AmaHubo 140 - IBHAYIBHELI ELINGCWELE

Umkhuleko wokulondolozwa

Kumholi wokuhlabelela. Ihubo likaDavide.

¹ Ngikhulule, Jehova, kumuntu omubi, ngilondoloze kumuntu oyisidlwangudlwangu.

² Baceba okubi enhliziyweni yabo; izinsuku zonke baviva impi.

³ Bayalola ulimi lwabo njengenyoka; isihlungu samabululu siphansi kwezindebe zabo. Sela*

⁴ Ngilondoloze ezandleni zomubi, ngilinde kumuntu oyisidlwangudlwangu, oceba ukukhuba izinyawo zami.

⁵ Abazidlayo bangifihlela ugibe; ngezintambo bendlala inetha; eceleni kwendlela bangibekela izihibe. Sela*

⁶ Ngathi kuJehova: “UnguNkulunkulu wami wena.” Yizwa, Jehova, izwi lokunxusa kwami.

⁷ Jehova Nkosi yami, mandla ensindiso yami, uvikela ikhanda lami ngosuku lokulwa.

⁸ Ungazivumeli, Jehova, izifiso zababi; ungaphumelelisi amacebo abo, funa baziphakamise. Sela*

⁹ Maqondana nesihlungu sabangizungezayo mabambozwe ngububi bomlomo wabo.

¹⁰ Amalahle ashisayo mawawele phezu kwabo; mabaphonswe emlilweni nasemigodini ejulileyo, bangabe besavuka.

¹¹ Umuntu wamanga makangamiswa emhlabeni; ububi mabuzingele umuntu oyisidlwangudlwangu, abhujiswe.

¹² Ngiyazi ukuthi uJehova uyakumela udaba lohluphekayo nokufaneleyo kwabampofu.

¹³ Impela abalungileyo bayakubonga igama lakho; abaqotho bayakuhlala ebusweni bakho.