Malaki 1:6 - An Bibel Kernewek 20234 (Kernewek Kemmyn)

⁶ Mab a enor y das, ha gwas y vester. Ytho mars ov vy tas, ple'ma ow enor? Mars ov vy mester, ple'ma ow revrons? yn-medh Arloedh an luyow dhywgh, an oferysi, a dhispres ow hanow. Mes hwi a lever, ‘Fatell wrussyn dispresya dha hanow?’

Malaki 1:6 Iomraidhean Croise

Salmow 123:2

Otta, kepar dell vir dewlagas servysi orth leuv aga mestrysi, ha dewlagas maghteth orth leuv hy mestres, yn kettella agan dewlagas ni a vir orth an Arloedh, erna gemmerro truedh ahanan.

Eksodus 20:12

Enor dha das ha'th vamm, may fo hir dha dhydhyow y'n tir usi an Arloedh dha Dhuw orth y ri dhis.

Lavarow Koth 17:6

Fleghes wynn yw kurun an re goth, ha glori mebyon yw aga thasow.

Lavarow Koth 30:11

Yma re hag a volleth aga thas ha na vennik aga mamm.

Lavarow Koth 30:17

An lagas hag a dhispres tas hag a skorn bos gostydh dhe vamm a vydh pigys yn-mes gans marghvrini an nans ha dybrys gans an eryon.

Ysay 1:2

Klew a nev, ha goslow a norvys; rag an Arloedh re gewsis: My a vagas mebyon ha'ga meythrin, mes i a rebellyas er ow fynn.

Ysay 43:23

Ny dhuges dhymm dha dheves rag offrynn leskys, na'm enora gans dha sakrifisow. Ny'th veghis gans offrynnow, na'th skwitha gans frankynkys.

Ysay 45:10

Go-ev neb a lever dhe das: ‘Pandr'a dhineythydh?’ po dhe venyn, ‘Pandr'a dhegedh y'th lavur?’

Ysay 64:7

Nyns eus denvyth a elow war dha hanow na strivya dhe gavoes dalghenn ynnos; rag ty re gudhas dha fas ragon, ha'gan delivra yn leuv agan kammweythresow.

Ysay 64:8

Ha lemmyn, Arloedh, ty yw agan Tas. Ni yw an pri, ha ty yw agan priweythor; ni oll yw ober dha leuv.

Yeremia 23:11

Rag ha profoes hag oferyas yw ansans; hwath yn ow chi my re gavas aga drogedh, yn-medh an Arloedh.

Yeremia 3:4

A ny wruss'ta kria warnav nammnygen, ‘Ow Thas, ty yw koweth ow yowynkneth –

Yeremia 31:9

I a dheu yn-dann dhagrewi, ha gans konfort my a's hembronk, my a wra dhedha kerdhes ryb frosow dowr, yn fordh leven le ma na drebuchyons; rag my yw tas dhe Ysrael, hag Efraym yw ow hynsa-genys.

Yeremia 35:16

Mebyon Yonadab mab Rekab re gollenwis an gorhemmynn a ros aga thas dhedha, mes ny woslowas orthiv an bobel ma.

Ezekiel 22:26

Hy oferysi re wrug freudh erbynn ow lagha ha disakra ow thaklow sans; ny dhissernsons yntra sans hag ansans, ha ny dhysksons dissernya yntra glan hag avlan; i re dhegeas aga dewlagas dhiworth ow sabotys, mayth ov vy disakrys yn aga mysk.

Hosea 12:8

Yn-medh Efraym, ‘Yn hwir rych ov vy, my re drovyas pythow; yn oll ow lavur ny gevons ynnov kammhynseth, yw pegh.’

Hosea 4:6

Ow fobel yw kisys drefenn fowt a skians. Drefenn ty dhe nagha skians, my a wra dha nagha ma na vi oferyas ragov; drefenn ty dhe ankevi lagha dha Dhuw, my ynwedh a wra ankevi dha vebyon.

Hosea 5:1

Klewewgh hemma, a oferysi! Goslowewgh, chi Ysrael! Attendyewgh, A ji an myghtern! An vreus yw er agas pynn, drefenn agas bos antell orth Mispa, ha roes lesys war Tabor.

