APALYNAH 10 - Biahrai Tha Zyphe rei

Vaiming le cabu lingpaw a chia pawtei

¹ Mataico, ahringpaw a thawtlungpaw vaiming vaicung taitah a za cungpaw khah hmuh neh ka, ama cawh meding khah a hrei. A lu cung letah mesakupaw a zaang ka, a hme cawh ning lo ka, a ngaelang cawh metung aa lo.

² Ama cawh a kih letah a pakai thlangpaw cabu lingpaw a chia pawtei khah a tle ka, a cacang lang phe khei rili khah tlai ka, a cavui lang phe khei alui khah a tlai.

³ Taico, cakebarung a hrungpaw hrakhei a thangpui tah a y. A hrung khy taico khalung sangsarih o tah bia aa rei.

⁴ Taico, khalung sangsarih o tah bia a reining taco, ca tah ka cia a tah neh ka, canghrasala vaicung taitah, “Khalung sangsarih bia khah cakhai khai la, cia balang kheh,” tatah a pa tahpaw o ka thui.

⁵ Mataico, rili le alui a cung letei a daw thlangpaw vaiming ka hmuhpaw taco, a cacang lang kih cawh vaicung lang khah a calia.

⁶ Taico, chaizaw tah chaizaw tai a hringpaw, avai le a chung leteipaw vytei a papipaw, alui le a chung leteipaw vytei a papipaw le rili le a chung leteipaw vytei a papipaw Khazing ming khei chia a sah ka, “Ry khaw be!

⁷ Canghrasala vaiming a pasarihnah tah a hmoka khah a tung tih taco, Khazing tah a sae khuavang sahlo hai letei a za reipaw hrakhei Khazing biaparuh cawh a tling a,” tatah a tah.

⁸ Mataico, vaicung letei ka thuipaw o takhei bia pa ching kaw hui ka, “Va sei la, rili le alui khah tlai katei, a daw thlangpaw vaiming a kih letei a pakai thlangpaw cabu lingpaw a chia pawtei khah va law,” tatah a pa tah.

⁹ Macawtaco vaiming khaco a vaw neh ka, cabu lingpaw cawh pa pei law tatah ka va tah. Ama taco, “Law la, e. Na ri leco a thobahla a, canghrasala na kaw leco akhui tui hratah a thlung a,” tatah a pa tah.

¹⁰ Vaiming a kih letei cabu lingpaw a chia pawtei cawh law neh ka, ka e. Ka kaw leco akhui tui hratah a thlung, canghrasala ka lang tihtah ka ri leco a thobahla.

¹¹ Mataico, “Mingphing hlupui, raang hlupui, rei hlupui le siangpahrang hlupui sahlo kong letei Khazing tah a reipaw bia khah na rei hry kaw a,” tatah a pa tah.