IsiLilo 5 - IBHAYIBHELI ELINGCWELE

Umkhuleko wokuzwelwa

¹ Khumbula, Jehova, esehlelwe yikho; bheka, ubone ihlazo lethu.

² Ifa lethu seliphendulelwe abafokazi, nezindlu zethu kwabezizwe.

³ Siyizintandane, asinababa; omame banjengabafelokazi.

⁴ Amanzi ethu siyawaphuza ngemali, izinkuni zethu ziza ngentengo.

⁵ Abasixoshayo basezintayeni zethu; sikhathele, asinakuphumula.

⁶ Sinike isandla sethu kulo iGibithe nakulo i-Asiriya ukuba sisuthe isinkwa.

⁷ Obaba bona abasekho; thina sithwala ububi babo.

⁸ Izigqila ziyasibusa; akakho osikhulula esandleni sabo.

⁹ Sithola ukudla kwethu ngokuzidela amathambo ngenxa yenkemba yasehlane.

¹⁰ Isikhumba sethu siyasha njengeziko ngokushisa kwendlala.

¹¹ Balala nabesifazane eSiyoni, izintombi zasemizini yakwaJuda.

¹² Izikhulu zaphanyekwa ngezandla zabo; ubuso babadala ababuhloniphanga.

¹³ Izinsizwa zathwala amatshe okugaya, abantwana bakhubeka phansi kwezinkuni.

¹⁴ Abadala baphelile esangweni, nezinsizwa ekuhlabeleleni kwazo.

¹⁵ Intokozo yenhliziyo yethu iphelile; ukusina kwethu kuphenduke ukulila.

¹⁶ Umqhele uwile ekhanda lethu. Maye kithina, ngokuba sonile!

¹⁷ Ngalokho inhliziyo yethu idangele; ngalezi zinto amehlo ethu afiphele,

¹⁸ ngenxa yentaba yaseSiyoni echithekile, zize zihambe kuyo izimpungushe.

¹⁹ Wena Jehova umi phakade; isihlalo sakho sobukhosi sikhona ezizukulwaneni ngezizukulwane.

²⁰ Usikhohlelwani kuze kube phakade, usishiye izinsuku eziningi, na?

²¹ Sibuyisele kuwe Jehova, siyakubuya; yenza izinsuku zethu zibe zintsha njengasendulo,

²² ngokuba usilahlile nokusilahla, wasithukuthelela kakhulu.