AmaHubo 135 - IBHAYIBHELI ELINGCWELE

Indumiso kuJehova ngezimangaliso zakhe

¹ Haleluya! Dumisani igama likaJehova; mdumiseni nina zinceku zikaJehova

² enimi endlini kaJehova emagcekeni endlu kaNkulunkulu wethu.

³ Dumisani uJehova, ngokuba uJehova muhle; hubelani igama lakhe, ngokuba limnandi.

⁴ Ngokuba uJehova uzikhethele uJakobe, no-Israyeli ukuba abe yimfuyo yakhe.

⁵ Impela ngiyazi ukuthi uJehova mkhulu nokuthi iNkosi yethu iphezu kwabo bonke onkulunkulu.

⁶ Konke uJehova akuthandayo uyakwenza ezulwini nasemhlabeni, emanzini nasezinzulwini zonke.

⁷ Ukhuphula izinkungu emikhawulweni yomhlaba, wenza imibani kube yimvula; ukhipha umoya ezingotsheni zakhe.

⁸ Washaya amazibulo aseGibithe, awabantu kanye nawezilwane.

⁹ Wathuma izibonakaliso nezimangaliso phakathi kwakho, Gibithe, phezu kukaFaro nezinceku zakhe zonke.

¹⁰ Washaya izizwe ezinkulu, wabulala amakhosi anamandla:

¹¹ uSihoni inkosi yama-Amori, no-Ogi inkosi yaseBashani, nemibuso yonke yaseKhanani.

¹² Wanika izwe labo laba yifa, laba yifa lika-Israyeli, isizwe sakhe.

¹³ Jehova, igama lakho limi phakade; isikhumbuzo sakho, Jehova, sisezizukulwaneni ngezizukulwane.

¹⁴ Ngokuba uJehova uyakwahlulela abantu bakhe, ahawukele izinceku zakhe.

¹⁵ Izithombe zabezizwe ziyisiliva negolide, umsebenzi wezandla zomuntu.

¹⁶ Umlomo zinawo, kepha azikhulumi; amehlo zinawo, kodwa aziboni.

¹⁷ Izindlebe zinazo, kepha azizwa, nomoya awukho emlonyeni wazo.

¹⁸ Abazenzayo bayafana nazo, bonke abazethembayo.

¹⁹ Wena ndlu ka-Israyeli, mbonge uJehova; wena ndlu ka-Aroni, mbonge uJehova.

²⁰ Wena ndlu kaLevi, mbonge uJehova; nina enimesabayo uJehova, mbongeni uJehova.

²¹ UJehova makabongwe eSiyoni, yena owakhe eJerusalema. Haleluya!