KwabaseRoma 12 - IBHAYIBHELI ELINGCWELE

Ukuhamba okungcwele

¹ Ngakho ngiyanincenga, bazalwane, ngobubele bukaNkulunkulu ukuba ninikele imizimba yenu ibe ngumnikelo ophilileyo, ongcwele, othandeka kuNkulunkulu, kube ngukukhonza kwenu kokuqonda;

² ningalingisi leli zwe, kodwa niguqulwe isimo ngokwenziwa ibe ntsha ingqondo yenu, ukuze nibe nokuhlolisisa okuyintando kaNkulunkulu, okuhle, nokuthandekayo, nokupheleleyo.

Ukuthobeka

³ Ngokuba ngomusa engiwuphiweyo ngisho kulowo nalowo phakathi kwenu ukuthi angacabangi athi mkhulu kunalokho afanele ukukucabanga, kodwa acabange kube ngokuqonda, njengalokho uNkulunkulu abele lowo nalowo isilinganiso sokukholwa.

⁴ Ngokuba njengalokhu sinezitho eziningi emzimbeni munye, kepha izitho zonke azinamsebenzi munye,

⁵ kanjalo thina esibaningi simzimba munye kuKristu, kepha ngabanye siyizitho, omunye esomunye.

⁶ Sinezipho zomusa ezahlukileyo ngokomusa esiwuphiweyo; uma singesokuprofetha, asiprofethe ngesilinganiso sokukholwa;

⁷ uma singesokukhonza, kube senkonzweni; ofundisayo, kube sekufundiseni,

⁸ oyalayo, ekuyaleni; owabayo, enze ngobuqotho; oholayo, ngenkuthalo; ohawukelayo, ngentokozo.

Uthando nokuphathana kahle

⁹ Uthando malungabi nakuzenzisa; nenyanye okubi, nibambelele kokuhle;

¹⁰ thandanani ngenhliziyo ngothando lobuzalwane; ekwazisaneni nandulelane;

¹¹ ekukhuthaleni ningenqeni, nivuthe emoyeni, nikhonze iNkosi;

¹² ethembeni nithokoze; osizini nibekezele; ekukhulekeni niqinisele njalo;

¹³ hlanganyelani nabangcwele ekusweleni kwabo, nikhuthalele ukungenisa izihambi.

¹⁴ Babusiseni abanizingelayo; busisani, ningaqalekisi.

¹⁵ Thokozani nabathokozayo, nikhale nabakhalayo.

¹⁶ Manibe nhliziyonye; ningazindli okuphakemeyo, kodwa yaneliswani ngokuphansi. Ningazishayi abahlakaniphileyo.

¹⁷ Ningaphindiseli muntu okubi ngokubi; nakani okuhle phambi kwabantu bonke;

¹⁸ uma kungenzeka, ngokwenu hlalisanani ngokuthula nabantu bonke;

¹⁹ ningaziphindiseli nina bathandwa, kodwa dedelani ulaka, ngokuba kulotshiwe ukuthi: “Ngokwami ukuphindisela, ngiyakubuyisela mina,” isho iNkosi.

²⁰ Kepha: “Uma isitha sakho silambile, siphe sidle; uma somile, siphuzise, ngokuba ngokwenza lokho uyakube ufumbela amalahle avuthayo ekhanda laso.”

²¹ Unganqotshwa ngokubi, kodwa nqoba okubi ngokuhle.