IsiHlabelelo seziHlabelelo 1 - IBHAYIBHELI ELINGCWELE

Umakoti ulangazelela umyeni

¹ Isihlabelelo sezihlabelelo esingesikaSolomoni.

Umakoti:

² Makangange ngokwanga komlomo wakhe! Ngokuba uthando lwakho lumnandi kunewayini.

³ Amafutha akho anephunga elimnandi; igama lakho linjengamafutha athululiweyo; ngalokho izintombi ziyakuthanda.

⁴ Ngidonse emva kwakho, sigijime; inkosi isingingenisile emakamelweni ayo. Siyakujabula, sithokoze ngawe, sikhulume ngothando lwakho kunewayini. Kufanele ukuba bakuthande.

Abangane: Umakoti:

⁵ Ngimnyama, kepha ngimuhle, madodakazi aseJerusalema, njengamatende akwaKedari, njengezilenge zikaSolomoni.

⁶ Ningangibuki ukuthi ngimnyamana, ngokuba ilanga lingifusile. Amadodana kamame angifutha, angenza umlindizivini, kepha isivini esingesami angisilindanga.

⁷ Ngitshele wena othandwa ngumphefumulo wami ukuthi waluselaphi, uphumuzaphi umhlambi emini, ngokuba yini ukuba ngibe njengowesifazane odukileyo ngasemihlambini yabangane bakho na?

Abangane:

⁸ Uma ungakwazi wena muhlekazi phakathi kwabesifazane, phuma uhambe ezinyathelweni zomhlambi, waluse amazinyane akho ngasematendeni abelusi.

Ukuphendulana komyeni nomakoti. Umnyeni:

⁹ Ngikufanisa nehhashi lensikazi lezinqola zikaFaro, sithandwa sami.

¹⁰ Izihlathi zakho zinhle kangakanani zinezintambo zobuhlalu, nentamo yakho ineminaka.

¹¹ Siyakukwenzela izintambo zobuhlalu begolide, namaqhosha esiliva.

Umakoti:

¹² Inkosi isahlezi ngasetafuleni layo inadi* lami lathaphuka iphunga lalo.

¹³ Othandiweyo wami ungumshuqulu wemure* kimi, olele phakathi kwamabele ami.

¹⁴ Othandiweyo wami uyihlukuzo lezimbali zehena* ezivinini zase-Eni Gedi.

Umnyeni:

¹⁵ Bheka, umuhle, sithandwa sami! Bheka, umuhle! Unamehlo amajuba.

Umakoti:

¹⁶ Bheka, umuhle, othandiweyo wami! Yebo, umnandi, nesilili sethu siluhlaza.

Umnyeni:

¹⁷ Imishayo yendlu yethu iyimisedari,* nemiqhadi iyimisayipuresi.*