AmaHubo 6 - IBHAYIBHELI ELINGCWELE

Umkhuleko wocela umusa ngesikhathi sokuhlupheka

Kumholi wokuhlabelela. Ngogubhu. NgeSheminti.* Ihubo likaDavide.

¹ Jehova, ungangijezisi ngentukuthelo yakho, ungangishayi ngolaka lwakho.

² Yiba nomusa kimi, Jehova, ngokuba ngidangele; ngiphilise, Jehova, ngokuba amathambo ami ayathuthumela,

³ nomphefumulo wami uyathuthumela, kepha wena Jehova, koze kube nini na?

⁴ Buya, Jehova, ukhulule umphefumulo wami, ungisindise ngenxa yesihawu sakho.

⁵ Ngokuba akukho ukukhumbula wena ekufeni; ngubani oyakukubonga endaweni yabafileyo na?

⁶ Ngikhathele ukububula kwami; ngimanzisa icansi lami njalo ebusuku, ngimanzisa ukhukho lwami ngezinyembezi zami.

⁷ Iso lami liyafiphala ngokudabuka; liyaguga ngenxa yezitha zami zonke.

⁸ Dedani kimi nina nonke enenza okubi, ngokuba uJehova ulizwile izwi lokukhala kwami;

⁹ uJehova uzwile ukunxusa kwami, uJehova uyamukela umkhuleko wami.

¹⁰ Zonke izitha zami ziyakujabha, zishaywe luvalo; ziyakuhlehla, zijabhe ngokuphazima kweso.