AmaHubo 65 - IBHAYIBHELI ELINGCWELE

Ukubonga izipho zikaNkulunkulu

Kumholi wokuhlabelela. Ihubo likaDavide. Igama.

¹ Udumiso luhlalela wena Nkulunkulu eSiyoni, nesithembiso siyakugcwaliswa kuwe.

² Wena ozwayo imikhuleko, beza kuwe bonke abantu.

³ Izenzo ezimbi zangahlula; iziphambeko zethu uyaziyekela.

⁴ Ubusisiwe omkhethayo wena, omsondezayo ukuba ahlale emagcekeni akho; siyakusutha ngokuhle kwendlu yakho, ithempeli lakho elingcwele.

⁵ Uyakusiphendula ngezenzo ezesabekayo ekulungeni, Nkulunkulu wensindiso yethu, wena oyithemba lemikhawulo yonke yomhlaba nelolwandle olukude;

⁶ yena omisa izintaba ngamandla akhe, obhince amandla;

⁷ othulisa ukuduma kwezilwandle, inhlokomo yamaza azo nomsindo wabantu.

⁸ Abakhile emikhawulweni yomhlaba bayesaba ngezibonakaliso zakho; uyethabisa impumalanga nentshonalanga.

⁹ Uhambela umhlaba, unisa imvula, uwuvundisa kakhulu; umfula kaNkulunkulu ugcwele amanzi; ubalungisela abantu ukudla, ngokuba uwulungisa kanjalo umhlaba.

¹⁰ Umatisa imisele yawo, ulalisa amasoyi awo; uwuthambisa ngezihlambi, ubusise okumila kuwo.

¹¹ Umnyaka uyawuhlobisa ngobumnene bakho, nemikhondo yakho iconsa amafutha.

¹² Amadlelo asehlane ayaconsa; amagquma abhinca injabulo.

¹³ Amadlelo embethe izimvu, nezigodi zisibekelwe ngamabele; konke kuyajabula, kuhlabelele.