NgokukaLuka 18 - IBHAYIBHELI ELINGCWELE

Umahluleli ongalungile

¹ Wabalandisa umfanekiso wokuthi bamelwe ukukhuleka njalo, bangadangali.

² Wathi: “Kwakukhona emzini othile umahluleli othile owayengamesabi uNkulunkulu, enganaki muntu.

³ Kulowo muzi kwakukhona futhi umfelokazi owayelokhu efika kuye, ethi: ‘Ngizwele esitheni sami.’

⁴ “Kwaba yisikhathi engavumi; kepha ngasemuva wathi phakathi kwakhe: ‘Nakuba ngingamesabi uNkulunkulu, nginganaki muntu,

⁵ nokho-ke ngokuba lo mfelokazi engikhathaza njalo, ngiyakumzwela, funa angizuke ngokufika njalonjalo.’ ”

⁶ Yayisithi iNkosi: “Yizwani okushiwo ngumahluleli ongalungile.

⁷ UNkulunkulu kayikubezwela yini abakhethiweyo bakhe abakhala kuye imini nobusuku, ababekezelele, na?

⁸ Ngithi kini: Uzakubezwela masinyane. Nokho nxa ifika iNdodana yomuntu, imbala iyakufumana ukukholwa emhlabeni na?”

UmFarisi nomthelisi ethempelini

⁹ Wayesekhuluma kwabathile ababezethemba ukuthi balungile, bedelela abanye, ebalandisa lo mfanekiso ngokuthi:

¹⁰ “Abantu ababili benyukela ethempelini beya kukhuleka, omunye engumFarisi, omunye engumthelisi.

¹¹ UmFarisi wema wazikhulekela ngokuthi: ‘Nkulunkulu, ngiyakubonga ngokuba ngingenjengabanye abantu: izigcwelegcwele, abangalungile, iziphingi, nanjengalo mthelisi.

¹² Ngizila ukudla kabili ngeviki, nginikela okweshumi kukho konke enginakho.’

¹³ “Kepha umthelisi emi kude wayengafuni nakuphakamisela amehlo akhe ngasezulwini, kodwa washaya isifuba sakhe, ethi: ‘Nkulunkulu, ngihawukele mina soni.’

¹⁴ “Ngithi kini: Lo wehlela endlini yakhe elungisisiwe kunomunye. Ngokuba yilowo nalowo oziphakamisayo uzakuthotshiswa, kodwa ozithobayo uzakuphakanyiswa.”

Ukubusiswa kwabantwana

¹⁵ Baletha kuye nabantwanyana ukuba abaphathe; kepha abafundi bekubona babakhuza.

¹⁶ Kodwa uJesu wababizela kuye, wathi: “Vumelani abantwana beze kimi, ningabenqabeli, ngokuba umbuso kaNkulunkulu ungowabanjalo.

¹⁷ Ngiqinisile ngithi kini: Yilowo nalowo ongamukeli umbuso kaNkulunkulu njengomntwana kasoze angena kuwo.”

Insizwa enothileyo

¹⁸ Umbusi othile wayesembuza ethi: “Mfundisi omuhle, ngiyakwenzani ukuba ngidle ifa lokuphila okuphakade na?”

¹⁹ Kepha uJesu wathi kuye: “Ungibizelani ngokuthi ngimuhle na? Kakho omuhle, munye kuphela, uNkulunkulu.

²⁰ Uyayazi imiyalelo ukuthi: ‘Ungaphingi, ungabulali, ungebi, ungafakazi amanga, yazisa uyihlo nonyoko.’ ”

²¹ Kepha wathi: “Konke lokho ngikugcinile kwasebusheni bami.”

²² UJesu ekuzwa lokho wathi kuye: “Usasilalelwe into inye: thengisa ngakho konke onakho, wabele abampofu, khona uzakuba negugu ezulwini; uze ungilandele.”

²³ Kuthe ekuzwa lokho, wadabuka impela, ngokuba wayenothile kakhulu.

²⁴ UJesu embona wathi: “Kulukhuni kangakanani kwaba nomnotho ukungena embusweni kaNkulunkulu.

²⁵ Kulula ukuba ikamela lingene ngentunja yosungulo kunokuba onothileyo angene embusweni kaNkulunkulu.”

²⁶ Abezwayo base bethi: “Pho, kungasindiswa bani na?”

²⁷ Kepha wathi: “Okungenzeki kubantu kungenzeka kuNkulunkulu.”

Umvuzo wokuzidela

²⁸ Wayesethi uPetru: “Bheka, thina sishiye okwethu, sakulandela.”

²⁹ Wathi kubo: “Ngiqinisile ngithi kini: Akukho muntu oshiye indlu, noma umkakhe, noma abafowabo, noma abazali, noma abantwana ngenxa yombuso kaNkulunkulu,

³⁰ ongayikwamukeliswa okuphindwe kaningi kulesi sikhathi nasenkathini ezayo ukuphila okuphakade.”

UJesu ukhuluma ngokuhlupheka kwakhe

³¹ Wayesebasondeza kuye abayishumi nambili, wathi kubo: “Bhekani, sikhuphukela eJerusalema; konke okulotshwe ngabaprofethi ngeNdodana yomuntu kuyakugcwaliseka.

³² Ngokuba izakukhashelwa kwabezizwe, iklolodelwe, idunyazwe, ikhafulelwe ngamathe,

³³ bayishaye, bayibulale; kepha ngosuku lwesithathu izakuvuka.”

³⁴ Kepha bona kabaqondanga lutho lwalokho; lelo zwi lalifihlakele kubo, abakuqondanga obekushiwo.

³⁵ Kwathi esesondela eJeriko, impumputhe ethile yayihlezi ngasendleleni inxiba.

³⁶ Isizwa isixuku sidlula, yabuza ukuthi: “Kuyini lokhu?”

³⁷ Base beyitshela ukuthi: “Kudlula uJesu waseNazaretha.”

³⁸ Yayisimemeza ithi: “Jesu, Ndodana kaDavide, ngihawukele!”

³⁹ Ababehamba phambili bayikhuza ukuba ithule kepha kwayikhona imemeza kakhulu yona, ithi: “Ndodana kaDavide, ngihawukele!”

⁴⁰ Wema-ke uJesu, wayala ukuba ilethwe kuye. Isisondele, wayibuza wathi:

⁴¹ “Ufuna ukuba ngikwenzeleni na?” Yathi: “Nkosi, ukuba ngibone.”

⁴² UJesu wathi kuyo: “Bona! Ukukholwa kwakho kukusindisile.”

⁴³ Yayisibona khona lapho, yamlandela imdumisa uNkulunkulu, nabantu bonke bekubona bamnika uNkulunkulu indumiso.