AmaHubo 60 - IBHAYIBHELI ELINGCWELE

Umkhuleko wocela ukusizwa ekunqobeni kwezitha

Kumholi wokuhlabelela. Indlela: Umnduze; ubufakazi. IMiktamu* likaDavide, ekulweni kwakhe nama-Aramu Naharayimi nama-Aramu Soba, uJowabe ebuya, enqoba abakwa-Edomi esiGodini Sikasawoti abayizinkulungwane eziyishumi nambili.

¹ Nkulunkulu usilahlile, usichithile; mawubuye usilulamise.

² Uzamazamisile umhlaba, wawudabula izimfa; zivale izimfa zawo, ngokuba uyazamazama.

³ Isizwe sakho usibonisile izinto ezinzima; usiphuzisile iwayini, sabhuyazela.

⁴ Abakwesabayo ubanike ibhanela* ukuba liphakanyiswe ngenxa yeqiniso. Sela*

⁵ Ukuze abathandekayo bakho bakhululwe, sindisa ngesandla sakho sokunene, ungizwele.

⁶ UNkulunkulu ukhulumile ebungcweleni bakhe, wathi: “Ngiyakwethaba; ngiyakulidabula iShekemi, ngisilinganise isiGodi saseSukoti.

⁷ Ngowami uGileyadi, ngowami uManase; u-Efrayimi uyisivikelo sekhanda lami, uJuda uyintonga yami yokubusa.

⁸ UMowabi uyisitsha sami sokuhlambela; phezu kuka-Edomi ngiphonsa isicathulo sami; yethaba ngami, Filistiya.”

⁹ Ngubani oyakungiyisa emzini oqinileyo na? Ngubani oyakungiholela kwa-Edomi na?

¹⁰ Akusiwena Nkulunkulu osilahlileyo na? Nkulunkulu, awusaphumi nezimpi zethu.

¹¹ Siphe ukuba sisizakale ekuhluphekeni, ngokuba ukusiza komuntu kuyize.

¹² NgoNkulunkulu siyakwenza izenzo zamandla; yena uyakunyathela phansi izitha zethu.