Joel 1:13 - Ạḍinya Iigbia

¹³ Ịkpologhian rụsuoma ọto kụ emoghi, nyina ariil ạrikia phọ, bụphe okumu ghan bọ sịphe enmeny phọ! Iḍigh Otu Ịiḅereghi phọ kụ emoghi oomo aḍughul phọ! Ịbiakpa rꞌamiim ílho mun ọngo Ẹnaan phọ anyina.

Joel 1:13 Iomraidhean Croise

2 Sạmuel 12:16

ADevid ạaḅereghi ni Ẹnaan mọ ọony phọ aḍum. Ọdi ómeera olhe ịyaar, kụ tọrotoro aḍughul ọdi aḍigh osoph ọdi kụ ạmina ude.

1 Ạbudaam 21:27

Mem dị Ehab ạnaghan bọ ịpe Ilaija ạghaaph bọ ạḅeni nyọdi kụ ọdi ạphaanyi rukpe ọdi, kụ ạsighe rukpe-ọto amunughian, aghin ómeera olhe eḍien akururu rạḅooma.

Azaya 22:12

Egbogh Ẹnaan Oomo Ịikpo Ọmoogh-we phọ ịmagh ghan inyina mem mọ ọpo mọ imoghi rꞌọto, ịlo oghula ạrumhu anyina kụ oonmenan iinmenan ọto.

Azaya 61:6

Kilegheri inyina mọ ariil ạrikia Ọmoogh-we phọ, Abutelhedom Ẹnaan phọ ayira. Nyina kẹkelom ni ẹelha areelhe phọ Kụ ebaga mọ meḍighi ẹlo anyina.

Jerimaya 4:8

Kụ iḍighi kụ ịkpologhian rụsuoma ọto. Ẹḅile emoghi ẹlooghi, loor esi dị ogbogh ọghagh ologhi Ọmoogh-we phọ kọ̋ḍua esi aJuda.

Jerimaya 9:10

Mị ụḅem mọ, “Mị kamoghinaan ruugum mọ, ḅịle kẹn rꞌạroogho phọ, loor esi dị bịdi mẹnuughi ḅịle kẹn oye ráten ghan mun ẹpe phọ. Rọ́naghan ghan mun ẹḍogh ịnam; ịnun rꞌilhom ịnam mesumughu.”

Izikiel 21:12

Moghi esi amukum ologhi, Oye dị kamugh ni; elhool ẹgham mọ ẹphen oseere ẹlo awe phọ ạmi rꞌẹlo oomo abuḍiemiom mọ Ịzirel. Kọze bịdi ọḅaram oomo ạbueri phọ awe phọ ạmi.

Izikiel 27:31

Bịdi ọtuan nyịna okula rụmhu kụ oonmenan rukpe-ọto. Iloghi ạbidi ị́ḅaal kụ romoghi.

Izikiel 7:18

Bịdi kọkpologhian ni iinmenan ọto kụ ookpeka iboom. Rụmu ạbidi kokul li kụ oomo ạbidi kosiphe umugholoor.

Hosia 9:5

Kụ ẹteeny mem dị kole rạyaal oghueniom Ọmoogh-we phọ, bịdi koḍighi eeghe mem mọ ọpo?

Joel 2:12

Ọmoogh-we phọ ạḅem mọ, “Nyịidipho, ikiton rꞌoomo ologhi eḅula esi ạmi ẹḅaram ọkaagh ẹḍogh rꞌemoghi, rꞌọto.

Joel 2:14

Iini Ọmoogh-we Ẹnaan phọ anyina kanme ni ologhi ọdi kụ ịsephom inyina rꞌiimuma dị ẹmanam. Kụ nyina egbi ọngo ọdi ịbiakpa rꞌamiim.

Joel 2:17

Ạbupinyon rịkia phọ rokumu bọ Ọmoogh-we phọ ogbo enmeny phọ rꞌeḍighom Otu phọ, omoghi ni kụ ọoḅereghi: “Mọogh ọnma ighirigiir esi awe phọ ạna, Ọmoogh-we. Kámeera ịnon areelhe ụḅitonaan iyira kụ ụnmoghoghoom iyira esi ọḅem ghan mọ, ‘Ẹnaan phọ anyina edi ẹghen?’”

