UJobe 23 - IBHAYIBHELI ELINGCWELE

UJobe uphendula inkulumo yesithathu ka-Elifazi: ukhala ngokubeka indaba yakhe phambi kukaNkulunkulu

¹ Wayesephendula uJobe, wathi:

² “Nanamuhla ukukhala kwami kumunyu; isandla sami siyasinda ngokububula kwami.

³ Sengathi ngingazi ukuthi ngiyakumtholaphi, ngize ngifike endlini yakhe,

⁴ ngilungise ukwahlulelwa kwami phambi kwakhe, ngigcwalise umlomo wami ngezimpendulo.

⁵ Bengiyakuwazi amazwi abeyakungiphendula ngawo, ngiqonde ukuthi ubeyakuthini kimi.

⁶ Ubeyakuphikisana nami ngamandla akhe amakhulu na? Cha, ubeyakubhekisa kimi.

⁷ Lapho olungileyo ubeyakuphikisana naye, mina ngikhululwe kumahluleli wami kuze kube phakade.

⁸ Kodwa bheka, ngiya empumalanga, kepha akakho, nasentshonalanga, kepha angimboni,

⁹ nangasenyakatho ekusebenzeni kwakhe, kepha akabonwa; ujikela ngaseningizimu, kepha akabonakali.

¹⁰ Ngokuba uyayazi indlela yami; esengivivinyile, ngiyakuphuma njengegolide.

¹¹ Unyawo lwami lunamathele ezinyathelweni zakhe; ngigcinile indlela yakhe, angiphambukanga.

¹² Angichezukanga emyalweni wezindebe zakhe; ngizibekele amazwi akhe kunezimiso zami.

¹³ “Kodwa uyinto inye, ngubani ongambuyisa na? Okufisayo umphefumulo wakhe, lokho uyakwenza.

¹⁴ Uyakufeza engikumiselweyo; izinto eziningi ezinjalo zikuye.

¹⁵ Ngalokho ngishaywa luvalo ebusweni bakhe; lapho ngikuqaphela, ngiyamesaba.

¹⁶ NguNkulunkulu odangalisileyo inhliziyo yami, uSomandla ungethusile,

¹⁷ ngokuba anginqunywanga, bungakafiki ubumnyama; wangifihlela ukuhlwa.