Ezra 1:2 - An Bibel Kernewek 20234 (Kernewek Kemmyn)

² ‘Yndellma y lever Kyrus myghtern Persia: An Arloedh Duw nev, re ros dhymm oll ruvanethow an norvys; hag ev re erghis dhymm drehevel dhodho chi yn Yerusalem, usi yn Yuda.

Ezra 1:2 Iomraidhean Croise

1 Myghternedh 8:27

‘Mes a wra Duw triga yn hwir war an dor? Hwath ny yll nev ha nev an nevow dha synsi, myns le an chi ma re dhrehevis!

2 Kroniklys 2:12

Hiram a leveris ynwedh, ‘Benniges re bo an Arloedh, Duw Ysrael, gwrier nev ha nor, neb re ros dhe vyghtern Davydh mab fur, a'n jeves doethter ha konvedhes, dhe dhrehevel chi rag an Arloedh, ha chi ryel ragdho y honan.

Ezra 1:5

Pennow teyluyow Yuda ha Benyamin ha'n oferysi ha'n Levysi a sevis, gans oll an re may hwrug Duw dh'aga spyrys difuna, dhe vones yn-bann ha drehevel chi an Arloedh usi yn Yerusalem.

Ezra 3:7

I a ros arghans ynwedh dhe'n seri men, ha dhe'n seri prenn; ha boes, diwes hag oyl dhe'n dus a Sidon, ha'n dus a Tyr, may trollens kederwydh a-dhiworth Lebanon dhe vor Yoppa, herwydh an kummyas a dhegemmersens dhiworth Kyrus myghtern Persia.

Ezra 4:3

Mes Zerubbabel, Yeshua ha'n bennow teyluyow erell a Ysrael, a leveris dhedha, ‘Ny'gas beus travyth dhe wul genen rag drehevel chi dh'agan Duw; mes ni agan honan war-barth a vynn drehevel rag an Arloedh, Duw Ysrael, dell erghis dhyn myghtern Kyrus, myghtern Persia.’

Ezra 5:15

Yn-medh ev dhodho, “Kemmer an lestri ma, ke, ha'ga gorra a-ji dhe'n tempel usi yn Yerusalem, ha gas chi Duw dhe vos dastrehevys yn y dyller.”

Ezra 6:10

mayth offrynnons sakrifisow plegadow dhe Dhuw an nev, ha pysi rag bewnans an myghtern, ha dh'y vebyon.

Ezra 6:3

Yn kynsa blydhen Kyrus an myghtern, an myghtern a dhellos arghadow a-dro dhe ji Duw yn Yerusalem: Bedhes dastrehevys an chi, le mayth offrynnons sakrifisow, ha bedhes offrynnow leskys dres; tri-ugens kevelin a vydh y ughelder, ha tri-ugens kevelin y les,

Ezra 7:12

Artakserkses, myghtern myghternedh. Dhe Ezra an oferyas, dyskys yn lagha Duw nev, salusyans. Ha lemmyn:

Nehemia 1:4

Pan glewis vy an geryow ma, my a esedhas hag oela, ha kyni dres lies dydh, ha penys ha pysi a-rag Duw nev.

Nehemia 1:5

Yn-medhav, ‘My a'th pys, A Arloedh Duw nev, an Duw bras hag euthyk neb a with kevambos ha tregeredh rag an re a'n kar ha gwitha y worhemmynnow;

Salmow 136:26

Grassewgh dhe Dhuw an nev, rag y dregeredh a dhur bys vykken.

Salmow 85:2

Ty re avas kammweyth dha bobel, ha kudha oll aga fegh. Sela.

Lavarow Koth 21:1

Kolonn an myghtern yw gover a dhowr yn leuv an Arloedh; ev a's treyl py le pynag y fynno.

Ysay 41:2

Piw a wrug dhe nebonan difuna dhiworth an howldrevel, orth y elwel dh'y servis yn ewnder? Ev a re kenedhlow a-ragdho, ha fetha myghternedh; ev a's gwra avel doust gans y gledha, avel sowl herdhys gans y warak.

