Hosea 9:6 - An Bibel Kernewek 20234 (Kernewek Kemmyn)

⁶ Awotta, galsons drefenn kollva, Ejyp a's kuntell, Memfis a wra aga ynkleudhyas. Hwynn a erit aga thresoryow a arghans, ha spern a vydh yn aga thyldow.

Hosea 9:6 Iomraidhean Croise

2 Myghternedh 13:7

Nyns esa gesys dhe Yehoahaz lu a voy ages hanter-kans marghek ha deg charett, ha deg mil droesek; rag myghtern Aram re's distrusa, ha re wrussa dhedha bos kepar ha doust drushya.

Salmow 107:34

Ev a wra dhe dir leun a frut bos difeythtir, drefenn sherewneth an re usi trigys ynno.

Lavarow Koth 24:31

hag ottava, gordevys o gans spern, kudhys o gans linas, ha'y fos a ven o terrys dhe'n dor.

Ysay 11:11

Y'n jydh na an Arloedh a ystynn y leuv an nessa gweyth dhe dhaskavoes remenant y bobel yw gesys, dhiworth Assyria, dhiworth Ejyp, dhiworth Pathros, dhiworth Ethiopia, dhiworth Elam, dhiworth Shinar, dhiworth Hamath, ha dhiworth ynysow an mor.

Ysay 19:13

Pennsevigyon Soan a dheuth ha bos fellyon, pennsevigyon Nof yw toellys; pennmeyn hy loethow re ledyas Ejyp yn stray.

Ysay 27:12

Y'n jydh na an Arloedh a dhrush a-dhiworth kanel an Ewfrates bys yn nans Ejyp, ha hwi, mebyon Ysrael, a vydh kuntellys onan hag onan.

Ysay 32:13

rag dor ow fobel le may teu spedhas ha spern yn-bann, rag oll an chiow heudh y'n sita lowen.

Ysay 34:13

Spern a dyv dres hy falesyow, askall ha spedhas yn hy hastylli. Hi a vydh peurva owrgeun, ha trigva rag strusyow.

Ysay 5:6

My a's gwra difeyth; ny vydh skethrys, na ny vydh kravellys, mes spedhas ha spern a dyv ena. My a wra gorhemmynn dhe'n kommol ma na rollons glaw warnedhi.

Ysay 7:23

Y'n jydh na pub tyller mayth esa mil winbrenn ynno, hag a dylis mil shekel arghans, a vydh spedhas ha spern.

Yeremia 2:16

Ynwedh mebyon Nof Tahpanhes re dorras kurun dha benn.

Yeremia 42:22

Godhvydhewgh ytho yn ta, hwi a verow gans an kledha, gans an divoetter ha gans an pla y'n tyller may fynnowgh mos ha triga.’

Yeremia 44:1

An ger hag a dheuth dhe Yeremia rag oll an Yedhewon trigys yn pow Ejyp, yn Migdol, yn Tahpanhes, yn Nof, hag yn tir Pathros, ow leverel,

Yeremia 44:12

My a gemmer remenant Yuda, re settyas aga fas dhe dhos ha triga yn pow Ejyp, hag i oll a vydh diswrys, ha koedha yn pow Ejyp; i a vydh diswrys gans an kledha ha gans an divoetter, a'n lyha dhe'n meurra; i a verow gans an kledha ha gans an divoetter; hag i a vydh molleth, hag euth, ha milliga ha keredh.

Yeremia 44:13

My a gessydh an re usi trigys yn pow Ejyp, dell gessydhis Yerusalem, gans an kledha, gans an divoetter ha gans an pla;

Yeremia 46:14

Diskleryewgh yn Ejyp, ha gwarnya yn Migdol; gwarnyewgh yn Nof hag yn Tahpanhes; leverewgh, ‘Kemmer dha savla, ha bydh parys, rag an kledha a dhevor an re a-dro dhis.’

Yeremia 46:19

Pareus ragos fardellow divroedh, ty annedhyas, myrgh Ejyp! Rag Nof a vydh gwastys hag y fydh distruys, heb annedhyas.

Ezekiel 30:13

Yndellma y lever an Arloedh Duw: My a dhistru idolys ha ri diwedh dhe'n imajys yn Nof. Ny vydh na fella pennsevik yn pow Ejyp; ha my a worr own yn pow Ejyp.

Ezekiel 30:16

My a worr tan yn Ejyp, Sin a omwen yn payn; Fos No a vydh folsys, hag y fydh dhe No ahwer pub dydh.

Hosea 10:8

Tylleryow ughel Aven, pegh Ysrael, a vydh distruys. Spern hag askall a dyv dres aga alteryow. Ena yn-medhons dhe'n menydhyow, ‘Gorherewgh ni’, ha dhe'n brennow, ‘Koedhewgh warnan ni.’

Hosea 11:11

I a gren avel edhen yn-mes a Ejyp, avel kelemmi yn-mes a Assyria. My a wra dhedha triga yn aga threvow, yn-medh an Arloedh.

Hosea 2:6

Rakhenna my a vynn keas dha fordh gans spern; ha'y degea gans fos, ma na gaffo hy hynsyow.

Hosea 7:11

Efraym yw kepar ha kolomm, gokki ha heb kolonn; i a elow dhe Ejyp ha mos dhe Assyria.

Hosea 7:13

Go-i, rag i re fias ahanav vy! Terroes dhedha, rag i re rebellyas er ow fynn! My a's dasprenas hag i a wowleveris er ow fynn.

Hosea 7:16

Treylya a wrons – a-der war-vann; avel gwarak lows yns i. Aga fennsevigyon a goedh der an kledha drefenn anvri aga thaves. Yndella tus a wra ges anedha yn gwlas Ejyp.

Hosea 8:13

I a sakrifi rohow dhymmo vy, i a dheber an kig; mes an Arloedh ny gemmer plesour ynna. Lemmyn ev a berth kov a'ga sherewneth, ha kessydhya aga feghosow: dhe Ejyp y tehwelons.

Hosea 9:3

Ny drigons yn tir an Arloedh; Efraym a dhehwel dhe Ejyp, ha dybri taklow avlan yn Assyria.

Levitikus 26:33

Ha my a wra agas skattra yn mysk an kenedhlow, ha tenna yn-mes an kledha war agas lergh; dha dir a vydh ynyal, ha'gas sitys a vydh magoryow.

Sefania 1:11

Kynewgh, a drigoryon Maktesh, rag distruys yw oll an wikoryon, treghys dhe-ves yw an re a boes arghans.

1 Samuel 13:6

Pan welas gwer Ysrael aga bos yn ahwer (rag an lu o gweskys kales), ena an bobel a omgudhas aga honan yn kavow hag yn tell hag yn karregi hag yn bedhow hag yn dowrarghow.