AmaHubo 76 - IBHAYIBHELI ELINGCWELE

UNkulunkulu ungumahluleli nomkhululi

Kumholi wokuhlabelela. Ngogubhu. Ihubo lika-Asafa. Igama.

¹ UNkulunkulu uyaziwa kwaJuda, igama lakhe likhulu kwa-Israyeli.

² Itabernakele* lakhe liseSalema, nendlu yakhe iseSiyoni.

³ Waphula lapho imicibisholo yomnsalo, nesihlangu, nenkemba, nempi. Sela*

⁴ Uyakhazimula ngobukhosi, lapho uvela ezintabeni zempango.

⁵ Bachithekile abaqinile ngenhliziyo, balele ubuthongo babo; amaqhawe awafumanisanga izandla zawo.

⁶ Ngokusola kwakho, Nkulunkulu kaJakobe, kwehlelwa ngubuthongo inqola kanye nehhashi.

⁷ Wena, yebo, wena uyesabeka; ngubani ongema ebusweni bakho ngesikhathi solaka lwakho na?

⁸ Wezwakalisa ukwahlulela kuvela ezulwini; umhlaba wesaba, wathula

⁹ mhla evuka uNkulunkulu ukuba ahlulele, asindise bonke abathobekileyo bomhlaba. Sela*

¹⁰ Ngokuba ulaka lomuntu luyakukudumisa; insalelo yolaka uyakuyibhinca.

¹¹ Thembisani, nigcwalise izithembiso kuJehova uNkulunkulu wenu. Bonke abamzungezileyo mabalethe izipho kuye owEsabekayo.

¹² Uyanquma umoya wezikhulu, wesabeka kuwo amakhosi omhlaba.