AmaHubo 124 - IBHAYIBHELI ELINGCWELE

Ukubonga ukusindiswa engozini enkulu

Igama lokukhuphuka. ElikaDavide.

¹ Uma uJehova ebengenathi, makasho njalo manje u-Israyeli,

² uma uJehova ebengenathi, lapho abantu besivukela,

³ ngabe sebesigwinyile ekuvutheni kolaka lwabo kithina;

⁴ amanzi ngabe asewele phezu kwethu, kudlule isikhukhula phezu komphefumulo wethu,

⁵ kudlule phezu komphefumulo wethu amanzi akhukhumeleyo.

⁶ Makabongwe uJehova ongasinikelanga ukuba sibe yimpango yamazinyo abo.

⁷ Umphefumulo wethu uphunyukile njengenyoni ogibeni lwabacuphi; ugibe lwaphukile, thina saphunyuka.

⁸ Usizo lwethu lusegameni likaJehova owenzile izulu nomhlaba.