Jerimaya 10:6 - Ạḍinya Iigbia

⁶ Ọmoogh-we, oye dị ạghigh nyịna ólho; nạ kụ ogbogh, ḅịle kẹn aḍien phọ ạna ẹbugh ẹḅile ẹmoogh ịikpo.

Jerimaya 10:6 Iomraidhean Croise

2 Sạmuel 7:22

Pọ eeghe ọdo ịdi nạ ạbugh, Ogbogh Ọmoogh-we phọ. Oye dị ạghigh nyịna ólho; yoor molhegheri ni mọ nạ bịn kụ Ẹnaan.

1 Krọnikuls 16:25

Ọmoogh-we phọ ạbugh ni iboom kụ ạkpe ni ooseeny iboom; ọdi ạkpe oghueni opuemi oomo ạrumugh.

Nehemaya 4:14

Mị ụmiin mọ aruugu rasiph we phọ, kụ mị ạḅeni bịdi rꞌabuḍiemiom mọ rꞌạbuo iiḍighi phọ ạbidi mọ, “Kékiilaan ẹpomoghian phọ ayira. Ịitughian ịpe Ọmoogh-we phọ ạman bọ esi eegu rꞌịikpo, kụ eghol we ẹmha phọ anyina, nmụny anyina, nmạriir anyina rꞌaruutu anyina eeghi ẹgham mọ.”

Nehemaya 9:32

“Ẹnaan, Ẹnaan phọ ayoor, pọ eeghe ịdi nạ ạbugh! Pọ eeghe ịdi nạ aḍigh eegu, ạḅile ạmoogh ịikpo. Nạ ạkar raako ghan ruguanaan ịyo phọ nạ aghiran bọ. Emiigh kꞌamem mọ ạbudaam Asiria phọ ụkpiloghom bọ iyoor kụ kꞌạnyiidipho ni, ọmiinom mọ ayoor mạbugh ni iboom! Ạbudaam ayoor rꞌabuḍiemiom rꞌariil ạrikia rꞌariil kꞌẸnaan, ạburude ạburude rꞌoomo awe phọ ayoor mọmiinom ni. Tụutughian ni oomo ịpe yoor mọmiinom bọ.

Ạsuor 145:3

Ọmoogh-we phọ ạbugh ni kụ ạkpe oboom agey; igbogh phọ ọdi ẹpughan ọnaghan.

Ạsuor 147:5

Ogbogh dị ạmanam kụ Ọmoogh-we phọ ayira. Ologhi ọdi kótue ọtooghi.

Ạsuor 35:10

Oomo ịḅarara ạmi kepuru ghan mọ, “Ọmoogh-we, ạnhian rꞌạna kụ iileeny, ọpo ạphel bọ uwekulom ạsighe rạghaagh ạbuphe ọmoogh bọ ịikpo opu nyọdi, uwekulom mọ rꞌọpo ekuom bọ esi ạbuphe rọgbiphoghom bọ nyọdi?”

Ạsuor 48:1

Ọmoogh-we phọ ạbugh ni. Ạman ni lọ yira kooseeny ghan sịphe ẹmha Ẹnaan phọ ayira, eegbolom iigbia phọ ọdi.

Ạsuor 96:4

Ọmoogh-we phọ ạbugh ni iboom kụ ạkpe ni ooseeny iboom; ọdi ạkpe oghueni opuemi oomo ạrumugh.

Ẹḍua 15:11

“Ạnhian kụ ạḅile ạghigh nyịna, Ọmoogh-we, sịphe oomo ạrumugh phọ? Ạnhian kụ ạghigh nyịna, rꞌeegu, rꞌiigbia, rꞌoḍighi yogh ịiḍaany?

Ẹḍua 8:10

Kụ ọdi ạḅem mọ, “Iḍue.” AMozis ameera mọ, “Ẹrol li ịdipho nạ ạḅem bọ, ọbo nạ alegheri mọ ẹnon ẹnaan dị epu Ọmoogh-we phọ Ẹnaan phọ ayoor ílho.

Ẹḍua 9:14

Egi phọ ẹphen mị kạ́liom we iiḍighi phọ ạna rꞌawe eelhe phọ ạna bịn, mị kạḅaram ni nyịna ọbo nạ alegheri mọ ọnon ọlo uuleeny ịmi sịen aḅirini phọ ólho.

