Dutoronomi 12:7 - Ạḍinya Iigbia

⁷ Ịsiphe phọ kụ esi dị nyina rꞌọto anyina kẹtol ghan egbodo Ọmoogh-we Ẹnaan phọ anyina kụ ele ghan ẹmoogh iboh esi oomo ạraraar phọ ịpe ẹsighe bọ rạghaagh anyina kụ eḍighinom, ịdipho Ọmoogh-we Ẹnaan phọ anyina ịseph bọ inyina.

Dutoronomi 12:7 Iomraidhean Croise

1 Krọnikuls 29:22

Kụ ḍio phọ ạḍiphe bịdi ụmoogh ni ọḅaal ologhi loor esi dị bịdi ulhe ni ọphughol ghisigh Ọmoogh-we phọ. Ẹnon amem kẹn, bịdi uuleghemi ni Sọlomon mọ ọdaam. Rꞌaḍien Ọmoogh-we phọ bịdi ụsighe ni mụnum ọsagharan ẹmhu ọdi mọ ọdi ạda bụno, ḅịle rꞌẹmhu ạZedok mọ aḍighi oyil ẹkia phọ.

Nehemaya 8:9

Mem dị awe phọ ọnaghanan bọ ịpe Ologh phọ ạḅem bọ, ịḅogh ni bịdi sịphe arokpom mọ, kụ bịdi omiigh emoghi. Esi ịduon phọ, aNehemaya ọdaam mọ, Ẹzra oyil ạrikia rꞌoye ịtuugha Ologh phọ, rꞌạbuo aLivai ạbuphe ọghaaph ghan bọ Ologh phọ ogananami ẹmhu phọ, ụḅeni ni oomo awe phọ mọ, “Aḍio phọ arodon aḍio iigbia Ọmoogh-we Ẹnaan phọ anyina, kụ ịduon kụ iḍighi ịyaar dị nyina kẹ́moogh ọto ḅịle mꞌemoghi.

Ọtughemia Phọ 3:12

Esi ịduon phọ mị ạmiin mọ oomo ịdi yira koḍighi, ọmoogh ghan ọḅaal ologhi rꞌoḍighi ghan ịlo yira kotue sịen yira odi bọ eye phọ.

Ọtughemia Phọ 3:13

Ẹkpe ni dị oomo ayira kole ghan, ọpughol, ọmoogh ọḍe esi ịpe yira mokumuan bọ ọmoogh. Eḍighi ni inmo kꞌẸnaan.

Ọtughemia Phọ 5:18

Ịphen ịdi mị mạwa amitiom: ọkar egey ịyaar dị oye kaḍighi, olhe rꞌọphughol kụ ọghelom aruphua phọ ịpe ọdi makumuan bọ ạmoogh esi ekulha amem mọ Ẹnaan mẹngo bọ nyọdi: ọphon kụ amaazuan phọ oye.

Azaya 23:18

Ikpoki phọ ọdi kagboom bọ omuul aḍighi phọ kọḅogh ni ọngo Ọmoogh-we phọ. Ọdi káako ghan bịn aseerian, bụphe rooseeny bọ Ọmoogh-we phọ kụ kọsighe ghan ikpoki phọ okoom eḍien rꞌarukpe lọ bịdi rọwa.

Azaya 62:9

Kụ nyina ạbuphe ẹzuph bọ kụ ẹku bọ ịbiakpa phọ Kele ni ạbred phọ kụ eboom Ọmoogh-we phọ. Nyina ạbuphe eekonom bọ kụ ẹku bọ iimuma avain phọ Kẹpughol li miim mọ sịphe ogiga Otu Ịiḅereghi phọ ạmi.”

Izikiel 44:3

Ọkpana ọdaam mọ rạda bọ atue ni ạki sịphe phọ ale eḍien iigbia egbodo ạmi. Ọdi kaḍigh osoph eḍighom mọ ẹphen bịn amite.”

Joel 1:16

Ạpeleeny iyoor ílho mem dị ropiemi ịizupha ayoor. Iboh ílho sịphe Otu Ịiḅereghi Ẹnaan phọ ayoor.

Joel 2:26

Nyịidipho nyina kẹmoogh eboom ẹlo olhe, kụ ẹgbaanyan. Nyina keeseeny Ọmoogh-we Ẹnaan phọ anyina, ọpo miḍighinaan bọ inyina iikia ạraraar. We phọ ạmi kọ́ḅitonaan mun.

Lịvitikos 23:40

Ḍịḅel aḍio phọ, ịpam ghan igeny iimuma, sịgo alhe rꞌigeny ịphiph ireeny rꞌinyaaru epheghogh rephegh, ẹmoogh iboh rꞌọḅaal ologhi, esi oḍual aḍughul-otu ghisigh Ọmoogh-we Ẹnaan phọ anyina.

