IzAga 9 - IBHAYIBHELI ELINGCWELE

Ukuhlakanipha nobuwula

¹ Ukuhlakanipha kwakhile indlu yakho; kuzibazile izinsika zakho eziyisikhombisa.

² Kuhlabile umhlatshelo, kuvubele iwayini lakho; futhi kulungisile itafula lakho.

³ Kuthumile izintombi zakho, kuyamema emagqumeni aphakemeyo omuzi, kuthi:

⁴ “Ongenalwazi makaphambukele lapha,” kongenangqondo kuthi:

⁵ “Wozani nidle isinkwa sami, niliphuze iwayini engilivubeleyo.

⁶ Yekani ubuwula, niphile, nihambe ngendlela yokuqonda.

⁷ “Osola isideleli uzithathela inhlamba; othethisa omubi uzitholela isisihla.

⁸ Ungathethisi isideleli, funa sikuzonde; thethisa isihlakaniphi, siyakukuthanda.

⁹ Siphe isihlakaniphi, siyakwanda ngokuhlakanipha; fundisa olungileyo, uyakwenezela emfundweni.

¹⁰ “Ukuqala kokuhlakanipha kungukumesaba uJehova, nokumazi oNgcwele kungukuqonda.

¹¹ Ngokuba ngami izinsuku zakho ziyakuba ziningi, neminyaka yokuphila kwakho iyakwenezelwa kuwe.

¹² Uma uhlakaniphile, uzihlakaniphele; uma udelela, uyakukuthwala wena wedwa.”

¹³ Ubuwula bungowesifazane oyisithutha onomsindo, ongazi lutho.

¹⁴ Uhlezi ngasemnyango wendlu yakhe esihlalweni ezindaweni eziphakemeyo zomuzi

¹⁵ ukuba ameme abadlula endleleni, abaqonda emikhondweni yabo, ngokuthi:

¹⁶ “Ongenalwazi makaphambukele lapha,” kongenangqondo uthi:

¹⁷ “Amanzi ebiweyo amnandi, nesinkwa sentukuso singesenamisayo.”

¹⁸ Kepha akazi ukuthi kuyizithunzi ezilapho nokuthi izimenywa zakhe zisezigodini zendawo yabafileyo.