Josua 6:23 - Ạḍinya Iigbia

²³ Kụ ịyal phọ awe phọ ọghi bọ oḅiligha ẹmha phọ ọghi ọsighe Rehab, ọde phọ ọdi, onhiin phọ ọdi, bumor phọ ọdi rꞌoomo asiya phọ ọdi, ọsighe ọpham ọghi osiemi esi dị etuman rugbogo phọ Ịzirel kụ oseere bịdi.

Josua 6:23 Iomraidhean Croise

Emiighom 12:2

Mị kạngo ni eboom ẹemara etum ẹemara, bịdi koḍighi ni egbogh eelhe. Mị kạseph ni nyịna, aḍighi ịdi aḍien ạna keeleghaan kụ nạ aḍighi ḍịseph.

Emiighom 18:24

Eḍighi ịyaar dị oogh dị ạbuo aruukuan kụ odi ẹmha phọ, nạ kapiemi ni oomo ẹmha phọ? Nạ kạbilenaan ọphelom ooghdi awe phọ?

Emiighom 19:29

Rẹteeny bọ mem dị kopiemi rạmha phọ rꞌarere phọ ẹpe ạLot arugh bọ, kụ Ẹnaan ẹetughian Ebraham kụ ẹngo ẹereegh Lọt osuma ọghi ekpisi dị ịiḅaghami phọ kési.

Igbiighi 31:19

Tọrobo ọnyo anyina lọ aghiigh oye, rꞌọlo ạḅogh oḍim, pọ ạḍua sịen arugbogo phọ, ạghi arugh ẹnon ekpisi oḍual aḍughul-otu. Ẹman ịraar aḍughul-otu, nyina rꞌạbuen nyina esiphi bọ ekori eselemian siloor anyina, kụ remunughan oḍual aḍughul-otu phọ kụ ẹḅile kẹn eselemian siloor anyina.

Iiḍighi 10:28

kụ ạḅeni bịdi mọ, “Tọ nyina elegheri ni mọ iigbia ni dị ọlo aJu kaaḍikuan rꞌaruuruen. Kụ Ẹnaan miḍeenaan ịmi mọ kútoph oye ogbeph ukol mọ ạḅaphanya.

Iiḍighi 27:24

Kụ ụḅeni ịmi mọ, ‘Pọl, kákiilaan. Nạ kạmeera ni ghisigh aSiza. Pogh aani, Ẹnaan mẹtuan ẹmhu ạna eḍighi dị rꞌeniin ẹmhu ạbuphe rꞌạna oḍigh bọ oghuugh phọ képe.’

1 Bụo ạKorint 5:12

Mịna kakol bọ eeghe kụ asoph erugh apume bụphe rꞌayira ụ́moogh bọ mụḅoph phọ? Ẹkpe ghụn dị nyina kesophonaan ọoruen bụo ogbo phọ anyina.

Bụo ạEfesos 2:12

Mem mọ ọpo nyina ịkelan ni Kraist. Nyina iḍighi ruuruen, kụ ị́moogh dọl sịphe ạbuphe Ẹnaan ẹsaḅar bọ ẹseph. Nyina ípin aani bin ạraraar phọ ịpe Ẹnaan eguanaan bọ sịphe ịyo phọ oghiran yogh bọ. Nyina ịrol ghan ni sịen aḅirini phọ bịn, oḍuom ologhi ị́moogh, ḅịle kẹn Ẹnaan ílegheri.

Bụo aHibru 11:31

Omeeraam kụ aḍighi bọ ịyaar phọ úkiigh aani bọ Rehab oliom ẹmha phọ, ịdipho ạbuphe ụ́naghanan bọ Ẹnaan, ịdi eḍighi bọ ọdi ạlogh ni otu we phọ oru bọ iḅiligha phọ.

Bụo aHibru 11:7

Omeeraam kụ aḍighi bọ ịyaar phọ aNoa ạnaghanan bọ ni mem mọ Ẹnaan ẹphur bọ nyọdi rụru ịlo ạraraar phọ kemiteghu bọ kụ ọdi kọ̋miin bọ. Ọdi ạnaghanan ni Ẹnaan kụ ạka bọ oboom oghuugh phọ ạphel bọ nyọdi rꞌọto ọdi atene. Ịphen dị aḍighi bọ kụ igananami bọ emeeraam aḅirini phọ. Ẹnaan ịtuan omeeraam mọ ọdi kụ ẹsighe bọ nyọdi mọ oye aruukuan ni.

Josua 2:13

Iguanaan ịmi mọ nyina kẹpel li ghuḍum ọde phọ ạmi rꞌonhiin phọ ạmi rꞌabumor phọ ạmi, nmạriir rꞌalephiri, rꞌoomo arughunotu phọ ạbidi. Kémeera ụze iyoor.”

Josua 2:16

Kụ ạḅeni bịdi mọ, “Ịki ẹpe aroogbolom mọ ọbo bụphe riphorogh bọ inyina kizuan ghan bọ inyina eten, kụ ạaghian ẹpe phọ ịraar aḍughul-otu tụtu bụphe riphorogh bọ inyina oḅula kụ egbi nụun ọghi ẹlo anyina.”

Josua 2:18

Ịphen kụ ịdi nạ kaḍighi. Mem dị yoor moru osi sịen ade phọ, kạgh ọtogh-tọgh oḍigh phọ ọphon ekulha eghuugh esi phọ nạ useere bọ iyoor. Mạgh ọde phọ ạna rꞌonhiin phọ ạna rꞌabumor phọ ạna rꞌoomo eghunotu ọde phọ ạna bịdi ookpomoghan otu kꞌạna.

Bụo Ịiruen 1:25

Kụ ọdi aḍeenaan. Pọ kụ amem dị arughunughun Ifraim rꞌạBenjamin ọze oomo awe ẹmha phọ, kụ osugheeny oye phọ aḍeenaan bọ bịdi eten phọ. Bịdi oye phọ rꞌọto ọdi ịyaar úḍighi.