MATHAI 1 - Biahrai Tha Zyphe rei

Zisu Khri thokehnah

¹ Abraham pathlah, David pathlah a cangpaw Zisu Khri thokehnah cazing leco,

² Abraham cawh Isak a paw cang ka, Isak cawh Jakob a paw a cang. Jakob cawh Judah le a uny sahlo aa paw a cang.

³ Judah cawh Perez le Zera aa paw cang ka, aa no cawh Tama a cang. Perez cawh Hezron a paw cang ka, Hezron cawh Ram a paw a cang.

⁴ Ram cawh Aminada a paw cang ka, Aminada cawh Nashon a paw a cang. Nashon cawh Salmon a paw a cang,

⁵ Salmon cawh Boaz a paw cang ka, a no cawh Rahab a cang. Boaz cawh Obed a paw cang ka, a no cawh Ruth a cang. Obed cawh Jesi a paw cang ka,

⁶ Jesi cawh siangpahrang David a paw a cang. David cawh Solomon a paw cang ka, Solomon a no cawh Uria a nupui tawpaw khah a cang.

⁷ Solomon cawh Rehoboam a paw cang ka, Rehoboam cawh Abija a paw a cang. Abija cawh Asa a paw cang ka,

⁸ Asa cawh Jehoshafat a paw a cang. Jehoshafat cawh Jehoram a paw cang ka, Jehoram cawh Uziah a paw a cang.

⁹ Uziah cawh Jotham a paw cang ka, Jotham cawh Ahas a paw a cang. Ahas cawh Hezekia a paw cang ka,

¹⁰ Hezekia cawh Manaseh a paw a cang. Manaseh cawh Amon a paw cang ka, Amon cawh Josai a paw a cang.

¹¹ Josai cawh Jekhonia le a uny sahlo aa paw cang ka, ma cai leco Babilon raang lang khah sae tah seikhui a cang he.

¹² Babilon raang lang sae tah seikhui aa cang khy taiteipaw: Jekhonia cawh Shealtia a paw a cang. Shealtia cawh Zerubabel a paw cang ka,

¹³ Zerubabel cawh Abiud a paw a cang. Abiud cawh Eliakim a paw cang ka, Eliakim cawh Azor a paw a cang.

¹⁴ Azor cawh Zadok a paw cang ka, Zadok cawh Akhim a paw a cang. Akhim cawh Eliud a paw cang ka,

¹⁵ Eliud cawh Eleazar a paw a cang. Eleazar cawh Mathan a paw cang ka, Mathan cawh Jakob a paw a cang.

¹⁶ Jakob cawh Khri tatei aa tahpaw Zisu a no Mari a pasaepaw Josef a paw khah a cang.

¹⁷ Ma hrahei Abraham taitah David tai letah chaihraw hluipali, David taitah Babilon raang lang sae tah seikhui aa cangnah tai letah chaihraw hluipali, sae tah seikhui aa cangnah taitah Khri a pinah tai letah chaihraw hluipali a cang.

Zisu Khri pinah

¹⁸ Zisu Khri a pinah konglang cawh ma hrahei a cang. A no Mari cawh Josef khatah a pahlawng pawtah pahapaw a cang. Canghrasala aa pahlawng hlai he tah Mari cawh Thlawpaw Pathai hmingtuakhynah thongtah sawtei a pho.

¹⁹ A pasae ruapaw Josef cawh mehding mehchaw a cangnah cawtah mingzawpui hme letah Mari a ningzawsah khah du be ca ka, kaa pahlawng peh aa tahpaw khah aparuh teitah bia ka pheh kaw a tatah a pacang.

²⁰ Canghrasala, ma hratei a pacang khy taico, Abuipaw a vaiming pakheh cawh ama khatah a mang letah a za paly ka, a hai letah, “David pathlah a cangpaw Josef, Mari cawh nupui rua tah chui pawtah lung ngerai lytah ung kheh. Zecawtamaw tatah punglong lytah a cangpaw khah Thlawpaw Pathai thongtah a cang.

²¹ Sawcapaw sah a ka, a ming tah Zisu na sá a. Zecawtamaw tatah Ama taco a cawngsaw sahlo khah aa suanah taitah a pachá he a,” tatah a tah.

²² Ma hming vytei a va ungpaw heh Abuipaw tah Khazing khuavang hmang tei a reipaw:

²³ “Laisaw pathai tah sawtei pho ka, sawcapaw a sá a, Ama cawh Immanuel tatah aa y a,” tatah a tah. Immanuel a silang cawh, “Khazing kaaning khatah a ung,” tahnah a cang.

²⁴ Josef cawh a ka hraw tihtah Abuipaw a vaiming tei a chingpaw hrakhei tua ka, Mari cawh nupui ruapaw takhei ing lang cawh a chui.

²⁵ Canghrasala sawcapaw a sah hlai vytei khah cawh ung hrui be. Taico sawcapaw a sahpaw cawh Zisu tatah ming a sah.