UJobe 32 - IBHAYIBHELI ELINGCWELE

U-Elihu uyaqhamuka

¹ Lawo madoda amathathu ayeseyeka ukumphendula uJobe, ngokuba wayelungile emehlweni akhe.

² Lwase luvutha ulaka luka-Elihu, indodana kaBarakeli, umBuzi womndeni kaRamu; ulaka lwakhe lwavuthela uJobe, ngokuba wazithetha yena kunoNkulunkulu.

³ Ulaka lwakhe lwavuthela nabangane bakhe abathathu, ngokuba noma bengafumananga impendulo, bamlahla nokho uJobe.

⁴ U-Elihu wayelindele ukukhuluma kuJobe, ngokuba bona babebadala kunaye.

⁵ Lapho u-Elihu esebona ukuthi ayikho impendulo emilonyeni yalawo madoda amathathu, lwavutha ulaka lwakhe.

⁶ U-Elihu, indodana kaBarakeli, umBuzi, wayesethatha-ke, wathi: “Mina ngisemusha ngeminyaka, nina nibadala; ngalokho nganginamahloni, ngesaba ukunitshela umqondo wami.

⁷ Ngathi: ‘Makukhulume izinsuku, ubuningi beminyaka bazise ukuhlakanipha.’

⁸ Nokho kukhona umoya kumuntu; ukuphefumula kukaSomandla kuyabaqondisa.

⁹ Abakhulu abahlakaniphile, nabadala abaqondi ukwahlulela.

¹⁰ “Ngalokho ngithi: Ngizweni; nami ngiyakusho umqondo wami.

¹¹ Bhekani, ngilindele amazwi enu, ngabeka indlebe emiqondweni yenu, nisaphenya eniyakukusho.

¹² Nganilalela nina; bhekani, kwakungekho noyedwa owamahlula uJobe nowaphendula amazwi akhe phakathi kwenu.

¹³ Maningasho ukuthi: ‘Sifumene ukuhlakanipha; uNkulunkulu angamphengulula, hhayi umuntu.’

¹⁴ Akahlelelanga mina amazwi akhe; angiyikumphendula ngezinkulumo zenu.

¹⁵ “Bayakhungatheka, abasaphenduli; baphelelwa ngamazwi.

¹⁶ Ngibalindele yini, uma bengakhulumi, na? Ngokuba bemi bengasaphenduli.

¹⁷ Nami ngiyakuphendula okwami, ngitshengise nami umqondo wami.

¹⁸ Ngokuba ngigcwele amazwi; umoya phakathi kwami uyangiqhubezela.

¹⁹ Bhekani, okuphakathi kwami kunjengewayini elingenambobo; kucishe ukuqhuma njengezimvaba ezintsha.

²⁰ Ngiyakukhuluma ukuba ngikhululeke; ngiyakuvula izindebe zami ukuba ngiphendule.

²¹ Mangingakhethi ubuso bamuntu, ngingathophi nobani.

²² Ngokuba angikwazi ukuthopha; uma kunjalo, uMenzi wami angangisusa masinyane.