Jerimaya 4:4 - Ạḍinya Iigbia

⁴ Ịmaar eeko ịyo phọ nyina eghiran bọ rꞌạmi Ọmoogh-we phọ anyina, ẹḅile ẹḅogh siloor anyina ịngo ịmi, nyina aweye aJuda rꞌaJeruselem. Eḍighi ịyaar dị nyina ímeera, ọghagh ologhi phọ ạmi kaamor ịdipho ạnian loor esi ịkaraph phọ nyina meḍighi bọ. Ọghagh ologhi phọ kaamor ri, kụ oye ólho dị katue aḍime.”

Jerimaya 4:4 Iomraidhean Croise

2 Krọnikuls 34:25

Bịdi mughel ịmi kụ oḍighi rịkia ọngo ịnon ạrumugh, kụ mosumeeny ophin ologhi ạmi esi oomo ịpe bịdi moḍighi bọ. Mọozaghami ophin ologhi ạmi esi aJeruselem, kụ kámeleghu.

Azaya 10:17

Ẹnaan ạḍiḅaal phọ Ịzirel keḍighi nịan. Oye Aghuḍuul phọ Ịzirel kaḍighi nem ạnian dị ḍiniin aḍio bịn kele ni oomo ạraraar ẹman, ghạlamo iitoor rꞌiiḅurom.

Azaya 30:33

Mem dị meten ebia, uukolobian ni ekpisi dị aḍiboom ạnian kele ọdaam eelhe phọ Asiria. Esi phọ ẹkel kụ ẹtegh, kụ okpol egu ịpe ḍi aḍiphooghu Ọmoogh-we phọ kẹkpooniom nịan.

Azaya 51:17

Jeruselem, sụma! Zạamian loor ạna aḅetenu! Nạ mạphugholom ẹgo ạmuum ẹliomom dị Ọmoogh-we phọ ạsighe ọghagh ologhi ạngoom nyịna ọphugholom; Nạ ạphughol ạmadan bịn amiigh ọbelebele.

Jerimaya 15:14

Mị kaḍighi ịdi bịdi kokumu ẹpomoghian phọ ạbidi eeruen ekpisi, loor esi dị ạghelhe phọ ạmi ạkigh nịan, dị keemor kꞌagee-pọ.”

Jerimaya 21:5

Mị kạsighe ni oomo ịikpo phọ ạmi, rꞌophin ologhi phọ ạmi, rꞌạghelhe phọ ạmi, ḅịle kẹn rꞌọghagh ologhi phọ ạmi kụ abian ẹgham mọ rꞌạna.

Jerimaya 23:19

Ọghagh-ologhi phọ ọdi ạkigh oghim, ogbogh oghim dị kakim ạnyu ạrumhu ạbukaraph awe phọ,

Jerimaya 36:7

Iini bịdi kọoḅereghi Ọmoogh-we phọ kụ ọbileghi ịkaraph areten phọ ạbidi loor esi dị Ọmoogh-we phọ mạnya ọlhiom awe phọ ạbuen oboom ọghagh ologhi.”

Jerimaya 44:22

Ḍio phọ arodon ade phọ anyina mẹphu kụ rꞌoye ólho mun sịphe. Mẹḅile eḍighi esi dị eeph ọmiin kụ awe ọsighe ḍien phọ oḍighi ịlo itonyonaan loor esi dị Ọmoogh-we phọ órue mun ọ́kparam sịpioghom mọ rꞌẹkaraph eḍighinom ịyaar phọ anyina.

Jerimaya 9:25

Ọmoogh-we phọ ạḅem mọ, “Amem retu ni dị mị kạliom weye phọ Ijipt, Juda, Idom, Amon, Mọab bịle kẹn rꞌaweye ẹpe ẹdala phọ, bụphe oghula yogh bọ rụmhu phọ ạbidi. Oomo phọ ạbuen phọ oḍuna yogh ni, kụ ọlo ụ́pamanam ịyo phọ ịpe oḍuna phọ aḍeenaan bọ. Rꞌoniin ọnyo ạbuen phọ ḅịle kẹn rꞌoniin oye ọlo Ịzirel ólho dị ạphamanam ịyo phọ ạmi.”

Ịkunuma 4:11

Ọmoogh-we phọ amitiom oomo ophin ologhi phọ ọdi; ọdi ạsu nịan ẹpe Zạyon dị elhe ẹmha phọ kꞌude.

Izikiel 16:38

Mị kasoph ọoruen aphume nyịna esi olhe ẹmha rꞌọko enu, kụ esi ọghagh ologhi ạmi rꞌekpom mị kạliom nyịna rꞌaḍuugh.

Izikiel 18:31

Ịbile oomo ịkaraph phọ nyina reḍighi ghan bọ, kụ ẹmooghaan siloor anyina imoom iloghi rꞌarokpom. Iḍighi ika kụ nyina ạbuo Ịzirel rẹwa bọ omugh phọ?

Izikiel 20:33

“Ọkaraghi agey ni ịduon mị Ọmoogh-we dị ạmoogh oomo ịikpo phọ kụ aru bọ Ẹnaan dị edi ghan, mị ịphur inyina rụru mọ mị kịdaam inyina rꞌạḍiikpara ạḍighaagh rꞌoomo ịikpo phọ ạmi.

