AmaHubo 101 - IBHAYIBHELI ELINGCWELE

Indlela engenacala yababusi

ElikaDavide. Ihubo.

¹ Ngizakuhlabelela ngomusa nokwahlulela, ngikudumise wena Jehova.

² Ngizakuqaphelisisa indlela engenacala. Uyakuza nini kimi na? Ngizakuhamba endlini yami ngenhliziyo engenacala.

³ Angizukubeka phambi kwamehlo ami into embi; ukwenza kwabahlubukayo ngiyakuzonda; akuyikunamathela kimi.

⁴ Inhliziyo ephambeneyo iyakusuka kimi; omubi angiyikumazi.

⁵ Omhlebayo umakhelwane wakhe ngasese ngizakumqeda; onamehlo aqhoshayo nenhliziyo ezidlayo angiyikumvumela.

⁶ Amehlo ami akwabathembekileyo bomhlaba ukuba bahlale nami; ohamba endleleni engenacala uyakungikhonza.

⁷ Osebenza ukukhohlisa akayikuhlala endlini yami; okhuluma amanga akayikuma phambi kwamehlo ami.

⁸ Ekuseni imihla ngemihla ngiyakubaqeda bonke ababi bomhlaba, ukuze nginqume emzini kaJehova bonke abenzi bokubi.