AmaHubo 14 - IBHAYIBHELI ELINGCWELE

Ubuwula nobubi babantu

Kumholi wokuhlabelela. ElikaDavide.

¹ Isiwula sithi enhliziyweni yaso: “Akakho uNkulunkulu.” Yonakele, iyanengeka imisebenzi yabo; akakho owenza okuhle.

² UJehova uyabuka esezulwini abantwana babantu ukucinga ukuba ukhona yini oqondayo, ofuna uNkulunkulu.

³ Baphambukile bonke, bonakele bonke; akakho owenza okuhle, akakho noyedwa.

⁴ Abaqondi lutho yini bonke abenza okubi, abadla abantu bami, njengokuba bedla isinkwa, bangakhuleki kuJehova, na?

⁵ Khona besaba nokwesaba, ngokuba uNkulunkulu ukuso isizukulwane sabalungileyo.

⁶ Icebo lohluphekileyo niyalijabhisa, kepha uJehova uyisiphephelo sakhe.

⁷ Sengathi ukusindiswa kuka-Israyeli kungavela eSiyoni. Mhla uJehova ebuyisa ukuthunjwa kwabantu bakhe uJakobe uyakwethaba, u-Israyeli ajabule.