Levitikus 19:3

Pubonan ahanowgh a wra revrons dh'y das ha'y vamm ha synsi ow sabotys. An Arloedh agas Duw ov vy.

Sefania 3:4

Direwl yw hy frofoesi, falswesyon; hy oferysi re dhefolas an sentri, i re shyndyas an lagha.

Malaki 2:1

Ha lemmyn, an gorhemmynn ma yw ragowgh hwi, A oferysi.

Malaki 2:10

A ny'gan beus, ni oll, unn Tas? A ny'gan gwrug unn Duw? Prag y hwren ni toella an eyl y gila, ow tisakra kevambos agan tasow?

Malaki 2:8

Ha hwi a dreylyas a-dhiworth an fordh ha gul dhe lies trebuchya y'n lagha; hwi a dhefolas an kevambos gans Levi, yn-medh Arloedh an luyow.

Malaki 3:5

Ha my a dheu nes dhywgh rag breus. Ha my a vydh test uskis erbynn an hudoryon ha'n avoutroryon, ha'n re a de yn fals, hag erbynn an re a doell an gweythor a'y wober, an wedhwes ha'n omdhivas, ha treylya dhe-ves an alyon, ha na berthons own ahanav, yn-medh Arloedh an luyow.

Matthew 15:4

Rag Duw a leveris, “Enor dha das ha'th vamm”, ha “Neb a villikko y das po y vamm, bedhes gorrys dhe'n mernans.”

Matthew 15:6

nyns yw ev synsys dhe enora y das na'y vamm; ha hwi a dhile ger Duw der agas hengov.

Matthew 19:19

Gwra enora dha das ha'th vamm, ha Kar dha gentrevek avelos ty dha honan.’

Matthew 6:9

‘Yn kettellma ytho, gwrewgh pysi: Agan Tas ni eus y'n nevow, sanshes re bo dha hanow;

Matthew 7:21

‘Nyns a a-bervedh yn gwlaskor nev pubonan a lever dhymm, “Arloedh, Arloedh”, mes ev neb a wra bodh ow Thas eus yn nevow.

Mark 10:19

Ty a woer an gorhemmynnow, “Na wra avoutri, Na ladh, Na lader, Na dhog fals dhustuni, Na doell, Enor dha das ha'th vamm.” ’

Mark 7:10

Rag Moyses a leveris, “Enor dha das ha'th vamm”; ha, “Neb a villikko y das po y vamm, bedhes gorrys dhe'n mernans.”

Luk 10:29

Mes ev, ow mynnes justifia y honan, a leveris dhe Yesu, ‘Ha piw yw ow hentrevek?’

Luk 18:20

Ty a woer an gorhemmynnow: “Na wra avoutri, Na ladh, Na lader, Na dhog kamm dustuni, Enor dha das ha'th vamm.” ’

Luk 6:36

Bedhewgh truedhek, kepar dell yw agas Tas ynwedh truedhek.

Luk 6:46

‘Prag y'm gelwewgh “Arloedh, Arloedh” ha ny wrewgh an pyth a lavarav?

Efesianys 6:2

‘Gwra enora dha das ha'th vamm’, hag yw an kynsa arghadow gans ambos,

Dewteronomi 1:31

hag y'n gwylvos, le may hwelsys fatell wrug an Arloedh dha Dhuw dha dhoen, dell dheg den y vab, dres oll an fordh a gerdhsowgh bys pan dheuthewgh y'n tyller ma.

Dewteronomi 32:6

A attylowgh an Arloedh yndella, pobel goeg ha diboell? A nyns yw ev dha Das, dha Wrier, neb a'th formyas, ha neb a'th fastyas?

Dewteronomi 5:16

Enor dha das ha dha vamm dell worhemmynnis an Arloedh dha Dhuw dhis, rag may fo dha dhydhyow hir, ha rag may fo yn ta dhis war an tir a wra an Arloedh dha Dhuw y ri dhis.

1 Peder 1:17

Ha mar kelwowgh warnodho avel Tas, ev neb a vreus heb plegyans war-lergh gwrians pub den, gwrewgh spena termyn agas godrik yn own.