AmaHubo 95 - IBHAYIBHELI ELINGCWELE

Ukubonga nokulalela uNkulunkulu

¹ Wozani simhubele uJehova, sihlabelele ngenjabulo kulo idwala lensindiso yethu.

² Masize phambi kobuso bakhe ngokubonga, sihlabelele kuye ngamahubo.

³ Ngokuba uJehova unguNkulunkulu omkhulu, uyinkosi enkulu phezu kwawonkulunkulu bonke.

⁴ Esandleni sakhe kukhona ukujula komhlaba; iziqongo zezintaba ngezakhe nazo.

⁵ Ulwandle ngolwakhe, walwenza; nomhlabathi owomileyo izandla zakhe zawubumba.

⁶ Wozani; masikhuleke, sikhothame, siguqe phambi kukaJehova, uMenzi wethu.

⁷ Ngokuba yena unguNkulunkulu wethu, thina singabantu bedlelo lakhe nezimvu zesandla sakhe. Namuhla, uma nilizwa izwi lakhe,

⁸ ningayenzi lukhuni inhliziyo yenu njengaseMeriba, njengasosukwini lwaseMasa ehlane,

⁹ lapho oyihlo bangilinga khona, bangivivinya, babona umsebenzi wami.

¹⁰ Iminyaka engamashumi amane nganengwa yileso sizukulwane, ngaze ngathi: “Bangabantu abanhliziyo zabo zidukile, abazazanga izindlela zami,”

¹¹ engafunga ngabo olakeni lwami, ngathi: “Abasoze bangena ekuphumuleni kwami.”