AmaHubo 83 - IBHAYIBHELI ELINGCWELE

Umkhuleko wokuba zichithwe izitha zika-Israyeli

Igama. Ihubo lika-Asafa.

¹ Nkulunkulu, ungathuli, ungalibali, ungali ukukhuluma, Nkulunkulu.

² Ngokuba bheka, izitha zakho ziyaxokozela, nabakuzondayo baphakamisa ikhanda.

³ Ngobuqili benza uzungu ngabantu bakho, bacebisana ukulwa nabathukusiweyo bakho.

⁴ Bathi: “Wozani sibaqothule, bangabe besaba yisizwe, negama lika-Israyeli lingabe lisakhunjulwa.”

⁵ Baceba nganhliziyonye, benza isivumelwano ngawe:

⁶ amatende ka-Edomi naka-Ishmayeli, nakaMowabi nakaHagari,

⁷ noGebali, no-Amoni, no-Amaleki, neFilistiya nabakhile eTire.

⁸ Ne-Asiriya lahlangana nabo, laba yingalo yabantwana bakaLoti. Sela*

⁹ Yenza kubo njengakuMidiyani, nakuSisera, nakuJabini ngasemfuleni iKishoni,

¹⁰ ababhubhela e-Eni Dori, baba ngumquba womhlabathi.

¹¹ Amakhosana abo wenze abe njengo-Orebi noZebi, nabakhulu babo bonke njengoZeba noSalimuna

¹² ababethi: “Masizithabathele amadlelo kaNkulunkulu.”

¹³ Nkulunkulu wami, benze babe njengezibi ezikhwishizayo, njengamakhoba amuka nomoya.

¹⁴ Njengomlilo oshisa ihlathi, njengelangabi elithungela izintaba,

¹⁵ baxoshe kanjalo ngesivunguvungu sakho, ubethuse ngesiphepho sakho.

¹⁶ Thela ubuso babo ngehlazo, baze bafune igama lakho, Jehova.

¹⁷ Mabahlazeke, baphele amandla kuze kube phakade; mabahluleke, babhubhe,

¹⁸ bazi ukuthi nguwe wedwa ogama lakho linguJehova; ungoPhezukonke emhlabeni wonke.