2 Samuel 18:2 - An Bibel Kernewek 20234 (Kernewek Kemmyn)

² Ha Davydh a dhannvonas yn-rag tressa rann a'n bobel yn-dann leuv Yoab, ha tressa rann yn-dann leuv Abishay mab Seruya, broder Yoab, ha tressa rann yn-dann leuv Ittay an Gittyas. An myghtern a leveris dhe'n bobel, ‘My ow honan a wra mos yn-rag genowgh ynwedh.’

2 Samuel 18:2 Iomraidhean Croise

2 Samuel 17:11

Rakhenna, my a gusul, bedhes oll Ysrael kuntellys dhis, dhiworth Dan bys yn Beer-sheba, kepar ha'n tewes usi ryb an mor yn niver, ha ty dha honan ow mos y'n vatel.

2 Samuel 21:17

Mes Abishay mab Seruya a'n gweresas ha gweskel an Filistyas ha'y ladha. Ena gwer Davydh a dos dhodho ha leverel, ‘Ny wre'ta mos yn-mes yn batel genen arta, ma na vydh lugarn Ysrael difeudhys.’

2 Samuel 23:18

Abishay broder Yoab mab Seruya o chyf an Tri. Ev a dhrehevis y wuw erbynn tri hans ha'ga ladha, ha gwaynya hanow gans an Tri.

2 Samuel 8:16

Yth esa Yoab mab Seruya war an lu; ha Yehoshafat mab Ahilud o kovadhor;

1 Myghternedh 2:28

Pan dheuth an nowodhow dhe Yoab – rag Yoab a assentsa gans Adoniya, kyn na assentsa gans Absalom – Yoab a fias dhe dylda an Arloedh, hag a dhalghennas kern an alter.

Salmow 3:6

Ny borthav own a dhegow a vilyow a'n bobel, neb re omsettyas a-derdro er ow fynn.

Breusysi 7:16

A-wosa ev a rannas an tri hans gour yntra tri fara, hag a worras hirgern yn aga diwdhorn oll, ha sethow gwag, gans faglennow a-berth y'n sethow.

Breusysi 7:19

Ytho Gideon ha'n kans gour esa ganso a dheuth dhe gyrghynn an kamp yn dalleth an goel kres, wosa i dhe settya an goel; hag i a hwythas an hirgern ha brewi an sethow esa yn aga diwla.

Breusysi 9:43

ev a gemmeras an bobel ha'ga ranna yntra tri fara, hag a gontrewaytyas y'n prasow. Pan viras ha gweles an dus ow tos yn-mes a'n sita, ev a sevis er aga fynn ha'ga ladha.

1 Samuel 11:11

An nessa dydh Sowl a rannas an bobel yn teyr rann, hag orth goel an bora i a dheuth a-bervedh y'n kamp ha ladha an Ammonysi bys toemmder an jydh; ha'n re a veu gesys a skattras, ma nag esa dew anedha gesys war-barth.