Izikiel 21:17

Mị kẹn kakpoolha rạghaagh ạmi, bịn ọghagh ologhi phọ ạmi mamuneen. Mị Ọmoogh-we phọ kụ mạḅem.”

Izikiel 24:13

Jeruselem, iiḍighi olhe ẹmha ạna mẹepu nyịna. Ghạlamo ịduon mị ạkparagha bọ ịlo ọosa ạna, nạ ụrolanaan ni esi ẹ́ḅaal. Nạ kạ́ḅaal mun tụtu nạ aloghoma ịdi ẹmanam ịikpo ọghagh ologhi phọ ạmi.

Izikiel 24:8

Mị mạwile ịḅaal sịphe, esi dị kọ́booghi, ekpisi dị ọdi rạwa oḅulemian rꞌọghagh ologhi.”

Izikiel 44:7

Bịdi mọopu Otu Ịiḅereghi phọ ạmi ịdipho bịdi ọngo bọ ọgel kụ aruuruen dị úḍuna, awe dị ịmi ụ́naghanan, kụ oḍigh Otu Ịiḅereghi phọ mem mọ ọphinyon ghan bọ ẹnuum rꞌịḅaal ạrikia mọ rụngo ịmi. Ịduon phọ pọ awe phọ ạmi mogbonyon ịyo phọ ạmi esi oomo ạraraar isa phọ bịdi moḍighi yogh ghan bọ.

Izikiel 6:12

Bụphe ọkelan bọ komeelom ẹzegh kụ omugh; bụphe oosulom bọ ẹgham kụ kẹze; bụlo osugha ọkoony kụ kạze. Bịdi kologhoma ni oomo ịikpo ọghagh ologhi phọ ạmi.

Izikiel 8:18

Bịdi kologhoma ni oomo ịikpo ọghagh ologhi phọ ạmi. Mị kạ́bilenaan bịdi mꞌoḍeenaan ạbidi rꞌẹnum ọnma ighirigiir. Bịdi kọlooghi ịiḅereghi ụngo ịmi ịlo bịdi kotue, kụ ọlo mị káler rụru ạ́ngo bịdi.”

Lịvitikos 26:28

pọ mị kạtuugh ni ịdipho phọ ịgbatanaan inyina rꞌọghagh ologhi, kụ mị ạḅile ịliom inyina oḍual amem ịdi ẹkpar epu ịḅel phọ.

Lịvitikos 26:41

kụ mị phọ kẹn mạgbatanaan ni bịdi ratelhe ḍịo ạmi, mị ạsighe bịdi ạki ạlogh sịphe areelhe ạbumulogh-ḍien phọ ạbidi. Eekuna phọ, mem dị ạnmuny ạnmuny phọ anyina osooromi loor kụ kosereghian ologhoma ịminimiin ạsipioghom mọ ạbidi rꞌiloghi phọ ạbidi úḍuna yogh bọ,

Ẹmos 5:6

Ịki esi Ọmoogh-we phọ, nyina kẹmoogh ni ghuḍum. Eḍighi ịyaar dị nyịna ị́ki, ọdi kaakuom nịan we phọ Ịzirel. Ạnian phọ kele ni we phọ ạBetel, kụ oye ólho dị katue aḍime.

Zẹfanaya 2:2

kụ ogbi ophorogh anyina mụdi ịpherepher dị ookuugh aphula, kụ ophin ologhi Ọmoogh-we phọ agbi ọteeny anyina, kụ egbi ọteeny aḍio dị ọdi kaḍeenaan ophin ologhi ọdi.

Bụo aRom 2:25

Nạ raako ghan Ologh phọ aMozis, pụruku oḍuna phọ ạna aḍeenaan mọ nạ maghiran ịyo rꞌẸnaan. Ịdipho ílho, pọ nạ odimom ni oodu.

Dutoronomi 10:16

Kụ iḍighi kụ iḍuna yogh iloghi phọ anyina ẹwile oḅom ẹmhu,

Dutoronomi 30:6

Kụ Ọmoogh-we Ẹnaan phọ anyina aḍunogh iloghi phọ anyina rꞌiloghi ạnmuny phọ anyina, ọbo nyina ẹphomoghian Ọmoogh-we Ẹnaan phọ anyina rꞌoomo iloghi phọ anyina rꞌoomo aruwaloor phọ anyina, ọbo ẹrol ebia.

Dutoronomi 32:22

Mọkpooni nịan otumeriom ọghagh ologhi phọ ạmi, nịan dị keemor esi kꞌẹpe ude ooni ạnian phọ, dị keemor ele epiemi aḅirini phọ rꞌaruphua phọ ọdi, kụ mị ạsighe nịan ạlogh ude aruugum mọ.

Bụo ạKolosi 2:11

Mem mọ nyina emeeraam bọ Kraist, Ẹnaan ịngo ni inyina elegh olegheriom mọ nyina awe ọno. Iḍun kụ elegh phọ Ẹnaan eseenaan bọ bụo aJu phọ. Ịpe anyina ị́moogh ịyaar oḍighinom aḍizu phọ. Eḍighi ghụn dị aKraist mamurion ịkaraph ạruuphua phọ anyina aroph.