Azaya 12:6

Oomo awe phọ orugh bọ sịphe Zạyon ọlo kụ ọmoor ghan! Oye Aghuḍuul phọ Ịzirel ạbugh ni, kụ ọdi odi ghan igbo awe phọ ọdi.”

Azaya 40:18

Ạnhian kụ ẹdi kọtomaam bọ Ẹnaan? Ika kụ ẹdi nạ kạkaaph bọ mọ ọdi ạtol?

Azaya 40:25

Ạnhian kụ ẹdi kọtomaam Ẹnaan Iigbia phọ? Ọnon oye odi ni dị ạghigh nyọdi ḍụghum?

Azaya 46:5

Ọmoogh-we phọ rạḅem ghan mọ, “Ạnhian nyina kịtomaam bọ ịmi? Ọnon odi ni dị ụghigh ịmi ḍụghum?

Azaya 46:9

Ịitughian ịpe emite bọ mem dị mebia; imeeraam mọ mị bịn kụ Ẹnaan kụ mọ ọnon ólho dị ụghigh ịmi.

Jerimaya 10:16

Ẹnaan phọ ạJekob ọ́ghigh bịdi; ọdi kụ ạlhem bọ oomo ạraraar phọ, kụ ọdi mạsaḅar Ịzirel mọ oḍighi weye ọdi. Ẹnaan Oomo Ịikpo Ọmoogh-we phọ kụ aḍien ọdi.

Jerimaya 32:18

Nạ maḍeenaan ẹphomoghian dị rébi ghan ạngo ịbadi ạsimuunir, kụ ọlo mạḅile kẹn ni ạliom weye loor ịkaraph ạburude rꞌaburunhiin phọ ạbidi. Nạ kụ Egbogh Ẹnaan dị ẹmoogh ịikpo, Ọmoogh-we phọ.

Dạniel 4:3

“Ịpe eeghia iboom imananaan dị Ẹnaan riḍeenaan ghan iyira! Ịpe eeghia ịikpo dị edi esi ịiḍaany phọ ọdi! Ẹnaan kụ ọdaam kꞌagee-pọ; ọdi kụ kạda oomo amem.

Dạniel 4:34

“Mem dị oḍual ạsia phọ meten,” ọdaam mọ ạḅem mọ, “Mị uphogh ni okuaḍio phọ, kụ aloghoma loor. Mị agbi oboom Ọkaraghi Egbogh Ẹnaan phọ rꞌọngo ghan rughuenian rꞌigbogh nyọpo odi ghan bọ kꞌagee-pọ. “Ọdi kạda kꞌagee-pọ, kụ ọmar phọ ọdi ạtol ghan kꞌagee-pọ.

Malakai 1:11

Awe aḅirini phọ emiigh eniin eekuna ẹghi esi ẹpheri phọ rụngo ghan ni ịmi rughuenian. Tọrotoro ekpisi bịdi rọsu ghan ni ịmuwa kụngo ịmi kọḅile ọphinyon igey ạrikia kụ ụngo ịmi. Oomo phọ ạbidi rụngo ghan ni ịmi rughuenian!

1 Bụo ạKorint 8:6

yira ọmoogh bọ eniin Ẹnaan bịn, Ọde phọ ạlhemogh bọ oomo ạraraar phọ, ọpo roḍighi bọ oḍighi phọ kọngo; ḅịle kẹn yira ọmoogh bọ oniin Ọmoogh-we ạJizos Kraist, ọpo ọtuan bọ kụ ọlem oomo ạraraar phọ, ọpo aḍighi bọ ịyaar phọ yira odi bọ.

Dutoronomi 32:31

Ạbumulogh-ḍien ạbidi olegheri mọ aruru ạbuno ị́moogh ịnyaam, ị́kigh ịdipho Ẹnaan Ịzirel phọ ẹpe ẹmoogh bọ ịikpo.

Dutoronomi 33:26

“We Ịzirel, egeny ịyaar ílho dị ẹnighe eeleeny Ẹnaan phọ anyina; dị rakiil ẹpe kꞌạke oru ọloghonaan anyina ḍịghaagh, rꞌigbogh phọ ọdi.