Ysay 44:26

neb a surha ger y was, hag a gowlwra kusul y gannasow; neb a gews a Yerusalem, ‘Hi a vydh annedhys’, hag a-dro dhe sitys Yuda, ‘I a vydh drehevys, ha my a dhastrehav aga magoryow’;

Ysay 44:28

neb a gews a Kyrus, ‘Ow bugel yw ev, hag ev a gollenow ow forpos oll’; ow leverel a-dro dhe Yerusalem, ‘Bedhes dastrehevys’, hag a-dro dhe'n tempel, ‘Bedhes hy selven desedhys yn y le.’

Ysay 45:1

Yndellma y lever an Arloedh dh'y untys, dhe Kyrus, neb a synsis vy er y leuv dhyghow, rag fetha kenedhlow a-ragdho, ha dhe dhigelmi diwglun myghternedh, dhe igeri darasow a-ragdho, ha ny vydh yetys deges:

Ysay 66:1

Yndellma y lever an Arloedh: Nev yw ow thron ha'n norvys yw ow skavell-droes; ple'ma'n chi a dhrehevowgh dhymm? ple fydh ow fowesva?

Yeremia 10:11

Yndella hwi a lever dhedha: An duwow na wrug an nevow ha'n nor, i a dhe goll a-dhiworth an nor hag a-dhann an nevow ma.

Yeremia 27:5

My re wrug an nor, an den ha'n best usi war an nor, der ow galloes meur ha der ow bregh ystynnys, ha'y ri dhe biwpynag a blekkyo dhymm.

Yeremia 29:10

Rag yndellma y lever an Arloedh: Pan vydh kowlwrys deg blydhen ha tri-ugens yn Babylon, my a'gas visit, ha kewera ow ger da dhywgh ha'gas dri arta dhe'n tyller ma.

Daniel 1:21

Ha Daniel a veu ena bys yn kynsa blydhen myghtern Kyrus.

Daniel 2:21

Ev a dreyl an prysyow ha'n sesonyow; ev a remov myghternedh ha sevel myghternedh; ev a ro furneth dhe'n re fur, ha godhvos dhe'n re a woer konvedhes.

Daniel 2:28

mes yma yn nev Duw neb a dhiskudh kevrinyow, hag ev re dherivas dhe vyghtern Nebukadnessar pandr'a hwyrvydh y'n dydhyow diwettha. Dha hunros, ha'n gwelesigethow y'th penn war dha weli, o an re ma:

Daniel 4:25

may fi fesys pell dhiworth tus, ha'th annedh a vydh gans bestes gwyls, gwrys dhe dhybri gwels avel oghen, ha glybys gans gluth an nevow. Warnas y tremen seyth seson, bys pan gonvedhydh bos an Ughella rewler yn gwlaskor mab-den, hag y's re dhe neb a vynno.

Daniel 4:32

hag i a'th fes pell dhiworth tus, ha'th annedh a vydh gans an bestes gwyls, hag i a'th wra dhe dhybri gwels avel oghen; warnas y tremen seyth seson bys pan wodhvydhydh bos an Ughella rewler yn gwlaskor mab-den, hag ev a's re dhe neb a vynno.’

Daniel 5:23

mes ty a omughelhas erbynn Arloedh an nevow. Lestri y ji re beu dres a-ragos, ha ty ha'th arlydhi, dha wragedh, ha'th iswragedh re evas gwin dhiworta; ha ty re wormolas an duwow a arghans hag owr, brons, horn, prenn ha men, neb na welons na klewes na godhvos; mes an Duw mayth usi dha anall yn y dhorn, hag oll dha hynsyow, ny wrussys y enora.

Daniel 6:25

Ena myghtern Darius a skrifas dhe oll an poblow, kenedhlow ha tavosow trigys y'n norvys oll: ‘Pals re bo agas kres!

Yona 1:9

Yn-medh ev dhedha, ‘Ebrow ov vy, ha my a berth own a'n Arloedh, Duw an nev, neb a formyas an mor ha'n tir sygh.’