, akeme-irraye, itethe-irrirtnemele! Jesus Christ arrekantherre-arleke arrtyernetyenhenge.”

Ephesians 5:8

Itne alknge pwenge areye-arteke ingwemertele-arle anerrirremeke. Itne Ngkarte aretyakenhe, Ikwere akutne. Arrantherre itne-arteke aneke. Kenhe lyete anteme arrantherre akangkemele aneme Jesus Anwerneke-artweyenge, renhe arratye itelarerrirremele. Rarle arrenhantherrenhe alkngenthe Ngkarte-kenheke-arleke arrernekenge arrantherre yanhele anerrirretyeke. Alakenhe ikwerenge anteme arrantherre mwerre akwete anetyeke Ikwerenge.

1 Timothy 6:16

Rarle athewe ilwetyakenhele aneme. Rarle alkngenthe-arteke pwarrtyeme. Tyerrtye angwenhe apeke Ikwere-werne itweke-irretyakenhe aneme, Rarle akngerre anthurre anteme-arle anemenge. Tyerrtye arrpenhele Renhe aretyakenhe, arrpenhele Renhe uyarne areme. Alakenhe ikwerenge anteme anwerne Renhe akwete utyernemele tnaketyeke! Re-ante-arle ngangkere akngerre-akerte anemenge.

1 John 1:5

Angkentye yanhe anwerne-arle aweke Christ-ngentyele, anwerne arrekantherre ilemele alakenhe; Ngkarte kwenhe impene anthurre aneme. Re arne akurne apekele mpwaretyakenhele aneke. Re alkngenthe alkarle anthurre ingwemerte-kwenye-arle.

1 John 2:8

Kenhe angkentye nhenhe akenhe tharle arrekantherre ileme kwenhe arratye angkentye alkarle lyetenye anemenge. Angkentye alkarle aneme iwenhe-arle Christ-ele mpwarekenge alkarle anemenge, ante iwenhe-arle arrantherre mpwareme alkarle aneme. Lyete arrantherre arne akurne-ketye mpwarentye impelheke, arrantherre anteme arne mwerre areye arratye areye-arlke mpwarerlte-aneme-tetye. Alakenhe-arteke kwenhe arrantherre nhenge awethe ingwemertele anetyakenhe. Alakenhe-arteke-arle arrantherre nhenge alkngenthe akngerrele anemeke nhenge alkngenthe akngerre kele pwarrtyeme.