Dutoronomi 13:1 - Ạḍinya Iigbia

¹ “Eru mạar dị nyina ẹmoogh sịphe ogbo phọ anyina oyil-aḍien mꞌọmalhaam rạmalha dị ramiteghom ghan reḍeenaan rꞌịiḍaany;

Dutoronomi 13:1 Iomraidhean Croise

1 Ạbudaam 13:18

Kụ okumoor oyil ọlo ạBetel phọ ạḅeni nyọdi mọ, “Mị phọ oyil aani ni ịdipho ạna, kụ ọokpaany kꞌẸnaan kụ ụḅeni ịmi mọ mị ụpam nyịna usiom otu alhe eḍien, ạphughol mụum.” Ịphen ọdi ạghaaph bọ ạḅeni nyọdi ọkpe ni.

1 Ạbudaam 13:19

Kụ oyil ọlo aJuda phọ ạdaph okumoor oyil phọ ạghi asi otu, alhe eḍien phọ, ạphughol mụum.

Asidogh 30:6

Nạ aghophora mọ ọdi ạḅem ịyaar dị ọdi ụ́ḅem, ọdi kạlhiom ni nyịna kụ aḍeenaan mọ nạ oye ọkpe.”

Azaya 9:15

Ikumoor rꞌikpolom awe kụ ẹmhu phọ — kụ ẹsoph phọ pọ ariil ịtughemi ọkpe phọ!

Jerimaya 23:11

Ọmoogh-we phọ rạḅem ghan, “Ariil phọ rꞌariil ạrikia phọ Ẹnaan úlegheri; mị masiphom bịdi dị roḍighi yogh ịkaraph ọkaraghi ịsiphe Otu Ịiḅereghi phọ.

Jerimaya 23:32

Iler rụru ịphen mị Ọmoogh-we phọ rạḅem bọ! Mị akiriom ni riil phọ ạbuphe rọgba ghan bọ mạlha ọkpe phọ ạbidi. Bịdi obaga rọgba ghan mạlha ọkpe phọ ạbidi kookeleghiom weye phọ ạmi. Mị kụ bịdi útom mụghumo ọto ọngo ạbidi mọ ọghi, ḅịle kẹn bịdi úḍighi ọloghonaan ạḍighaagh esi awe phọ ạmi rꞌẹnum. Mị, Ọmoogh-we phọ, kụ mạḅem.”

Jerimaya 27:9

Kẹ́naghanan riil phọ anyina rꞌạtorobo oye lọ ạḅem mọ ọno katue ni ạmiin uḍien, mꞌesi ạramalha, mꞌesi ọmagh aruwaloor awe lọ momuughu, mꞌesi ịiḍaany. Oomo ạbidi ịḅeni inyina mọ késooromi siloor ẹngo ọdaam-eelhe phọ ạBabilon.

Jerimaya 29:24

Ọmoogh-we Egbogh Ẹnaan phọ Ịzirel urom ịmi dom ọḅeni aSemaya ọpo aNehelam, ọpo mạghiomanaan bọ ḍịnya esi aḍien ọdi oomo awe aJeruselem ḅịle rꞌạZefanaya ọony aMaaseya ọpinyon rịkia phọ rꞌoomo phọ ạbueri phọ ariil ạrikia phọ. ASemaya ạge ạghiom Zẹfanaya mọ,

Jerimaya 29:26

“Ọmoogh-we phọ ạsaḅar nyịna oḍighi ọpinyon rịkia dị kạsighe esi phọ ạJehoyada, kụ nyịidipho nạ kụ ogbogh ọnyo iiḍighi sịphe Otu Ịiḅereghi phọ. Eḍighi oḍighi ạna ọmiin mọ tọrobo ọpirighi lọ akue ạḅem mọ ọno oyil, kọphaḍiom nyọdi izime kụ ọlogh ọla okuron orum ọdi.

Jerimaya 29:8

Mị Ọmoogh-we Ẹnaan phọ Ịzirel rịphur inyina rụru mọ kémeera ariil phọ odi bọ igbo anyina iikeleghi inyina, ḅịle kẹn rꞌạbunon lọ ọḅem mọ bụno kotue ọkaaph ịlo kemite iḍue. Kẹ́naghanan rạmalha ạbidi.

Jerimaya 6:13

Tọrotoro oye, bugbogh rꞌạbubam, robianan ghan ọmoogh ikpoki ịkaraph areten; ghạlamo ariil Ẹnaan phọ rꞌariil ạrikia phọ bịn roogbegheḍiom ni weye phọ.

Izikiel 13:23

Esi ịduon phọ nyịidipho uḍien ọkpe phọ anyina rꞌịkaraph ịmiin phọ anyina meten. Mị rạtagharan we ạmi kạsighe esi ịikpo phọ anyina, ọbo nyina elegheri mọ mị kụ Ọmoogh-we phọ.”

