45 “Cheak'ama aj Leví pkik'exel i nab'e taq kak'al aj Israel, xaq cheak'ama kichikop pkik'exel kichikop aj Israel, man i aj Leví je we yin. Yin in Ajwal xinb'ij ile.
I nab'e ral ma chke i rak'al jun axna chi kalaxik, ktotaj ni rumal jun chij, xwiri we nti uk'exel k-oqix ni uri uqul. Konojel i nab'e taq alab'om, ketotaj ni rumal jun chij, konojel kkik'am nu b'i kisipon, mijun chke kupon taq chinwach we nti rok'am b'i pu'ab'.
Man je are ni aj Leví aj-anol inchak chkixol konojel aj Israel man ike le lik je we yin. Yin je ink'amom ike le pkik'exel konojel i nab'e taq kak'al aj Israel,