AmaHubo 98 - IBHAYIBHELI ELINGCWELE

Umkhululi wakwa-Israyeli nomahluleli wezwe

Ihubo.

¹ Mhubeleni uJehova igama elisha, ngokuba wenze izimangaliso; esokunene sakhe nengalo yakhe engcwele kumtholele ukunqoba.

² UJehova wazisile insindiso yakhe; ukulunga kwakhe ukwambulile emehlweni abezizwe.

³ Ukhumbulile umusa wakhe nokuthembeka kwakhe kuyo indlu ka-Israyeli; imikhawulo yonke yomhlaba ibonile insindiso kaNkulunkulu wethu.

⁴ Hlokomani kuJehova ngezwi lokuhalalisa, nihlabelele ngenjabulo, nihube.

⁵ Mhubeleni uJehova ngehabhu,* ngehabhu nangezwi lehubo.

⁶ Ngamacilongo nangokukhala komtshingo hlokomani ngezwi lokuhalalisa phambi kweNkosi uJehova.

⁷ Maludume ulwandle nokugcwala kwalo, izwe nabakhileyo kulo.

⁸ Imifula mayishaye ihlombe, izintaba zihalalise kanyekanye

⁹ ebusweni bukaJehova, ngokuba uyeza ukwahlulela umhlaba. Uyakwahlulela izwe ngokulunga nezizwe ngobuqotho.