Zẹkaraya 10:2

Awe rọki ghan idike esi ịkaaghineen ạraraar ḅịle rꞌesi ạpiiph-pịiph, kụ ọlo ọphagharanaan dị bịdi rọmoogh ghan eḍighi ọkpe dị ụ́moogh ịyaar oḍighinom. Buniin rọgba ghan mạlha lọ oye ạmalha, kụ ọlo riikeleghi ghan ni inyina bịn; ịidereghi phọ bịdi rọngo ghan bọ ị́moogh ịyaar oḍighinom. Kụ iḍighi kụ awe phọ royeela ghan bọ mụdi iyool-ịga dị mephe. Bịdi odi esi ịiḅaghami ịdi eḍighi bọ bịdi ụ́moogh oḍiemiom.

Zẹkaraya 13:4

Mem mọ amem mọ kẹteeny bọ, oyil kạ́tol mun dị kaabagaam ịmiin phọ ọdi, mụghumo kẹn oḅo ịlo ariil, mụghumo kẹn ọkpologhian ạsuoma ariil lọ aakpurughan ọsighe ookeleghiom awe.

Matiu 24:11

Ịbadi ariil ọkpe komite ni kụ ookeleghi ịbadi awe.

Matiu 24:24

Ariil ọkpe rꞌạbudi kokola ḍien aMesaya komite ni oḍighi yogh igbogh areḍeenaan rꞌịiḍaany, lọ ẹghigh, ịlo ookeleghiom ạbuphe Ẹnaan mẹsaḅar bọ.

Matiu 7:15

“Igona loor anyina esi ariil ọkpe. Ẹphen ạnyu phọ bịdi ọkigh iyool-ịga, kụ iloghi phọ ạbidi eḍighi ịlo ilhom ịnam.

Elegh ạMak 13:22

Ariil ọkpe rꞌạbudi kokola ḍien aKraist komite ni oḍighi yogh reḍeenaan rꞌịiḍaany, lọ ẹghigh, ịlo ookeleghiom ạbuphe Ẹnaan mẹsaḅar bọ.

Elegh aLuk 6:26

“Pọ eeghe ọdo ịminimiin dị kịrolonaan inyina mem dị oomo awe ọgba igey ịlo anyina. Ilegheri mọ ạburude ạburude phọ ạbidi ụghaaphaan ghan ọdo phọ ịphen riil ọkpe phọ.

Dutoronomi 18:20

Kụ oyil lọ aghol ḍien phọ ạmi kụ ạghaaphom ịlo mị kụ nyọdi ụ́ḅeni mọ ạghaaph; mꞌọlo aghol ḍien ịnon ạrumugh kụ ạghaaph, pọ oyil phọ ọpo phọ kamugh ni.’

Dutoronomi 4:1

Kụ aMozis ạḅeni we phọ Ịzirel mọ, “Nyịidipho iler rụru ẹnaghanan oomo iilogh phọ rꞌịiruen phọ ịpe mị ịtughemi bọ inyina, ịpe nyina keḍighi ghan bọ ọbo nyina ẹrol ẹghelom de phọ ạḍiphe Ọmoogh-we Ẹnaan ạburude phọ anyina rịngo bọ inyina.

Dutoronomi 4:2

Kẹ́loghom rꞌịyaar sịphe ịpe mị ạto bọ rịḅeni inyina, kụ kémuton rꞌịyaar. Iiko ghan iilogh phọ ịpe Ọmoogh-we Ẹnaan phọ anyina ạlogh bọ, ịdipho mị ạlogh bọ ịḅeni inyina.

2 Bụo ạTesalonika 2:9

Oye Eekuna Ạsipioghom mọ katumom ịikpo aSetan kụ aḍighi yogh ịiḍaany kịrokiro rꞌareḍeenaan rꞌimananaany ọkpe ịlo ookeleghiom ạbuphe kope bọ. Bịdi kọ́moogh pẹleeny ịdi eḍighi bọ bịdi moghel igey phọ.

2 Pita 2:1

Mem dị meten ariil ọkpe umite ni sịphe ogbo awe phọ. Kụ ịduon phọ kẹn kụ ịdi ạbutughemia ọkpe komite ni sịphe ogbo phọ anyina. Bịdi komian ni ọsighe ịtughemi amuphe ọloghom, kụ ọḅile ọparanaan Ọde-otu phọ ạphel bọ bịdi, bịn oḍighi dị ekperenom ạghelhe kameelom bịdi.

1 Jọn 4:1

Iiḅi asiya, kémeeraam mun oomo ạbulo rọḅem ghan mọ bụno ọmoogh Uwaloor Iigbia phọ. Ịmaar ghan ẹeḅeghion ruwaloor phọ ephogh mọ ịḍua ni esi Ẹnaan kụ eru, ịdi eḍighi bọ ịbadi ariil ọkpe momite sịen aḅirini phọ.