Igbiighi 28:14

Ẹlo ẹkia ịpughol, ịsighe ịyal ạkarama amiim emoorom, tọrobo aḍilephiri ạnam; ịsighe oniin rꞌegbem ạkarama emoorom odughuna; ịsighe oniin ọtoom emoorom, tọrobo ọony oyool-ọga. Ẹphen phọ ẹkia oguom ạnian, ẹlo ụnwanyu atum ụnwanyu ạlha phọ, kụ ịdi kọpighironaan ghan.

Igbiighi 28:4

Oniin ọony oyool-ọga ạphighironaan ghan ḍịroor, ọphori ạphighironaan ghan dulhe.

Igbiighi 28:7

Ẹlo ẹkia ịpughol phọ dị ọḅaram ọḅel ọony oyool-ọga phọ, ịsighe eniin eeku amugbagara amiim emoor sịphe Ogbogo Ạdol Ọmoogh-we phọ.

Igbiighi 29:6

Ẹkia dị nyina keguom ghan nịan aḍio etum ḍio phọ rꞌẹpe ịbiakpa phọ rꞌẹpe ịpughol phọ rꞌẹpe ạḍiḅel aḍio ụnwanyu phọ rꞌịphen phọ kụ ịdi nyina kẹpinyon ghan. Ịphen phọ ạrikia eeḅi eḍu dị ọphighironaan Ọmoogh-we phọ.

1 Bụo ạKorint 4:1

Ịsighenom mọ yoor awe oḍighi aKraist dị Ẹnaan mẹḅogh ịpe ịbooghian phọ ọdi ẹlogh ḍịghaagh.

1 Bụo ạKorint 9:13

Tọ nyina elegheri ni mọ bụphe roḍighi ghan bọ oḍighi Otu Ịiḅereghi phọ rọmoogh ghan eḍien ạbidi sịphe, ḅịle mọ bụphe rọpinyon ghan bọ rịkia sịphe enmeny ịyaar aghuḍum mọ role aani ghan ni bin ạrikia phọ.

2 Bụo ạKorint 11:23

Mọ bụno bụo oḍighi aKraist? Mị odi aani ni. Ẹkigh mụdi mị ụbomoghan, kụ ạri mị kụ oomo phọ ịdi. Mị kụ mạkpar ḍịghaagh apu. Mị kụ magbor ạtol ikoli. Mị kụ ọdi ụ́gba mem ọguroghom ịkpara. Mị kụ magbor ghan amuzaan ḍuugh.

2 Bụo ạKorint 3:6

Ọdi kụ uḍighi bọ iyoor we dị ọman ọghaaph ghan ịlo imoom ịyo phọ ọḅeni awe. Ịko imoom ịyo phọ ụ́koom iilogh dị ọgeeghi oseere. Ịko phọ ịlo aruwaloor. Iilogh phọ ọgeeghi bọ oseere rẹkom ghan ḍuugh, kụ Uwaloor phọ rạngo ghan ghuḍum.

2 Bụo ạKorint 6:4

Kpạripe ghụn, tọrobo ịlo ẹrol, mꞌịminimiin, mꞌịiḅaghami, mꞌẹkparam, mꞌikuphogh, mꞌikoli, mꞌịgbaragbara, mꞌọkpar aloor, mꞌẹnaani aḍughul, mꞌọkoony, yoor obigh ni ekpom oḍighi ghan rꞌoḍeenaan mọ yoor roḍighinaan ghan Ẹnaan.

Ogonanami Phọ 11:3

Mị katom ni ịyal ạbugbaanaan ạmi dị oonmenan iinmenan ọto, kụ bịdi kọkaaph ni ịpe Ẹnaan egananami bọ tụtu oniin ọonir ịyal okuron rꞌodiinydi aḍughul-otu phọ memunughan.”