Ezra 10:8 - An Bibel Kernewek 20234 (Kernewek Kemmyn)

⁸ Piwpynag na vynna dos a-ji dhe dri dydh, herwydh ervirans an bennsevigyon ha'n henavogyon, bedhes kowldhistruys oll y bythow, hag ev y honan diberthys a-dhiworth kuntelles an dhivresow.

Ezra 10:8 Iomraidhean Croise

Ezra 10:7

Ena i a dhellos galow dre Yuda ha Yerusalem bys oll mebyon an divroedh, mayth omguntellens war-barth yn Yerusalem.

Ezra 10:9

Oll gwer Yuda ha Benyamin a omguntellas yn Yerusalem a-ji dhe dri dydh. An nawves mis o, ugensves dydh an mis. Oll an bobel a esedhas y'n plen a-rag chi Duw, ow krena drefenn an mater ma, ha drefenn an glaw meur.

Ezra 7:26

Ha piwpynag na vynno bos gostydh dhe lagha dha Dhuw ha lagha an myghtern, bedhes breus gwrys warnodho yn straght, po mernans, po divroedh, po kemmeryans y byth, po prisonyans.

Nehemia 13:28

Onan a vebyon Yoyada mab Elyashib an arghoferyas, o deuv dhe Sanballat an Horonyas; rakhenna my a'n pellhas yn-mes a'm lok.

Nehemia 13:3

Pan glewsons an lagha ma, oll an re a linyeth kemmyskys a veu diberthys dhiworth Ysrael.

Levitikus 27:28

Byttegyns, neppyth sakrys, a wra gour y sakra dhe'n Arloedh, yn-mes a bup-tra eus dhodho, a dhen, po best, po gwel a'y berghennogeth, ny vydh gwerthys na dasprenys. Pup-tra sakrys yw an moyha sans dhe'n Arloedh.

Matthew 18:17

ha mara skon ev dhedha, deriv an dra dhe'n eglos; ha mara skon ev hwath dhe'n eglos, ev bedhes dhiso avel pagan po toller.

Yowann 16:2

I a wra agas emskemuna a'n synaga; mes an eur a dheu pan dyb peub a wra agas ladha, ev dhe brofya gordhyans dhe Dhuw.

Yowann 9:22

Y gerens a leveris hemma rag bos own dhedha a'n Yedhewon; rag an Yedhewon a wrussa ervira war-barth seulabrys, piwpynag a gonfessa ev dhe vos Krist dhe vos emskemunys a'n synaga.

Yowann 9:34

I a worthybis ha leverel dhodho, ‘Ty a veu genys oll yn tien yn peghosow, ha ty a vynn dyski dhyn?’ Hag i a'n tewlis yn-mes.

1 Korinthianys 5:13

Duw a vreus an re a-ves. ‘Tewlewgh an tebelwas yn-mes ahanowgh agas honan.’

Yoshua 6:19

Oll an arghans ha'n owr, ha lestri a vrons ha horn, yw sans dhe'n Arloedh; i a dheu yn tresorva an Arloedh.’

Breusysi 21:5

Ena mebyon Ysrael a leveris, ‘Piw yn-mes a oll loethow Ysrael na dheuth yn-bann dhe'n kuntelles dhe'n Arloedh?’ Rag ti solem re bia gwrys a-dro dhe biwpynag na dheffa yn-bann dhe'n Arloedh dhe Mispa, ow leverel, ‘An den na a vydh gorrys dhe'n mernans.’

1 Samuel 11:7

Ev a gemmeras yew a oghen, ha'ga threghi yn temmyn ha'ga dannvon der oll pow Ysrael dre leuv kannasow, ow leverel, ‘Piwpynag na dheffo yn-rag wosa Sowl ha Samuel, yndella y fydh gwrys dh'y oghen ev!’ Ena own an Arloedh a goedhas war an bobel, hag i a dheuth yn-mes kepar hag unn gour.