Malakai 2:13

Ẹphen ẹnon ịyaar dị nyina reḍighi ghan. Nyina mẹsighe izin anyina bịn emuzeḍiom ọgbanaghi Ọmoogh-we phọ; nyina remoghi ghan keḅeleghu loor esi dị ọdi rạ́sighe mun inmo lọ nyina ẹngo nyọdi.

Iiḍighi 2:46

Kụ aḍio etum ḍio, oomo phọ ạbidi ụghi ghan ni pạ Otu Ịiḅereghi phọ, ọparion ghan ạbred iloghi aruutu phọ ạbidi, kụ ọsighe ghan mụḅoph rꞌọḅaal ologhi kụ oliom eḍien.

Dutoronomi 12:12

Nyina ebo ghan egbodo Ọmoogh-we phọ Ẹnaan phọ anyina, nmụny anyina rꞌạnmanyaan anyina, nmụny-otu anyina rꞌạnmanyaan-otu anyina, rꞌạbuo aLivait phọ ituman bọ inyina, loor ịdipho bịdi ụ́moogh aani bọ ẹku mꞌabin kẹn.

Dutoronomi 12:18

Ịtol ghan egbodo Ọmoogh-we Ẹnaan phọ anyina kụ ele, esi phọ ẹpe Ọmoogh-we Ẹnaan phọ anyina azua bọ, nyina rꞌạnmuny anyina rꞌạnmanyaan anyina, ạnmuny-otu anyina rꞌạnmanyaan-otu anyina, rꞌạbuo aLivait phọ; kụ ẹmoogh iboh, ebo ghan sịphe egbodo Ọmoogh-we Ẹnaan phọ anyina, oomo ịpe nyina ẹsighe bọ rạghaagh anyina kụ eḍighinom.

Dutoronomi 12:8

“Kẹ́daph ghan oomo phọ ịphen yira roḍighi bọ sịen rodon kụ eḍighi, uwo ịlo ọdi aḍighi ghan ịlo eḍighi elhiom esi ọdi.

Dutoronomi 14:23

Kụ ẹrol sịphe egbodo Ọmoogh-we Ẹnaan phọ anyina kụ elhe, esi phọ ẹpe ọdi ạsaḅar bọ aseere ḍien phọ ọdi, muniin abin sịphe aḍioph phọ, mụo ịbiakpa, mụo avain, mụo ạmunum, rꞌabin ịḅel ạnmuny lọ ạsinam mọ anyina ẹmar, ịḅel ạnmuny phọ ịpe iyool-ịga phọ anyina ẹmar bọ. Ịtuugha oghueni ghan Ọmoogh-we Ẹnaan phọ anyina oomo amem.

Dutoronomi 14:26

Ịdaph ghan ẹephua phọ anyina kụ elhiom ghan ikpoki phọ, mꞌịlo ạnam, mꞌịlo oyool-ọga, mꞌịlo amiim, mꞌịlo ạmuukpara amiim, tọrobo ịyaar phọ ẹpe rịphu bọ inyina, ẹrol egbodo Ọmoogh-we Ẹnaan phọ anyina kụ elhe ghan, kụ ẹmoogh iboh rꞌọḅaal ologhi, nyina rꞌọto anyina.

Dutoronomi 15:20

Nạ rꞌọto ạna kẹtol ghan egbodo Ọmoogh-we Ẹnaan phọ anyina kụ ele ghan ạlha etum lhạ, sịphe Ọmoogh-we Ẹnaan phọ anyina ạsaḅar bọ.

Dutoronomi 26:11

kụ ạmoogh ọḅaal ologhi, aboom oomo igey ạraraar phọ ịpe Ọmoogh-we Ẹnaan phọ ạna ạngo bọ nyịna, nạ rꞌọto kꞌạna rꞌaLivait phọ, rꞌaruuruen phọ rꞌạna erughan bọ.

Dutoronomi 27:7

Ịpighironaan ghan sịphe phọ ẹkia ẹboroph kụ ẹrol ghan sịphe phọ kụ ele; ẹrol ghan sịphe esomanan egbodo Ọmoogh-we Ẹnaan phọ anyina ẹmoogh ọḅaal ologhi rꞌibo,

Dutoronomi 28:47

ịdi eḍighi bọ nyina ị́sighe ọḅaal ologhi rꞌogey ologhi kụ reeseenyom ghan bọ Ọmoogh-we Ẹnaan phọ anyina loor ẹeḍiom mọ anyina emuza bọ.

Bụo aFilipai 4:4

Iboh ghan esi Ọmoogh-we phọ oomo amem. Mị ạḅile ni rạḅem mọ iboh ghan ni.