HEBRU 2 - Biahrai Tha Zyphe rei

Nawthlia pawtah raering pehnah

¹ Macawtaco, a pingpaly lang kaa seisua ly nápawtah kaa thuipaw bia khah a cy vy tah kaa tle hrahring ruapaw a cang.

² Taico vaiming sahlo tei aa pehpaw phungbia hmai khah pacysah cang tah a zui lypaw le a cakahpaw cawh a tlahpaw dangtahnah khah peh a cang caco,

³ ma tluh pachahnah rungnawpaw heh zerei lytah ung my peh seh la, zekhatamaw hrehnah cawh kaa saisai khy a? Ma pachahnah cawh a hmetawcai tah Abuipaw hrahring tah rei ka, a thuipaw maikaw tah a reipaw bia cawh kaa hai letah aa pacysah.

⁴ Khazing zong tah paching pakhanah le khuarawhanah le ningang chuipaw hming a phingphing tah le Ama a du pawtei hratah Thlawpaw Pathai lahsong a pehnahpaw khei thawngchawbia cawh a dih tatah a palang.

Zisu cawh a uny sahlo hratah a tua

⁵ A va chuh lepaw alui, atotei a kong kaa rei leimeipaw heh vaiming sahlo tah aa uhpaw cang be.

⁶ Canghrasala zeletah tlong maw, ma hrahei a rei bang, “Khazing, mehnung heh zeky cang ka maw na thui paria thlang? Cawngsaw Sawcapaw heh ze cang ka maw a zawng na rawh?

⁷ Ama cawh vaiming sahlo navy tah a nai vy thehpaw tah tua ceh ka, rungnawnah le palawngpalinah khah na khusah,

⁸ zezong vytei khah a phe rai letah na chia,” tatah a tah. A phe rai letah zezongpui a chia tih taco, Khazing tah a nawhnuinah rai letah a chia lypaw zehmai ung be. Canghrasala ato lehei co, nawhnuinah zezongpui a phe rai letah a ung tahpaw hmuh balang bei peh.

⁹ Canghrasala kaa hmuhpaw cawh Zisu, vaiming navy tei a nai vy theh tei tuapaw a cangpaw khah atoheh palawngpalinah le rungnawnah cawh a khusah a cang. Zecawtamaw tatah thihnah khah ing ka, Khazing ningdonah thongtah ming vytei cawtah thihnah khah a pateh pah thlu he.

¹⁰ Sawtei a hlupui khah rungnawnah lang phah sá pawtah Ama a cawtah le Ama a thongtah zezongpui a ungpaw Khazing tah pachahnah a tuatupaw khah tai-ingnah thongtah mehtling tah a tuapaw cawh a tlahpaw a cang.

¹¹ Mehnung suanah a pathaisahtu le suanah pathaisah a cangpaw sahlo cawh ingchungkho kheh a cang he. Ma navai taco Zisu tei ka uny sahlo tatei a ypaw he khah a ningzeh be.

¹² Ama tah, “Ka uny sahlo hai letah na ming cawh ka palang a, a pungpaw sahlo he aa hmekaw letah nama reithai tah hlaw ka sá a,” tatah Khazing khah a tah.

¹³ Taico, “Ama letah ka ngepainah ka chia a,” a tah. Mataico, “Ma lehei Khazing tei a pa pehpaw sawtei sahlo khatah ka ung,” tatah a tah vy.

¹⁴ Mataico, sawtei sahlo cawh thi le saw tei a hringpaw mehnung aa cangnah cawtah Zisu zong cawh cawngsaw cangnah khah a hrong hrah. Ma hraco a cangnah cawh thihnah cung letei, naw a hnuitu Setan khah Ama a thihnah thongtah a hlyde khy nápawtah le,

¹⁵ thihnah cinah thongtah aa hring chung vytei sae hratei a ungpaw vytei khah a pachah nápaw he cawtah a cang.

¹⁶ Zecawtamaw tahpaw co, a bongpaw he cawh vaiming khah cang ly he tah Abraham pathlah sahlo hrahring khah a cang hri he.

¹⁷ Ma rawng tahei, Ama cawh a uny sahlo hratah kawngting letah tua a hypaw cang ka, Khazing raihrenah letah zingchuipaw le zawngepaw tlangbui alaicaipaw a cang khy nápawtah le cawngsaw cawtah sua ngethainah a tuapah ruapaw tah a cang.

¹⁸ Ama hrahring takhei tuhsonah khah a ing thahnah cawtah tuhsonah aa ingpaw sahlo he khah a bong khy he.