AmaHubo 137 - IBHAYIBHELI ELINGCWELE

Ngasemifuleni yaseBabele

¹ Ngasemifuleni yaseBabele sahlala khona, sakhala, lapho sikhumbula iSiyoni.

² Amahabhu* ethu sawaphanyeka eminyezaneni ephakathi kwalo.

³ Ngokuba abasithumbileyo bacela ukuba sihlabelele igama, nabahluphi bethu bafuna injabulo, bethi: “Sihlabeleleni elinye lamagama aseSiyoni.”

⁴ Siyakuhlabelela kanjani ihubo likaJehova kwelinye izwe na?

⁵ Uma ngikhohlwa wena Jerusalema, masizikhohlwe isandla sami sokunene.

⁶ Ulimi lwami malunamathele olwangeni lwami, uma ngingakukhumbuli, uma ngingaphakamisi iJerusalema phezu kwentokozo yami enkulu.

⁷ Khumbula, Jehova, usuku lweJerusalema, ngenxa yabantwana bakwa-Edomi abathi: “Dilizani, dilizani, kuze kube sesisekelweni salo.”

⁸ Ndodakazi yaseBabele, wena oyakubhujiswa, ubusisiwe oyakuphindisela kuwe izenzo zakho owazenza kithina.

⁹ Ubusisiwe oyakubamba abancane bakho, abaphahlaze edwaleni.