AmaHubo 122 - IBHAYIBHELI ELINGCWELE

IJerusalema lifiselwa isibusiso

Igama lokukhuphuka. ElikaDavide.

¹ Ngajabula lapho bethi kimi: “Masiye endlini kaJehova.”

² Izinyawo zethu sezimi emasangweni akho, Jerusalema,

³ Jerusalema, wena owakhiwe njengomuzi ohlanganisiwe ngokuqinileyo,

⁴ lapho imindeni ikhuphukela khona, imindeni kaJehova, ngokomthetho ka-Israyeli ukuba idumise igama likaJehova.

⁵ Ngokuba kumisiwe khona izihlalo zokwahlulela, izihlalo zobukhosi zendlu kaDavide.

⁶ Khulekelani ukuthula kwaseJerusalema: “Abakuthandayo bayakuphumelela kahle.

⁷ Makube khona ukuthula phakathi kwezingange zakho, nenhlanhla ezindlini zakho zobukhosi.”

⁸ Ngenxa yabafowethu nabangane bethu ngizakuthi manje: “Makube khona ukuthula kuwe.”

⁹ Ngenxa yendlu kaJehova uNkulunkulu wethu ngiyakukufunela okuhle.